1 PITOR 3 - DEENA BAIBÉL (BSI)

Milo Méng Kídí

¹ Méng kídíde, dekepe noluke milo kídíem roge langka, delomin akone agom sim arope mííma dokom, noluke aina beleng ségu kídílok bulume atí agom pomapeteng ikumyéne,

² kapeila noluke deenampe pesola yénamem bulu kaayé.

³ Noluke kampode luyulokke gesii bommo dumlap koolap, lunggu lakrum leemo kanmo delokke ege galuk genam bomnamlok ipe aimang.

⁴ Dempenem, Shédí kelo are kanarung noluke aapí aang aralok nyokyi mana nyamne aro delokke remel aapí kamponape ipe aido.

⁵ Legade sike pemino agísuem kampope mesupe emla Shédíkíng míínam suna, kerangoke deena mime kídíe yétone. bulu agí milo kídíem roge dungai,

⁶ bulu Abrahamme belenggena delokke bím bíkke ruutume emna Sarah kísa dungai. Nolu aina atíem ila delokke pesomape yédumílo bíkke omepe idung.

⁷ Milokídía, dekepakpe, nolukom noluke mimem duubo sunade kénbi sutoka, delokke bulum nolukíng yéyar bosuna tolmayana angonge emla delokke nolum dungge pena turnamlokke yanggong amane emla míípe aido, demílo ingkuete noluke kumnamem itum lamayé.

Aro Agér Legape Adír Gename

⁸ Luyinnape, nolu takam, akone akonem jonnamlok yébo sulangka, ayang yanggul bosulangka, ayang míípa bosulangka delokke ansoope mííyin bosulangka.

⁹ Atímanem atímalok demangkom iréénem iréélok rayan sukupe emla imape, ainamlok iyansupe aido kapeila nolu ayang igulem paadope emla sikenalo nolum tomlíktung.

¹⁰ Legade, “Séko turnamem ayange emla míídudí delokke aina longem kaalídudí bí atímanam lokkemang menam yadnam agomlokke agí ayuem mosiisupe aido.

¹¹ Bí atí manamlokke ngééba langkula, ainem ikurupe aido; bí yéponamem matakupe aido.

¹² Kapeila, Ruutumke amig kídare yéjii namlomin kadune, delokke bíkke nyorunge buluke kumnamlo gebang bidung; idakkom atímape yéna kídíem Ruutumke mingmue kangkidung.”

¹³ Nolu aina agérem gérlí dumílo sékobulu nolum atímape ipenade?

¹⁴ Idakkom nolu ainam legape adírem paadumílo nolu gérne. “Buluke peso namem peso mapeka, pesue emlate míímapeka.”

¹⁵ Idakkom noluke aange Kristome Ruutumpe míírek sulangka. Noluke míínam sunam mííbomnam legangem pobidomílo emla nolum íngkína mipilem pobeng bipe emla agínpe míírung sulangka. Idola sim míngííla delokke míngge dola,

¹⁶ berok songkok aangem gedola pobeng bipe aido; delomin edílo nolum irééyédí, delo Jisu Kristokíng mamín gela aina niyomem ibom namem nolum atímang emla lupatsuna amikídíe buluke agomem annying suyékune.

¹⁷ De Shédíke mííduemílo atímana inam empemílo ainam agér legape aréé genamde aiyadung.

¹⁸ Legade idung, nolum Shédí kelo langaang dokupe, yéjiina Kristo bí yémemna takamke paab legape letellok siyin gebito. Bím amílpe simoto idakkom Aidlok turmotoku,

¹⁹ delokke bíkke dekena aidlok bí gíla patek duuna aid kídílo dooyingem pogooto.

²⁰ Sikesimin aid aralokke Noahke etkungem padak omdak longe kídar delo Shédíke hakjém gedola toyanam Shédíme míngge mana aid kídare. So mitel minyi petomko, takamem lula midum píínyi petomko asi raadalok turkune;

²¹ delokke si asi si amíl lokke akang arbín kunamem emmape, Shédíkelo aro aapíem gedola pésunam supakke nolum turmokuna, baptis inam adume.

²² Teyong among pauarem, ruutum bomla teyong kotoki kídíem yébola, teyong telo angkuna delokke Shédíke lakbíklo dungkuna Jisu Kristoke sipala gerep kunam lokmin nolum turmo dungkune.