1 ODONG 23 - DEENA BAIBÉL (BSI)

¹ Edílo Dabid mijing-jingkakpe itodín, bíkke oo Solomonme bí Israel lokke rojape ilíkto.

Lebi Kídarke Agére

² Dabid tabung Israellok ruutum kídarem, miri kídarem, delo Lebi kídarem laadumsuto.

³ Lebi milokong kídídem bí takying angumnalok ila teyong yanem santo. Tabungem sandumsue 38,000 ko ido.

⁴ Dabid poto, “Buluke arang soge 24,000 ko Ruutumke ekum lokke agér kídarem igeboyé, 6000 ko ruutum pelang bisar bonape iyé,

⁵ 4000 ko lamgéem dakbomnape iyé, delokke 4000 konde ngokke yitgenape tapung monam loge Ruutumme yidge bonape iyé.”

⁶ Dabidbí Lebi kídarem erang akorlok ila opéé angumkope orpansulíkto: Gershon, Kohath, delokke Merari.

⁷ Gershon oo annyiko kato: Ladan lang Shimei.

⁸ Ladanke oo angumko kato: Jehiel, Jetham, delokke Joel,

⁹ bulu Ladanke otíng kídí lokke ruutum kídíe. (Shimeike oo angum ko kato: Shelomoth, Hajiel, delo Haran.)

^10-11 Shimeike oo appiko kato: Okorlok Jahath, Jina, Jeush delo Beriah. Jeush lang Beriah bínyi otíng bojé kamato, dekepeila bínyim erang atelkope sandung.

¹² Kohathke oo appiko kato: Amram, Ijhar, Hebron, delo Ujjiel.

¹³ Bík obíyalum Amram bí Aaron kelang Mosike abue. (Aaron melang bík otíng-oyinem, deena ekurangem kaabomla, Ruutumme kumsukolo namponem nyotlíkla, bím agérem gérbila, delokke bíkke amínlok ami kídarem utepooro agomem políkdope mengusuto.

¹⁴ Idola Shédíke ami Mosike oo kídarem Lebi opín kídílo sanlíkto.)

¹⁵ Mosike oo annyiko kato: Gershom lang Eliejer.

¹⁶ Gershomke oo kídarlok ruutume Shebuel.

¹⁷ Eliejerke ue Rehabiah petom, idola Rehabiahbí bojéko otínge kato.

¹⁸ Ijharke oo kídílok Shelomith bí obínge.

¹⁹ Hebronke oo appiko kato: Jeriah bí obínge, Amariah bí annyinane, Jahajiel angumnane, delokke Jekameam bí appinane.

²⁰ Ujjielke oo annyiko kato: Mikah lang Isshiah.

²¹ Merarike oo annyiko kato: Mahli lang Mushi. Mahliteng oo annyiko kato: Eleajar lang Kish.

²² Idola Eleajar oo omape sikai; bí petom omeke kato. Buluke erang atel lokke Kishke oo kídare bulum méngpe laayinsuto.

²³ Mushike oo angumko kato: Mahli, Eder, delo Jeremoth.

²⁴ Sikesi Lebike oo kídarlok buluke abu-abulok erang tabungem angupe ekum ruutum akorlok atkumla, Ruutumke Kumkeng Ekumlo agér ipena, takying annyina lokke ila teyongna kídíe.

²⁵ Dabid poto, “Ruutum Israellok Shédíbí bíkke amiem eetedem bito, delokke bí agísue Jirusalemlo duuyaryé.

²⁶ Dekepeila Lebi kídare Ruutumke dungkeng Tombu demlang bím kumkolo inana ekurang kídídem jootí gobom penam kaimang.”

²⁷ Dabidke poyin yalum agompe takam Lebi kídarem, séko takying annyi píngkadí, delokke bojéyang kabodín, bulume Ruutumke ekumlo agér gérdope sanlíkla,

²⁸ sim agér kídar sim parlíkto: Aaronke otínglok miri kídarem Kumkeng Ekumlo kumnam agérem igulbosudope, Kumkeng Ekum delokke aatak gíídang demlang pírtek kídíem kaabomdope, delokke deena ato kídarem deenampe mebodope;

²⁹ Shédíme bipenam ettíng, amanpe bipenam ettíngem, siiyé kamana ettíngem, pamnam ettíng kídíem, delokke olib téllo soyél sulíknam ettíng kídíem kangge-ige bodope; Kumkeng Ekum delo bomanam takam aman kídíem tebeg-etsang demangkom bodong-andengem kíbodope;

³⁰ delokke yumdí-rodíem Ruutumke amínem ríngge-yidgebola,

³¹ delokke edí-edílo Sabbath longelo, Aní Poolo Gíídílo, delo abíd gíídí-siipelo Ruutum keelo romnam amanem ilíkyédín, delo yidge-ríngge bodope. Sim agér kídí sim ikolo, irum-irumlo edít Lebi amie ibosupene dekena ayon kídíem moto. Ruutumme kumsunam agérem igebodope agín keepe Lebi kídíem bilíkto.

³² Ruutumke dungkeng Tombu demlang Kumkeng Ekum deme kaabomdope, delokke Aaronke otínglok miri kídar, buluke edung-erang kídídem, Kumkeng Ekumlo kumnam joonamem igulbosudope bulume parlíkto.