1 PITOR 1 - DEENA BAIBÉL (BSI)

¹ Jisu Kristokelo tomlíknam Pitor Shédíke ulpek lennam mibo amolo dunggoona, Pontu, Galata, Kapadokia, Asia delokke Bithunialo dunggona kídílo salame.

² Nolum Abu Shédíke míídulok ullentung delokke Jisu Kristoke iyyilok arbínla, bím beleng gedope Deena Aidlok deedope ruutung. Yanggong elang yéponame nolukelo goobyak daklangka.

Are Kana Mííbomname

³ Kaju ngoluke Ruutum Jisu Kristoke Abu Shédíme yidlaju. Kapeila bíkke bottena yaasam ayalok Jisu Kristome sikolok gerep molangkula bí ngolum aní turnamem bitung. Si ngolukíng are kana mííbom namem apíí modung,

⁴ delokke dekepe ngolu Shédíke bíkke amikídíem binam mirem agamem toyadung. Dekedem bí edílote nyokyi pemangko teyong amotelo nolukepe megap bidung.

⁵ Yéyin longelo lengkanpe emla meruunam noluke míngkelok turnam paanam dem, Shédíke ralnam gooralo mebitung.

⁶ Supakke anyongo moodí legape ikang darkang mipílo duuk adír duakom nolu bojépe sim ashéng bompename.

⁷ Sikepe ibomnamde noluke aro míngkengem arodudí dem kaabenape idung. Nyokpena uunemte emelok romkang kído; deke kísape uunemte pakyana noluke míngkeng emkom duuyar ladope ikaarupe aido. Delomin nolu yidnamem angun ralnamem delokke pesogedola míínamem Jisu Kristoke lengkan sudíku Longedelo paayéne.

⁸ Nolu kaama lateng, bím ayadung; delokke nolu bím supak kaama lateng, bím arue emla míídung delokke posat subi lamanam angun ralnam delokke ashénge noluk aapíem bííbomdung.

⁹ Kapeila nolu noluke míngkeng subom namem, aid turku pekuem paadung.

¹⁰ Turnam legang pemape kaaluna mirikídíe ansuoola delokke aipakpe dem legadem matítone delokke Shédíke nolum bipenam utepooro aman legape bulu kaalu kangor agomem poruutone.

¹¹ Edílo moodíe pííyédí delokke dekede kapepak lenyédí dem takam bulu malendope itíto. Sikepe idosomin Kristoke dongge penam duuk adírem delokke méélam angun ralnam aapena legang takamem poruu bitone.

¹² Teyong among telok metoknam Deena Aid pauarlok tatpona Dooyingem pobina daaklok noluke supakke tattonam agom atí-sirí dem bulu ponamde, buluke agérde buluke agí laab lega pemang idakkom nolukepe idope emlamin Shédí bí sim kaalu kangorna miri kídíso lengkan líktune. Teyong kotokieteng sim atíkídí sim mabom lídung.

Deenampe Yépename

¹³ Delok legape agér ipe emla noluke aapíem leemo sutoka; agíem mosiisula; Jisu Kristoke lenyé kuem nolum yanggong bipe namlo noluke mííbom namem melík sutola.

¹⁴ Noluke kénmang adape yédungem atímana yérugem gyapkumape idola agom tatna ome-oo kísape ilangka.

¹⁵ Idakkom nolum tomna bí kape kísa deedudí dekepe noluke lunam inam takamlo nolukom deetoka;

¹⁶ kapeila sim sikepe “Deelangka, kapeila ngo deedung” emla attung.

¹⁷ Ami mipil agérem akampe bisar penem Abue emla nolu gokdunade, noluke turnam yénamem mibope so pesogedola yétoka.

¹⁸ Legadem nolu kénsudung, kapeila si noluke buku nekulok bomyon sulangala are kamana nyokkupena atí-sirí arem tadoklok nolum aro manamlokke relen kumang,

¹⁹ idakkom Kristoke rela manam iyyilok, dengomruna mér Oolokmin nolum retungkune.

²⁰ Bím pílen ballen kera pekai ulpeksula metung, idola yéyin longe kídarso noluke legape lengkan bidung.

²¹ Bíkke logei bím angun ralnamem bilangkula sinamlokke gerep mokuna Shédíme nolu arorupe míídung, delokke dekepe noluke míngkeng elang mííbom namdete Shédíkíng duudung.

²² Supak nolu aruem igela, agísuem deesu kuname, noluke bíro kídílo aro ayange kabosudung, akone akonem eerípe aanglok ayang bosudung.

²³ De legade idung, nolu nyokpena amilokke mang, idakkom duuyarna delokke turna Shédíke agomlok olat sukuna kídíe.

²⁴ Legade sike pemoko: “Takam tani si neyang akame delokke takam buluke ralnamde mibín appun kísa; neyangde sanpakdo delokke appunde dílpakdoku,

²⁵ idakkom Ruutumke agomde agínpe duuyarne.” Delokke simino nolukíng ngiitomlok pobitonam agome.