1 ODONG 21 - DEENA BAIBÉL (BSI)

Dabidke Ami Sanname

¹ Israel ami kídarem adír bidope emla uyuko daga bomla Dabidme Israel amiem sankímoto.

² Joab melang sipaying ruutum kídídem Dabid bí poto, “Beersheba lokke ila Dan loope gíla, Israel amiem sankítoka. Edít amikoi kadun dem ngo kénlídung.”

³ Delo Joab poyansuto, “Ruutum bí supakke duuna ami sim língko aduko bojéyang modakyika! Ngokke ruutuma, bulu tabunge nokke béérange. No kape sikepe ila Israel takamlo imemem laalíkpe ilíngkan?”

⁴ Idokom Joabme rojade lulígem igedope pogapto. Delo Joab gílenla, Israel among tabunglo gígola, Jirusalemlo aalatsutoku.

⁵ Joab ami isapdem Dabid me bitoku. Israel tabung lokke 1,100,000 amiko delokke Judah lokke 470,000 amiko sipaying agérlo ibeene kato.

⁶ Joabbí Lebi lokkelang Benjamin opín kídarem sanmato, kapeila bí rojalok lulíg sim tolíkmato.

⁷ Idokom Shédí bí sikepe inam sim aipe míímato, dekepeila bí Israel kídíem ingééto.

⁸ Delo Dabid Shédíme poto, “Ngo sim agér sim ikolok, yagorupe paab kakai. Supak ngo nome kumdungku, nokke béérang sokke imemem laapaktoi, kapeila ngo bopolrupe agér sim ito.”

⁹ Dekepeila Ruutum bí Dabidke kaaluna miri Gad kíng políkto,

¹⁰ “Dabid kíng gíla polangka, ‘Ruutum bí sikepe podung: Ato angumko nome ngo bidung; nokkíng ngo ilíkdope, sok atelko tolangka.’”

¹¹ Dekepeila Gadbí Dabid kíng aala pobito, “Ruutum bí sikepe podung, ‘No ingkuem mííbadon dem tolangka:

¹² Tagumko dírí-keno emía, demangkom poolo angumko nok miru kídílok dugnyok getínam emía, demangke longumko Ruutumke yoksalok nome mimak iyabomla, delokke nokke amonglo kiliem melíkla Israel among tabungem ngok kotoki kídíe ipaknam emía.’ Supak ngom melíknem pobidokupe tolangka.”

¹³ Dabid Gadme poyansuto, “Ngo míngkén along suyimang! Idola ngo mibo miru ami kídílok itung-iré kosulímang. Ruutum agísume ngome itung-iré modaklangka, kapeila bí ayarunako.”

¹⁴ Dekepeila Ruutumbí Israel amonglo kilii-ramliko melíkla, delo buluke 70,000 amiko sikai.

¹⁵ Delokrongem bí kotokiko melíkla, Jirusalemem nyokmodope melíkto. Bíkke nyokmopem idopak delo Ruutum bí míílat sulangkula kotokidem poto, “De aikabong! Nokke alage supak ukkí yimapeka.” Kotokide Jebus ami Araunahke ali-ayé yikpom ampeng delo dagduai.

¹⁶ Dabid kaadung sutoname kotokidem among kelang teyong among pénsam delo yoksem orbomla Jirusalemem nyokmope dakdope kaato. Delo ankí egem gela Dabid lang miro kídar tabungde mikmue amonglo itetdope gubato.

¹⁷ Dabid kumto, “E Shédía. Ngomino imemnade. Ngomino ami kídíem sandope lulígne. Si ami kídar si ingkokoda itone? Ruutum, ngok Shédía, ngomlang ngok erangem itung-irélangka, delokke nok ami kídarem mesam daklangka.”

¹⁸ Delo Ruutumke kotokide Gadme lulígla Dabidme Jebus ami Araunahke ali-ayé yikpom delo gíla Ruutum kepe rungguko pídope poto.

¹⁹ Ruutumke lulígnamem Gadke pobinampe Dabid igeto.

²⁰ Araunah lang bík oo appide yikpom delo géhu yikduai, delo edílo bulu teyong kotokidem kaatodín, oo kídíde dugla runyokgeto.

²¹ Araunah bí Dabid rojame bíkkíng aadope kaayédem, bí yikkol delok gílenla, bím mínggedola gubato.

²² Dabid bím poto, “Kilii-ramli kídísim itumdope, ngo Ruutum keepe rungguko so pílíkdope, ngokkíng nokke yikkol sim kolík langka. Ngo nome are em apíípe biyé.”

²³ Araunah Dabidme poto, “Ngok ruutuma. Aiyé laalangka, delokke nokke ipe míínamem ilangka. Ngo ngok gooru kídarem romlík penam amanpe, yiknana esing kídíem esingpe, delokke ali-ayé amanpe géhuem bidung. Ngo sim takam nome bidung.”

²⁴ Dabid roja Araunahme poyansuto, “Ma ngo apíngpe are em biyé, nokke atodem ngo Shédíke legape asampe lamayé, kapeila asampe nokkíng laanam deloge ngo Ruutumme kumsulanamayé.”

²⁵ Dabid Araunah me uun nokdi lok 600 ko moolop delokke arepe bito.

²⁶ Bí rungguko píla, romnam aman kídíem delokke ashéng aman kídíem delo ilíkto. Bík kumnamem Ruutum bí teyong among loge romnam aman deme gumope ememe melíkla poyansuto.

²⁷ Dekepe irodelo Ruutum bí kotokidem lulígla, bíkke yoksadem bukkonglo iklíksutoku.

²⁸ Deloge Dabid bí bíkke kumnamem Ruutum bí poyansubito emla kaala, bí Araunahke ali-yikpom delo pínam runggu delo amanem bisaklíkto.

²⁹ Mosike yépol mooruklo pínam Ruutumke Tombu delang romnam amanem bisakko runggude Gibeon doolung lokke kedonko delo kaduai,

³⁰ idokom Dabid bí delo Shédíme kumsupe gílatomang, kapeila bí Ruutumke kotoki delokke yoksadem pesoto.