1 KORINTH 9 - DEENA BAIBÉL (BSI)

Tomlíknamke Agére

¹ Ngo Ruutum suma nakua? Ngo Tomlíknam ami mangkua? Ngo ngoluke Ruutum Jisume kaama nakua? Ngokke Ruutumkelo agér gérkolok nolu lenna mangekía?

² Angu konlo ngom Tomlíknam amipe sanma dokom berokrupe nolukepe ngo Tomlíknam amipe ito namape! Kapeila nolumin ngokke Ruutumkíng Tomlíknampe kangkeng ikenge.

³ Ngok teyolo bisarna kídílo ngokke poyan sunam agome simino;

⁴ Dobo tííbo supekolo ngolu dola tííla manía?

⁵ Ruutumke bíro kídía, Kepha delokke bík tomlíknam ami kídí inam kísape ngolu arope míngkesuna mimeko en goobosu lamanía?

⁶ Demangkom ngolang Barnaba petomía turnam legape agér gérsudune?

⁷ Séko amie agí murkolok dosudola sipaying agér ilíínako kadun? Séko amie aliem ngiilík tuula delokke ayém doku manako kadun? Séko amie gooru rubamem bomdula delokke anyunem tíímanako kadun?

⁸ Ngo sim tani míídu petom logía podune? Ayone pokam atelpe pomanía?

⁹ Legade Mosike ayonlo sikepe attung: “Nolu ammo yikdungem gooru nappangem purkap mapeka.” Shédí bí rubo petomlua míítídune?

¹⁰ Berokrupe sim bí ngolu takamke legape podung, de menamkua? Arope ngolu kepemin sim agom sim attune; kapeila edílo arík monade moyédí delokke yidnade yidyédí bulu ayé tarongem pangkupe emla míínam sudo lamin idune.

¹¹ Ngolu nolukelo aid amíeke kuujé tula, nolukelok adín aliem yidku namde adí amodunía?

¹² Angu amie nolukelok paapenam tarong kadumílo, dempenem ngoluke pakyape paapenam tarong kamayénía? Idakkom ngolu sim igíí tarong sim igemang. Igeyéla ngolu Kristoke dooyingem itum madope emla doojém gedung.

¹³ Kumkeng Ekumlo agér gérna kídíe kumkeng ekumlok donamem paadung, delokke kumko baarilo kumsuna kídíe delo kumlíknam donam tarongem paamíndung, dem nolu kénmanía?

¹⁴ Deke kísa tatpona dooyingem pogoona kídíe dooying pogong kolok buluke turgenanem paape aido emla Ruutum bí ngiitomto.

¹⁵ Igeyéla ngo sok ibasunam tarongemte atelkote inam kamang. Depe emdo emla nolu ngom dekena igulem iyépe emla míínam sudola sim atmang. Kapeila sim ngokke yidge sunam sim akone lunyokpe míímílo, ngo sigenamde adumyang.

¹⁶ Depe igeyéla ngokke dooying pogoo namde, yidsu penammang, kapeila ngom pogoorudope ruutung. Ngo dooyingem pogoo mamílo ngokke mangkam runge!

¹⁷ Ngo agí ernam rulok pogoo dumílo ngokke pore kadung; ngo agí eraplok isu mamílo ngo ngokkíng bilíknam agér petomem idoboo mílo emla idung.

¹⁸ Demílo ngok ire ingkuedí? De sikepakpe idung; Dooyingem pogoo namde ngokke asampe bisuname, delokke de ngokke dooying pore petom pekom mange.

¹⁹ Ngo agíe ruutumsue delokke sékoke abíl petemang iduakom, amiem bojéyape langaadope ngo agísuem mipil lokke abílpe isudung.

²⁰ Judai kídílo ngo agíe Judai kídíem ikumpe emla, buluke kísape isuto. Ayonlo duuna kídílo, ngo agíe ayon aralo duuma duakom, ayon aralo duuna kídíem ikumpe emla, ayon aralo duuna kísape ito.

²¹ Ayon kamana kídílo, ngo Shédíke ayon kékonlo duumape idola Kristoke ayon aralo duula, ayon kamana kídíem ikum kape emla, ngo agíe ayon kamana kísape yéto.

²² Ralmana kídílo, ikumkape emla, ngo agíe ralmanape yémín geto. Iko ikolok ila milum konem turmo dokupe emla ngo takam amilo takam jatpe yémín geto.

²³ Ngo sim takam sim dooying tatpona legape, depe emnamde delokke gérnam tarongem paadope emlamin idune.

²⁴ Dukkí suko takamlo dukkísune kadung, idokom midum atel komin amanem paadune, dem nolu kénmanía? Amanem paadope dukkí sutoka.

²⁵ Imanlo ikumna mipilde aro ternínglo yédung. Bulu sim duuyar mana roja dumlubem paape emlamin idune; idakkom ngolu duuyarna dumlubem paape emla idung.

²⁶ Delok legape ngo duggí mape dukna ami kísape dukmang; ngo emmumpe mogíímape momín suna kísape momín sumang.

²⁷ Idakkom ngokke dooyingem angulo pogoo rongem, ngo agíe agí amílem mogíbsula agí abílpe mesudung, delo ngo agíe amanem paabamape imayé.