1 KORINTH 4 - DEENA BAIBÉL (BSI)

Kristokelo Tomlíknam Kídíe

¹ Demílo amie ngolum Kristoke béérang kísape delokke Kénpí manam Shédíke arang atíem biket líknam kídípe míípe aido.

² Supak sikena béérang igepenam akonde, bí bíkke ruutumem míngkesupe aido.

³ Ngokke pedan noluke ngom bisar penam demangkom taniem íngkí bengkíko ayonlok bisarnam dem deddípe mínggemang; arope ngo agíete ngom bisar isumang.

⁴ Ngokke aapíe berok sudung, depe emdo emla ngokke imem kamang emsumang. Ruutum bímin ngom bisar kupenade.

⁵ Delok legape bisar idíe píímang adape bisar mapeka. Ruutumke angkuma tetengem dooya langka. Kaamo ruaklo mesup sunamem bí angunlo lengkan yéku delokke tani kídí lokke mebum namem laalen biyéku. Dekepe iyém mipile Shédí kelok yidnamem paayéku.

⁶ Bíro kídía, supak sim atí kídí sim noluke aipenam legape ngokkílang Apollokíng luyiisula podung; depe emnamde “Atnamem gíbong mapeka” emnam agom ortuem ngolukelok nolu kéndope inamko. Demílo nolu akonem agdola akonem adum ale ibommayé.

⁷ Kape, séko nolum lungu pongu sudune? Noluke paamang embom namde ingko atí ekeda? Delokke nolu dem paatumílo, kapeila nolu paamanam kísarupe lute ludune?

⁸ Noluke míínam takamem nolu paadubong ai! Nolu remdu bonapemin ai! Ngoluke doomangem nolu rojape ikaabona pemin! Ngolute nolukíng rojape imín gedope nolu arope rojape ikai emnamem tatla edítko ngo ashédun!

⁹ Kapeila ngo kaaname Shédíke tomlíknam migul kídí ngolum méélam yalum opéélo sipeko amolo, ngolum tani amonge, teyong kotokie, kaaman nakepe metung.

¹⁰ Ngolu Kristo kepe mide bomsudung, idola nolu Kristo kelo kénnarunge ai! Ngolu mekemne, nolu ardane ai! Nolu míngge pename, ngolu kaapak penam epemino.

¹¹ Ngolu supakteng tíílíng kenona, díílíngem díngkenge, ekum kamana kísape magoone.

¹² Ngolu agí lakbíílok ankípe ngiisune; béélíknem lubéé líkne; taronang iduem jémgene;

¹³ Luyéé luléénem aipe poyansune. Supaklope ngolu tani gíídangem usaamone, amoso magoone.

¹⁴ Sim agom sim nolu annyii suyépe emla atmang, idakkom kénsuyépe emla, agíke ome-oo kísape míísudola pobe lubeng bidung namino.

¹⁵ Nolum Kristo kelo yébone jarnyikope kaduakom, noluke abue bojémang, tatpona dooying bikolo Kristo Jisuke legalo ngo noluke abupe ikai.

¹⁶ Delokke legape nolum ngo pogapdung ngom kangge sulangka.

¹⁷ Sok legape Ruutumkíng míngkesuna, ngokke ayanam oo, Timothime nolukíng melíkdung. Bí nolum ngokke Kristo Jisukíng yénam daknam lekorem delokke dekepe ngokke rego rego mondoli mipílo poyil luyil goonamem popang boyéku.

¹⁸ Ngo nolukíng aamayé emnamem mííbomdola, noluke aralo ayokone adum ale idung.

¹⁹ Idakkom Ruutumke míínampe iyémílo ngo nolukíng menape aayé delokke delomin de adumsole ina ami kídíde kapepak podudí dem ngo malenyéne.

²⁰ Legade Shédíke yétade agom lokmang idola pauar lokmin iyéne.

²¹ Nolu ingkuem mííba yadon? Ngo nolukíng boyikko bomlangía aapene, demangkom aapí remagem gela ayang logía ipene?