1 KORINTH 3 - DEENA BAIBÉL (BSI)

Shédíke Béérange

¹ Bíro kídía, deena ami kídíem ponam kísape ngo nolum pomape, tani amoso adínlok yéna, Kristo kelo ojing repet kídíem ponam kísapemin potone.

² Ngo tolna apimlok bimape, nolum anyun lokmin suntone, legape, nolu depe idodelo dem dolang matuai. Supak teng arolok luyém dola mangada.

³ Nolu supakteng adínlok yédung ada. Legade noluke aralo nesu posu akmín lumín kabo sunamde adín lokke manía? De moomem yékampe yénam manía?

⁴ Legade akone emyé, “Ngo Paulke opéye”, delokke akone poyé, “Ngo Apolloke”, dekepe mannamde moomem ami kísamanía?

⁵ Dekemílo Apollo ingkue? Delokke Paul ingkue? Ruutumke mipilem agér bilíknam nolum arue emla kénsu mokuna béérang petom emino.

⁶ Ngo aliem sidlíkto, Apollo bí asi bila kaabomto, idakkom Shédímin siirep monade.

⁷ Dekemílo leyana dekom atí kamang asi bina dekom atí kamang, idakkom atíem siirep mona Shédí petommin lerínge.

⁸ Leyana dekom, asi bina dekom ibomname atele, delokke mipilem agí agí gérdulok irem paasudope iyéku.

⁹ Legade ngolu Shédíke ríkrabe; nolu Shédíke aríge, Shédíke ekume.

¹⁰ Shédíke ngom binam amanem inadola, ngo ekum mojina kísape aane gaangem díílíkto, delokke ami akone delok teyolo ekumem molíkdung, idola mipile kapekísa morepdudí dem ansu langka.

¹¹ Legade ingkuem rureptudí delokke kékonlo sékote kumkol angu ruulamang, de kumkolde Jisu Kristo.

¹² Sok kumkol sokke teyolo séko bulu uun, abal, arem, arekanarung elíng, ekap demangkom ammunglok moyédí,

¹³ delo mipil lokke agérem kaabeng yéku; kapeila angkupena longede kaabeng moyéku. Dem emelok lengkan yéku; delokke emede mipil lokke agér edíínam edíí manam akorem gukaayé.

¹⁴ Delo sékoke moname turyédí bí bíkke irem paayé.

¹⁵ Delo sékoke agérem guyédí, bíkke asamyé, dekom bí agíe emelok lenkunam kísa pakpe turnamem paayé.

¹⁶ Nolu agísue Shédíke kumkeng ekume, delokke Shédíke Aide nolukíng duumíndung dem nolu kénsu manía?

¹⁷ Séko Shédíke kumkeng ekumem nyokmo yédí, bímkom Shédí bí nyokmoyé; kapeila Shédíke kumkeng ekumde deene, delokke nolumin bíkke kumkeng ekumsue.

¹⁸ Agíem yadsu mapeka. Noluke aralo séko so tani among yékorso kénnape míísududí bí aropakpe kéndope mide poope aido.

¹⁹ Legade tani among sokke kénnamde, Shédíke kangkolo mide. Sim sikepe atbitung, “Shédí bí kénnem bíkke língkitlok gakdung”

²⁰ delokke lekoda podung sikepe, “Ruutum bí kénna kídí lokke mííyi míísange mirupe idung emnamdem kéndung.”

²¹ Dekemílo taniem yidpe nammang! Takamde noluke,

²² Paulkom, Apollokom, Kephakom, amosikom, turnam dekom, silo melokom, suu nyampoke legang dekom, si takam si noluke;

²³ delokke nolu Kristoke, Kristokom Shédíke.