1 KORINTH 6 - DEENA BAIBÉL (BSI)

Mondoli Aralo Gusor Ibosuname

¹ Noluk aralo akone akonem akmín lumín suyém, bí dem Shédíke ami keralo iyinsupe namem megeyéla, angu ami keralo bisarem imope emlangía míídune?

² Shédíke amikídíe tani amongem bisar iyéku emla kénmanía? Delokke nolu tani amosim bisar pemílo nolu ansoona gusorem bisar lamanía?

³ Ngolu teyong kotoki kídíemte bisar iyéku dem kénmanía? Dekemílo tani yénam sokke legadem pope namei kamang.

⁴ Dekemílo sikena legangem mondoliem ansooyape míínamlo gusorem melíkdunía!

⁵ Annyii sutoka. Noluke aralo míngkesuna kídí gooralo lumín manmín sunem kénnampe lutum itum bopena kalamanía?

⁶ Dem megeyéla akone akonem mirolpe imín sukolok arope míngke sumana kídí keralo gusor imínsupe inamde ainamía!

⁷ Noluke akone akonem gusor momín sunamdei apíípe noluke nyokku nana lerínge. Dempenem kapeila imemem toge mangkane? Kapeila ipu silumem dongge mangkane?

⁸ Dempenem nolu agísuemin noluke bíro kídíem imul sudune delokke ipu silum sudune.

⁹ Mipat kídíe Shédíke yétalo tarong paamín gemayé dem nolu kén manía? Agíem yadko sumapeka; notii inekom, mimang kumsuna kídíekom, ami milo demangkom méng ibina kídíekom, mime mangkí goona kídíekom, milo eelene demangkom mime eelene bommín suna kídíekom,

¹⁰ doppyo tíísina kídíekom, mííbo kaabona kídíekom, tíngír dobat sunekom, ngilkaana kídíekom, yattí goona kídíekom takamde Shédíke yétem ruutum dogemayé.

¹¹ Delokke dekepei nolu ayokone yétuai. Depe ituakom Ruutum Jisu Kristoke amínlok, delokke ngoluke Shédíke Aidlok, nolu írbín sutoku, deesutoku, deene emla sanlík kosutoku.

Nokke Amílem Shédíke Angun Ralnam Legape Inalangka

¹² “Ngokkepe atí takamde iba dobaaname” depe emdo emla takamde ayi yiyinmang. “Takam atíde ngokkepe iba dobaaname”- depe emdo emla ingkuekom ngom ikummayé,

¹³ “Doname akii legape delokke akiidete donam legape”- idola Shédí bí annyi demkai nyokmoyé. Amílsi abír ina penamang, idakkom Ruutum kepemin, delokke Ruutum bí amíl kepe.

¹⁴ Agí pauarlok Shédí Ruutumme sikolokke gakrepkuna Shédí bí ngolumteng gakrep yéku.

¹⁵ Noluke amílde Kristoke amíl attung kone, dem nolu kénsu manía? Demílo Kristoke amíl attungkonem gedula abír inapía? Edílokom depemang.

¹⁶ Séko notiilo abír ibosududí bí akon delokke amíllo gyabbo sulíkkai, dem nolu kénsu manía? Legade sim sikepe attung, “De annyide adín atelpe iyéku.”

¹⁷ Idakkom Ruutumme mínggapna amide bíkkíng aid atelpe imín gedung.

¹⁸ Mime milo belum agér ibosu kolokke mooteng langkuka. Abíd imemnam tanike paab kídarde amíl lokke kékone, idakkom séko mime milo belum agér idudí bí agí amílem ibul sudung.

¹⁹ Noluke amíl sudei noluke arasulo duuna, noluke Shédí kelok paanam Deena Aid kumkeng ekume, dem nolu kénsu manía? Nolu nolu sukemang;

²⁰ nolu relen kunam teteng emino. Delokke legape noluke amílem Shédíke angun ralnam legape inalangka.