1 SAMUEL 13 - DEENA BAIBÉL (BSI)

Philistainem Mimak Imín Suname

¹ Saul bí takying angumko iduem rojape iyala, Israelem takying appi kolang dítak annyiko rojape yéboto.

² Saul bí midum jarumko ullenla, Mikmash lolang Bethellok dííte amonglo jarnyiem bíkkíng mesupala, éjardem Benjamin opínlok among kídí delo Gibeahlo, bíkke oo Jonathan kíng lekope melíkto. Abíd ami kídíem Saul bí ekumpe melíktoku.

³ Jonathan bí Gebalo Philistain kídíke maglíng ruutumem mimakpe iyala ikumto, delokke sim Philistain takame tatyinto. Delo Saul kotoki tomlíkla, Hibru kídíem mimaklo endope, takam doolung kídílo bikul tapungem tatyindope mutyinto.

⁴ Israel ami takamem Saulke Philistain kídíke sipaying ruutumem petnam emla Philistain kídíke bulum nenamem popa bikolok, Israel ami kídíe Saulke tomdum sunamem Gilgallo lekope ibosuto.

⁵ Philistain kídíke Israel kídíem mimak ipe gídum sudodem bulukíng mimak guré-gaarie éjar íying angumko, guré dugbomna sipayinge éjar akkéko delokke sipaying amie siyéng robenglok siyé kísape inako kado. Bulu Bethabenlok sanggodanke Mikmashlo gíla notko ito.

⁶ Delo bulu Israel kídíem mimak iyabomla bulum akén-ayén yimadope imoto. Israel kídíe bulume dííte bupík kídílo, kobung-korulo, delokke asi déérung kídílo rusigeto.

⁷ Ayokone Jordan korongem koola Gad kelang Gilead among kídílo aato. Saul bí Gilgallo duudo ada delokke bíkkíng yémín gena ami kídarde pesolok danla duuto.

⁸ Bí Samuelke ponampe, Samuelme longe kínídko toyato. Idola Samuel delo loope Gilgallo aamang. Ami kídíde Saulme mela gípan supem ilenkai.

⁹ Iname bí bulum poto, “Romnam ipak kídí emlang ashéng gídum ipak ilík penam kídíem ngokke so bomato.” Saul romnam ipakko ilíkla,

¹⁰ dem iyinpakpe iduem Samuel pííngato. Saul bím kaarík supem gíla, bím yamríkto.

¹¹ Idola Samuel pokai, “No kape iton?” Saul poyansuto, “Ami kídíe gípan sukupe ila, delokke nokke pííyé emdílo nokke píímang kolok, delokke teyolo, Philistain kídíe Mikmash elo gídum sukolok,

¹² ngo mííto, ‘Philistain kídare Gilgal so ngom mimak iyabomyé, delokke ngo Ruutumke mííbanamem matakímang.’ Dekepeila, ngo ipak sim ilíkmoi emla ilento.”

¹³ “No molokrupe ido,” emla Samuel podola, “No Ruutum nokke Shédíke lulík binamem tatmato. No tadtuamílo, bí nom lang nok otíng-oyinem Israel teyolo agínpe yébom yardope imoyai.

¹⁴ Idola supak lokke nom yéyar bommo yimayé. Bíkke agomem nok tatmang kolok Ruutum bí bíkke mííbasunam amiko mata langkula, bíkke ami kídí teyolo ruutumpe imoyéku.”

¹⁵ Samuel Gilgal lok gílen langkula agí bedangpe ensutoku. Abíd ami kídíde Saul kíng lekope bíkke sipaying kídílo enmín getoku. Bulu Gilgal lok gíla Benjaminke among Gibeahlo gíato. Saul bíkke sipayingdem sankíla, língko akkékope santo.

¹⁶ Saul, bík oo Jonathan, delo buluke ami kídíe Benjamin ke Gebalo notko ito, delokke Philistain kídíe notkoem Mikmashlo ito.

¹⁷ Philistain sipaying kídíe buluke notko delok magpé angumpe ila mimakem ipe gílento. Makpé konde Shual lok Ophrah danpe gíto.

¹⁸ Makpé konde Beth-Horon danpe, delokke angum nanade, rísu delo, asi-among emla yépol moorugem kaatok sudola duuto.

¹⁹ Israel aralo arem yogmo agér ina atel koteng kamato, kapeila Philistain kídíe Hibru ami kídíem eyok-gíníng písu madope ito.

²⁰ Dekepe ikolok, Israel ami kídíe Philistain kídílo gíla aal pang, pakur, egíng, katsik kídarem pírat dungai.

²¹ Egíngem píratko, delokke gooru aal pangem pírat are nokdi pabok aména annyiko idungai.

²² Dekepe ikolok, mimak ido longe delo, Saul melang bík oo Jonathan bínyim mela Israel sipaying kídílo, séko kíngte eyok delokke gíníng kamato.

²³ Philistain kídíe alungko Mikmash loope gíang pekoem dakbom moto.