1 SAMUEL 1 - DEENA BAIBÉL (BSI)

Hannahke Ankí-kenoname

¹ Ephraim ami Jub ke oo Tohu, Tohuke oo Elihu, Elihu ke oo Jeroham, Jeroham ke oo Elkanah emnam amiko Ephraimlo kato.

² Bí méng annyiko bomto; akon delokke amíne Hannah, delokke akon delokke Peninnah. Peninnah bí koo kato idola Hannah bí negenpe yéto.

³ Elkanah bí dítak-dítaklo, bíkke doolung delokke gílenla, Eli ke oo Hophni kelang Phinehas bínyike, Ruutum ke miripe iko Shiloh amonglo, Maglíngke Ruutum me kumsukape delokke ipak ilíkpe gídungai.

⁴ Elkanah ke ipak idí longelo, bí bíkke méng Peninnah melang bík ome kídí emlang oo kídíem tarong orlík yindungai,

⁵ delo Hannah me bí ayang yapekla, tarongem bojéyape ordungai.

⁶ Delo Hannah me Ruutum ke negenpe imokolok, bík belnede bím marmola, adír paamope emla mííto.

⁷ Dekepe dítak-dítagem iyarto, Hannah ke Ruutum ke ekumlo gítídungem, Peninnah bí bím iré-rétíto. Dekepeila, Hannah bí doyi-tííyimape kapla duuto.

⁸ Delo bík milo Elkanah bí bím íngkíto, “Hannah no kapeda kapdune? Kapeda no doyi-tííyimane? Kapeda nok aapí-aangde míídírdune? Ngo nok legape oo íying emte gaiyamanía?”

⁹ Buluke Shilohlo doro-tíírongem Hannah bí gerepto. Delo miri Eli bí Ruutum ke ekum lokke eyab gaang ampelo duuduem,

^10-11 Hannah bí yagorupe míídírla Ruutum kelo kumsuto, delo yagorupe kapla-rííla ito. Delo bí pélík sunamko pésudola, “E Maglíngke Ruutum, no nok béérang sok adírem kaala, ngom míípasula, míínyok sumape nok béérang sim ooko bimílo, ngo dem Ruutum kelope bíkke yénamem biyé, delokke bík dumídem edílokom yoksik lok ngímayé,” emto.

¹² Bíkke Ruutum ke keralo kumtídungem, Eli bí bík nappang belegem kaato.

¹³ Hannah bí aapí aralo kumsudola, nabbél petome belekla atí bík agom tatpamaato. Dekep ikolok Eli bí bím tíngírsuna mimekope mííto.

¹⁴ Delo Eli bí bím poto, “No edílo peda tíngírsula duuyén? Nokke apong dem no mepak sutola?”

^15-16 Idola Hannah poyansuto, “Ma ngok ruutum, ngo yagorupe adír paana mime komin, ngo atí díkpena apong tíímang, idola Ruutum ke keralo min ngo ngok aapí-aangem pokan sudune. Nokke béérang mime sim bíírík-hamgomana mimekope míímapeka, kapeila ngo supak loope ngok míídír emla adíremmin pokan sudune.”

¹⁷ Delo Eli poyansuto, “No aapí-aange eetetpe míídola gílangkuka. Kapeila, Israelke Shédíbí nom, bíkkelok kobom namem bí bidaklangka.”

¹⁸ Hannah bí poyansuto, “Nokke béérang mime si nok kangkolo ayang paanape idaklangka.” Delo Hannah bí delokke gílangkula dola-tííla itoku, delokke bíkke migmo delo atí adír emnam kaapayimato.

¹⁹ Rokomdem bulu menape gerepla Ruutum ke keralo kumsuto. Delok rongem bulu Ramah doolunglo, agí ekumpe entoku. Delo Elkanah Hannah me ketbo sulangkula, delokke Ruutum bí Hannah me míípa sutoku.

²⁰ Dekepeila moodílo Hannah bí koo gela ooko oto. “Ngo bím Ruutum kelok kolento,” emla oo delokke amínem Samuel emla mínto.

Hannahke Samuel me Tolíkname

²¹ Elkanah lang bík erange, dítak moodí ipak idíem, Ruutum me bík pésunamem apíídope, Shiloh amonglo gílendíe pííto.

²² Idokom Hannah bí gímato. Hannah Elkanahme poto, “Koo si minela anyun tííyi mayém, ngo bím gíbola Ruutumke ekumlo gíboyé, delokke bí delo agínpe duuyaryé.”

²³ “Nok aapí míngkorpe ilangka, supak ekumlo duula koo sim anyun sunpotoka, delokke Ruutum bí nok pésunamem apíí modak yika,” emla Elkanah poyan suto. Dekepeila, Hannah ekumlo duudola koo dem kaasuto.

²⁴ Koo dem anyun sunsa rodem Hannah bí, ruo angum kolang ettíngem kilogram íying kope, delokke ayo nyogonlo bíína apongko bomla Shiloh lo gíboto. Hannah Samuel me koo amépe Ruutum ke ekumlo aaboto.

²⁵ Bulu ruo dem palík rodem, koodem Eli kíng aaboto.

²⁶ Hannah bí sipe poto, “E ngok ruutum, no ngom kénsudo adan? Nokke kaatonam, so dagdola Ruutum kíng kumna mimede nguamoko.

²⁷ Ngo Ruutum kelok sim koo sim koto. Delokke bí ngok konamem bito.

²⁸ Dekepe ikolok, ngo bím Ruutum kelope tolíkdung. Bíkke turdung tetengem, bí Ruutum kepe iyé.” Delo bulu Ruutum me delo kumsuto.