1 SAMUEL 14 - DEENA BAIBÉL (BSI)

Jonathanke Miram Agére

¹ Longe konem Jonathan bí bík eyok gíníng gebina yaamé koodem poto, “Kaju Philistain kídíke notko elo gílape.” Idola Jonathan bíkke abu Saulme popasumato.

² Saul bí Mikronlo dalim esing ane rumkíng kolo notko ila, Gibeah lok anínlo dungai. Bíkkelo língko akkéko amie kato.

³ (Dekepe idodelo, Elike oo Phinehas ke onam Ikhabod ke aní Ahitub ke oo Ahijah bí Ephodem gela Shilohlo miripe ido.) Delokke ami kídíde Jonathanke gínamem kénmaato.

⁴ Philistain notko delo píípe Mikmash lokke gíyon suko delokke abe delo arkana lííne annyiko kado. Akondem Bojej delokke akon dem Seneh emla mandungai.

⁵ Akonde Mikmash danpe tamkasudo ila, gíyon suko delokke línggíngdanlo kado. Delokke akonde Geba danpe ila sokkodanlo kado.

⁶ Jonathan yaamé koodem poto, “Kaju ngonyi uyu kumsuna Philistain kídíke notko elo gílape. Ruutum bí ngonyim igulyépe. Bí igulmílo, ngolu anyong yadokom, íngkueteng ngolum buluke teyolo ikumdope itum lamayé.”

⁷ Yaamé koode emyansuto, “No ingkoko ipe míídudí, ngo tolíkdung.”

⁸ Jonathan potoku, “Aido. Ngonyi Philistain kídare kaadope gílajun.

⁹ Bulu ngonyim, ngonyi kelo aadak emla dakyato emmílo, ngonyike dakko delo ngonyi daklape.

¹⁰ Idola, bulu kelo tomnín suyémílo, ngonyi gílape. Kapeila, de Ruutumke buluke teyolo ikumnana iyodpe iyé.”

¹¹ Dekepe manbo supala, bínyi Philistain kídíe kaayépe emla gílento. Delo Philistain kídíe pokai, “Kaatola, Hibru ami eke buluke rusi suko arang kídílok gílendune.”

¹² Delo bulu Jonathan mela yaamé koo dem tomto, “So resatola, ngolu nonyim atí popenam eke kadung.” Jonathan yaamé koo dem poto, “Ngokkíng gímín geto. Ruutum bí Israelem buluke teyolo ikum dope bitung.”

¹³ Jonathan dadapakpe gíyon suko delo eksaato delokke yaamé koo deteng bíkkíng eksaamín geto. Resangpala, Jonathan Philistain kídardem iyabomla, bulum oletdope iyinto, delokke yaamé koode dem moka kayinto.

¹⁴ So kerang petgeyalum so Jonathanla yaamé koode midum íying annyi kope among alobokolo mokato.

¹⁵ Doolungdan lokke Philistain kídí takame, dem tatla yagorupe peso-ríanto. Kénsumape iyabompena kídí delang sipaying kídíde notko delo yagorupe pesola danto. Among eteng petírla, yagorupe lomgosula pesoname kato.

Philistain Kídarem Ikumname

¹⁶ Benjaminke among Gibeahlo Saulke lamkang duuna ami kídarde Philistain kídarem lompan-lomran sudope kaato.

¹⁷ Dekepeila, Saul bík ami kídíem poto, “Sipaying kídíem hankíla, sékoi kamane kaalen kíto,” emlíkto. Bulu dekepe irongem Jonathan melang bík gíníng yoksa kídíem geyabina yaamé koo dem kamadope kaalento.

¹⁸ “Daapong Sonduk dem so bomato,” emla Saul bí miri Ahijahme poto. Kapeila delo longe kídí delo Israel amie gíkolo Daapong Sondugem jonggo bomtuai.

¹⁹ Saulke miri dem depe lupo sudungem Philistain kídíke lomge kunamde mayang momo ikolok, Saul bí miri dem poto, “Ruutum me íngkídí kamang.”

²⁰ Delo Saul lang bík ami kídíde míílalsula akén-ayén yimape agí aralo momínsuna Philistain kídídem mimakpe ipe gílento.

²¹ Hibru ami ayoko kerape Philistain kídí danlo yéla, buluke notkolo gíamínla ina kídíeteng buluke danpe iyimape, Saul kíngla Jonathan kíng lekope imín getoku.

²² Ephraimke dííte kídílo rusisuna abíd kídíe teng Philistain kídíke dugge kunamem tatla buluteng lekope ila Philistain kídíem mimak iyabomla,

²³ Bethaben kékon loope monlíkto. Ruutum bí Israelem delo longe delo mopítto.

Jonathanke Tangut Atii Doname

²⁴ Israel ami kídíe delo longe delo akii kenolok adírla duuto. Kapeila Saul bí bulum míngíídola tolíksunamko pélíkdola, “Ngokke miru kídíem iyan sukumang adape sékodín ingkona donam kokom silo doyéne, bí gérma daklangka,” emto. Dekepe ikolok delo longe ruubudem sékoteng atí kokom dona kamato.

²⁵ Bulu takam moonam kolo aaname, tangut atiiem among teyolo doodope kaapato.

²⁶ Delo moonam delo tangut atii mílí ilateng sékoteng dona kaamato. Kapeila takame Saulke pélíknamem pesoto.

²⁷ Idola Jonathan bí bík abu lokke ami kídarem pénamlok lurítnam dem tatmín gemala, bík banggén bomnam delok tangut atii delo níklík pala anyongko laala doto. Delopak bí eker essayang kaku.

²⁸ Idola amikone bím poto, “Ngolu takame kenolok apéédung, idola nokke abue ngolum sipe luríttung; ‘Siloke longe so séko ingkona donamko dodokom, bí gérma daklangka.’ ”

²⁹ Jonathan emyansuto, “Ngok abue kapei siddípe ngoluke ami kídí teyolo adírem bilíktune! Ngom kangkítola, edítko ngo tangut atii anyongko dorongem amíle gepokakun.

³⁰ Silo ngoluke ami kídíe, ikumnam miru kídí sokke dopenamlok dola ituamílo edítko aiyan. Míngkítoka, edítko Philistain amiem petyan!”

³¹ Delo longe delo Israel kídíe Philistain kídíem Mikmash lokke ila Aijalon loope mimak ila ikumto. Delo ami kídarde yagorupe kenolok adung-apééto.

³² Dekepeila, bulu miru kídíke delok langkamnam ato teyong delo lombom aala, mér sobénem, taro kídíem goola, deloi pala, iyyi katak sudope adínem doto.

³³ Saulme delo pokuneke, “Kaatola, ami kídísi Ruutumke keralo, iyyi katak sudope adínem dokolok paab idung,” embito. Delo Saul bí poto, “Noluke míngkenglok nolu oletkai. Menape so elíng bottenako langaato.”

³⁴ Delo bí akoda lulíktoku, “Ami kídílo gíla, bulum takam buluke taro emla mér sobénem bomala so aamoto. Bulu dem so pala dope aiyé. Bulu iyyi katak suna adínem dola, Ruutumke keralo paab ipe aimang.” Dekepeila, delo yume delo, bulu takame buluke taro kídíem bomala delo pato.

³⁵ Saul Ruutum kepe delo rungguko píbito. Si Saulke Ruutum kepe píge yalumnam runggue.

³⁶ Saul bík ami kídíem poto, “Kaju ngolu tokla, Philistain kídí sim yoh kamolo iyabomla, roh paang loope líílíkla bulum takam petyinlape.” Delo bulu poyansuto, “Nokke ibaape míínamem itola.” Idola miride, “Kaju Shédíme kerape íísu polajun,” emto.

³⁷ Dekepe ila Saul Shédíme íngkíto, “Ngo Philistain kídísim iyabom míloya? No ngolum ikum moyén?” Idola delo longe delo Ruutum bí atí poyan sumato.

³⁸ Delo Saul bí ami kídí delokke ruutum kídídem poto, “So aadumsula, ingkona paabkoi silo ngolu imemtone dem malenkíto.

³⁹ Ngo Israelem ikum mona turna Ruutum ke amínlok imemna dem, delokke imemnade ngok oo Jonathan bí idokom simoyé, emla pésudung.” Idola sékote atí pona kamato.

⁴⁰ Delo Saul bí bulum poto, “Nolu takame elodan dakto, delokke ngo lang Jonathan sodan dakyé.” Bulu, “Nokke aipe míínamem no idak langka,” emla poyan suto.

⁴¹ Saul, Ruutum Israelke Shédíme poto, “Ruutum, kapeda no ngom silo poyan sumaton? Ruutum Israelke Shédía, deena elíng kídar sok poyan sutoi. Imemsi Jonathanke demangkom ngokkepe idumílo Urim lok poyan sulangka; delokke imem si nok Israel ami kídí sokke mílo, Thummim lok poyan sulangka.” Delo Jonathan melang Saul me ullenla delokke ami kídídem deepít bito.

⁴² Delo Saul, “Ngok oo Jonathan kelang ngok aralok imemnem ullento,” emla pokolok Jonathan me ullento.

⁴³ Delo Saul Jonathanme íngkíto, “No íngkoko iton?” Jonathan poyansuto, “Ngo ngok bomnam asék kolok tangut atii anyongko laala doto. Sina ngo. Ngo sipe irusudung.”

⁴⁴ Saul bím poto “Shédíbí ngom, nome petma mílo simodakyika.”

⁴⁵ Idola ami kídíde Saulme poto, “Kape, Israelem sikepe bottena ikumnamem paabona Jonathanme simoyénía? Dekepe imayé. Ngolu turna Ruutum kelok pésudung. Jonathan bí bík dumpong lok mítyong atel koteng dílmo mayé, delokke siloke bík inam si Shédíke igul lokmin itone.” Dekepe ami kídíde Jonathanme sipeko lokke mopítto.

⁴⁶ Delokke ila Saul bí Philistain kídíem monyimape, bulu takame agí amongpe entoku.

Saulke Roja Doboname

⁴⁷ Saulke Israel lok rojape irongem, bík miru takamem mimak imín suto: Moab, Ammon, Edom ami kídíem, Joba delokke Philistain roja kídíem, bíkke mimak iko takamlo bí ikumyinto.

⁴⁸ Saul miramrupe mimak makla, Amalek ami kídí emteng ikumto. Bí Israel ami kídíem iyabomna takamlok mopítto.

⁴⁹ Jonathan, Isbi delokke Malkishuah bulu angume Saulke oo kídíe. Bík ome abíyang lok amínem Merab emto, delokke aníyang dem Mikal emto.

⁵⁰ Bík méng amíne Ahinoam, bí Ahimaaj ke ome. Bík sipaying ruutumde bík apang Ner ke oo Abner bí,

⁵¹ Saulke abu Kishla Abnerke abu Ner bínyi Abielke oo kídíe.

⁵² Saulke turdung tabungem, bí Philistain kídíem botterupe mimak makmín sutíto. Dekepeila, Saul bí milo ralna, miga-miramna kaapanam takamem bík sipayingpe imoyin dungai.