1 SAMUEL 10 - DEENA BAIBÉL (BSI)

¹ Delo Samuel olib télkana gíriko laala Saulke dumpong delo purlíkla bím mumpub dola, “Ruutum bí nom bík Israel ami kídíem ruutum bodope tosaklíkdung. No bík ami kídíem ruutum bomyé delokke bulum buluke miru kídílok mopítyé. Delokke si nom Ruutum bí, bík ami kídíem ruutum bodope ullen sunamem aroe emla lengkanbiyé,” emla poto.

² “Silo ngonyike gípan suyém, Benjaminke amonglo duuna Jeljahlo Raselme yuko ampeng delo no ami annyiko gíríksuyé. Bínyi nom nok matabomnam gado kídarem paalangkula, nok abue buluke legape ankíyimape nok legape ankíla, ‘Ngo ngok oo legape kape imíloi?’ emla íngkítídung emnamem pobiyé.

³ Delokke no Tabor doolunglo duuna ok esing sine dem pííma tetengem enlangka. No delo midum angumko Bethello Shédíme ipak ilíkbipe endakpe kaayé. Akonde béno angumko goobomyé, ami konde burla goona ettíng angumko joobomyé, delokke angum nanade ayo nyogon kolo aponge bíínako kayé.

⁴ “Delo nom yamríkdola burla goona ettíng delokke annyiem biyé, dem no torík sulangka.

⁵ Delo no Philistain notkoko kala iko, Gibeah lokke Shédíke díítelo gílangka. Doolung delok luyab delo harp tapung, layar tapung batla, puruli tapung mutla delo dumdum dííla dííte delokke runggu delok oidakkupe kaaluna mirieke gíríksuyé. Bulu paksong soola ulo gogla iyé.

⁶ Menang asak Ruutumke aide nokkíng aala, no lekope kaalu-kangor agomem pola no angupe ikuna amipe iyé.

⁷ Sike iyod kídí si edílodín nokkíng iyéne, Shédíke pokorpe takam atoem ilangka.

⁸ No ngok kerape Gilgal elo en-geyé. Elo ngo nom kaaríksula romnam ipak kídí emlang gídum ipak kídíem ilíkyé. Delo ngo aala ipenam kídíem pobima tetelope longe kínídko toyalangka.”

⁹ Saulke Samuel kelok gílen dokupe iduem, Shédíbí Saulme aní aapíko ruulíkto. Delokke Samuelke bím ponam takam iyod kídíe delo longe delo ipíngto.

¹⁰ Edílo Saul lang bík béérangde Gibeahlo píítodí, delo kaaluna miri opééko bím kaaríksuto. Menang asak, Shédíke aide Saulme gagbomla, Saul teng buluke yagorupe ashéla paksong mirilo imín geto.

¹¹ Bím kerape kénna ami kídarde bíkke sikepe inamem kaala, íngkí bosuto, “Kishke oo bí kape ikanai? Saul bí kaaluna miri kídar aralo kaaluna akonpe ikanía?”

¹² Delo duuna amiko, “Buluke abue séko?” emla ííyansuto. “Kaaluna miri kídí aralo Saulteng kadunía?” emnam agom si ami kídí aralo gomlikope lenkai.

¹³ Edílo Saul bí kaaluna miri paksongem iyintodí, delo bí dííte delokke runggu delo saato.

¹⁴ Saulke apangde bím lang bík béérang dem kaala, “Nolu ingkolo yéton?” emla íngkíto. “Gado kídar emna mataton, delokke paamang kolok Samuel kíng íngkípe gíto?” emla Saul poyansuto.

¹⁵ “Bí nonyim kape podon?” emla Saulke apangde íngkítoku.

¹⁶ “Bí ngonyim taro kídar dem paato kubong emla podo,” emla Saul poyansuto. Idola bí bík apangdem Samuelke bím rojape imonam legangdem pobimato.

Saulme Rojape Tolíkname

¹⁷ Samuel ami kídídem Mijpahlo gídum sudope gogla,

¹⁸ bulum poto, “Ruutum, Israelke Shédíbí podung. ‘Ngo nolum Ijipt amonglok laalenla Ijipt kídí delokke nolum adír-modírna abíd ami takam lok nolum mopítto.

¹⁹ Ngo, nolum noluke takam ankí-keno loklang adírlok mopítkuna noluke Shédíe. Idola silo nolu ngom míípakla ngome nolum rojako bidope kodung. Aiyé, demílo, Ruutumke keralo opín-opín pelang, erang-erangpe gídum sulangka.’ ”

²⁰ Delo Samuel bí opín takamem kerang delo opín-opínpe aamola, delo Ruutum bí Benjamin opínem ullento.

²¹ Delo Samuel Benjamin opín lokke erang takamem erang-erape keradelo aamola iduem, Matrike erangem ullento. Delo Matrike erang lokke milokong kídíem keralo dagamododem, Kishke oo Saulme ullento. Bulu bím matato, idola paamang kolok,

²² Ruutumme íngkíto, “Kape de amide supak loope aamang adan?” Delo Ruutum bí poyansuto, “Eena Saul bí agíem ekurang kumpom méélam esina rusisudun.”

²³ Dekepeila, bulu dugla Saulme ami kídí keralo bomlentoku, delokke kaaname Saul bí takam empemílo bodong yalumdo.

²⁴ Samuel bí ami kídídem poto, “Sina Ruutumke ullen sunam amie. Ngoluke aralo bíkke kísana abídyang ami kamang.” Takam ami kídíde ashéngrupe yidgela, “Rojano duuyar daklangka,” emto.

²⁵ Samuel bí ami kídídem, roja lokke ilanam delo ipenam agér kídíem poyil imík bipala, dem kitab kolo atbila, dem deena moolop delo mesiito. Delokrongem bí takamem ekumpe gímotoku.

²⁶ Saulteng ekumpe Gibeahlo entoku. Miga-miramna ami opééko Shédíke buluke aapí-aangem uktet kolok, bíkkíng enmín getoku.

²⁷ Idola bíírík-hamgomana ami opéékone, “Si ami si ngolum kape kísa aina atoem ibolayén?” emla Saulme míípakla bím atí aman boma bimato.