1 PITOR 5 - DEENA BAIBÉL (BSI)

Shédíke Mér sobén Kídare

¹ Noluke aralokke abu abíng kídía, ngo agí repet kísape, Kristoke adír genam hakiipe delokke angkupena angun ralnamlo yébo sukupena akonpete nolum rogudung.

² Noluke gooralo duuna Shédíke mér sobén ruutumpe ila nolu iperuuname emkolok imape, idola nolum Shédíke míngkampe agíke erbom sukolok, murkong poisar kaabolok emmape, idakkom agíe míísatsula,

³ noluke gooralo menam kídíem lulík polík petompe imape, agíe mér sobén kídar lokke kaayii sukeng ruutumpe yébotoka.

⁴ Delokke edílo mér kaabomna ruutum yalumde aayékudí delo nolu nyokyimana angun ralnam roja dumlubem paayéku.

⁵ Yaamé kídía, dekepakpe abíyana kídíem roge langka. Akone akonlo remagna aapí aangem gebo sulangka. Kapeila; “Shédí bí míngkímem akdung idola míímé sunem yanggongem bidung.”

⁶ Delok legape, Shédíke tolna lakpong gooralo agísuem míímo sulangka, demílo nolum longeko bí bomon saayé.

⁷ Noluke peso ankíe emla míínam tabungem bíkkíng melík sutoka, kapeila bí nolum ankídung.

⁸ Agíem mosing sula, ansula duulangka. Noluke uyu mirue ngírla myomur kísape dopenam matala ampeng amlenglo matí goodung.

⁹ Míngkesula edíípe dakdula, bím tolya sulangka, kapeila noluke bíro kídíe tani gíídaso sikena arééyém rééla yédung, dem nolu kénsudung.

¹⁰ Idakkom anyongoko noluke adír rongem, Kristoke lekope duuyarna angun ralnamem paabo sudope nolum tomlenna takam lokke yanggongem bina Shédí bí agíe nolum mosingyéku delokke nolum tolnam ralnamem bila apíí moyéku.

¹¹ Bíkkíng pauare duuyar mínyépe. Amen.

Luyin Poyinnana Salame

¹² Ngokke edíípe míísunam bíro Silbanake igullok, ngo nolum lurat poratnape delokke si Shédíke aro yanggonge emla lengkan nape, nolukíng andepe ngokke atname. So edíípe yélangka.

¹³ Noluke lekope ullennam Babilonlo duuna mondoliekom salamem bidung, delokke ngokke Markkom dekepe nolum salam bidung.

¹⁴ Ayang mumpuplok noluke salamem bibo sulangka. Kristokíng duuna takam nolukíng yéponame duudak langka.