1 ODONG 26 - DEENA BAIBÉL (BSI)

Kumkeng Ekum Lamgéem Dakbomne

¹ Sikesi Kumkeng Ekumem dakbomna Lebi kídíem agér parlíknam kídíe: Korah opínlok Asaphke erang Koreke oo Meshelemiah.

² Meshelemiahke oo kínídko kato: buluke okorlok Jekhariah, Jediael, Jebadiah, Jathniel,

³ Elam, Jehohanan, delo Eliehoenai.

⁴ Obed Edomke oo píínyiko kato: buluke okorlok, Shemaiah, Jehojabad, Joah, Sakar, Nethanel,

⁵ Ammiel, Issakhar, delo Peullethai. Si Shédíke Obed Edomme utepooro biname.

^6-7 Obed Edomke obíyalum Shemaiahke oo akkéko kato: Othni, Rephael, Obed, Eljabad, Elihu, delo Semakiah. Bulu kénna-ralnarupe inam legape buluke opín aralo bulu mínggenam amipe ito; méélamke annyisi apekrupe kénnam-ralname ito.

⁸ Obed Edomke eranglok sandumsula midum íying akké kolang annyiko so agér so ibaarune ito.

⁹ Meshelemiahke eranglok midum íying kolang píínyiko ibaarune ito.

¹⁰ Merarike oo Hosahke oo appiko kato: Shimri (bíme oo obíyalum maduakom bík abue ruutumpe imoto),

¹¹ Hilkiah, Tebaliah, delo Jekhariah. Hosahke eranglok tabungpe midum íying kolang angumko Kumkeng Ekum dakbomnape ine kato.

¹² Kumkeng Ekum dagbomna kídarem buluke erang akorpe orpansula, Lebi kídíem inam kísape, Kumkeng Ekum delo agér kídíem panlíktuai.

¹³ Erang miyongem anyo-bojé kamape, ingkona lamgé emdí dagbompene deme lotori sobosuto.

¹⁴ Shelemiah sanggodan lamgéem sopaato, delokke aina poyil-luyilem agínpe bibona, bík oo Jekhariah línggíng lamgéem sopaato.

¹⁵ Sokko lamgéem Obed Edom me panlíkto, delokke bík oo kídarem kumsung kídíem dagbomdope panlíkto.

¹⁶ Anggo lamgé emla línggíng bedang lokke Shalleketh lamgéem Shuppim melang Hosah bínyim panlíkto. Sontori dagbomdíem moodí orek-orekpe ipansula dakkí-dakyansuto.

¹⁷ Longe miyonglo sanggodan lamgélo dagbomna akkéko, línggídanlo appiko, delokke sokkodanlo appiko dagbomto. Loodíke kumsung atelem midum annyipe ila, kumsung kídí deme appiko dagbomto.

¹⁸ Anggodanke kebang ipom anín delo bedang ampenglo midum appiko dakto, delokke kebang ipomru delo midum annyiko dakbomto.

¹⁹ Si Korah opín emlang Merari opínem sontori dakbompenam agérem orlíkname.

Kumkeng Ekumlok Abíd Agér Kídíe

²⁰ Delokke Lebi kídí aralok, Ahijahbí Shédíke ekum lokke abal emla tolíknam aman kídíke kumsungem kaabomnape ito.

²¹ Gershonke okon Ladanbí, bíkke oo Jehielke erangem itaksula deddína erang kídílok bukupe ito.

²² Ladanke abíd oo annyi Jetham lang Joel bínyi, Kumkeng Ekum lokke abal meko emlang kumsung kídíem kaabomnape ito.

²³ Agér tarongem Amram, Ijhar, Hebron delo Ujjiel buluke otíng kídar loteng bilíkto.

²⁴ Mosike onam Gershomke oo Shebuelbí Kumkeng Ekum delokke kumsung ruutum botteyalumpe ibone.

²⁵ Gershomke bíro Eliejer kelok bí Shelomith ke alipe ito. Eliejerke ue Rehabiah, bíkke ue Jeshiah, bíkke ue Joram, bíkke ue Jikri, bíkke ue Shelomith.

²⁶ Shelomith lang bíkke erang kídarde, Dabid rojake, delo erang kídarlok ruutum kídíke, delo pínmík-ramíklok ruutum kídíke, delo sipaying ruutumkídíke Shédí keelo tolíknam aman takamem kaabomnape ito.

²⁷ Bulu mimak ikolok laala bomkunam ayokonem Kumkeng Ekumlo gérnadope tolíkto.

²⁸ Kaalu miri Samuel, Roja Saul, Nerke oo Abner, Jeruiahke oo Joab bulu tabungke aman bidum sunamem itaksula Kumkeng Ekum delo agér inadope tolíknam takamdem Shelomith lang bíkke erang kídíe kaabomto.

Abíd Lebi Kídíke Agére

²⁹ Ijharke otíng loge Kenaniah melang bíkke oo kídarem, doolung legí-sigangem mesiibola, Israel amilok ebínem kebang lubila idope kelíng-kebang agérem panlíkto.

³⁰ Hebronke otíng loge Hashabiah melang bíkke ali-atodlok amín kanarung 1,700 ami teyolo, Jordan korong anggodanke Israel amonglo Ruutum ke agér takam emlang roja kepe agér gérbinam kídíem kaabomdope bilíkto.

³¹ Hebronke otíng kídí lokke ruutumpe Jeriah bí iboto. Dabidke takying appinape rojape idodelo Hebron ke odongem ííta-tatta mododem, sok erang sokkepe ina amín kanarung sipaying eke Gilead among lokke Jajer doolung delo duudope paato.

³² Roja Dabid Jeriahme, delokke bíkke eranglok erang ruutumpe ina kénna-paana midum 1,700 ko ulla, Jordan sanggodanlo duuna Reuben opín, Gad opín, delo Sanggo Manasseh opín teyonglo Shédí kelang roja lokke agér kídíem kaabomdope parlíkto.