1 KORINTH 5 - DEENA BAIBÉL (BSI)

Mondolilo Abír Ibosuname

¹ Lubi pobinamlok aropakpe tatname noluke aralo tatkí rumanam moomem ami aralote ikímanam abír ibo sunameke kadung emdung. De idung amikone agíem omana nesuem ketbo sudung emla taddung.

² Dekepe ilate nolu adum ale idung ai! Nolu dem míínyi sumanía? Dekepe ina amidem noluke baane lokke mepak tokuka.

³ Ngo agíe kaamangkom aidlok nolukíng ngo yébo sudung. Ngo agíe duumín gena kísape dekepe inadem bisar tobong.

⁴ Ngoluke Ruutum Jisuke amínlok noluke dumsu duem, ngokom nolukíng aide yémíndung, delo ngoluke Ruutum Jisuke pauare dung,

⁵ dekena amidem bíkke paab ségue nyokdo kupe Soitan alaglo melík pootoka, demílo bíkke aide Ruutumke bisardíku longelo turyéku.

⁶ Noluke adum ale inamde aimang. Siiyé anyongoko pitkatnam deteng, ettíng alemdem duamodung, dem nolu kénmanía?

⁷ Nolu tabunge deedo kupe paab imona aku siiyédem megen suto langku. Demílomin nolu siiyé líkmanam ettíng aní, ngokke kaasu kénsunam nolu, nolu kísarupe duuyéne. Kapeila Gíbong adeng apelokke mérbéno, Kristo bí asampe silík bitobong.

⁸ Delok legape Adeng apesim aku siiyélok, marlíng aklíng delokke atí manamlok imape, siiyé líkmanam jonnam delokke aro ettínglok ilangkuju.

⁹ Ngokke sithilo nolum notii ina kídílo leko bosumapeka emtuai.

¹⁰ Delokke depe emdo emladan, tani amosokke abír ina, demangkom kaabona delokke melí yaddona, demangkom mimang kumsuna ami kídíem anyongkote yébo dakbo sumayé emmang; depe imílo nolu tani gíídasim mepak pakyik supe nampemin iyéne.

¹¹ Idakkom supak ngokke nolum atbom namsi séko agí bírue emsu geyéla, belumna abír ajon ila, ngangompe kaabo tatbola, mimang kumsula, ngiléé solééla, tíngír dobatsula demangkom melí yaddonglok yédudí, sikena amilo dorík tíírík ibo sumapeka.

¹² Angu ami kídíem ngokke bisar penam ingko agérko kadun? Mondoli aralo duuna kídíem nolu bisar ipe manekía?

¹³ Luyulok yénem Shédímin bisaryéne. Dooyinge lubidung, “Noluke aralo atímana amiem noluke aralok megéétoka.”