1 KORINTH 2 - DEENA BAIBÉL (BSI)

Pansaanam Kristoke Legange

¹ Bíro kídía ngokke nolukíng aadodelo Shédíke len gang anggang dooyingem nolum pobodungem ngo luyit lukotla, kénpek yana kísarupe emla imangai.

² Legade ngokke nolukíng yébosuduem abídyang mííbom mape Jisu Kristo delokke bím pansaanam petom emmin kénperung emla itone.

³ Ngo nolukíng ralmape pesodola, delokke dan go sudolamin aatone,

⁴ Ngokke agomde delokke poyil iyilde kénnam kootírlok ponomdope emla imangai idakkom, Aid ralnam yékor lokmin ibee lentuane,

⁵ depe emnamde noluke míngkenge tani kénnamlok imape Shédíke ralnamlok idope iname.

Shédíke Kénname

⁶ Depe idokom ngolu kénnam dooyingem kénbee sunalomin pobodune, idakkom sok yérum sokke are kamana sok yérum sokke yébo ibona ruutum kídíke kénnam mangai.

⁷ Sina, ngolu kénpí manam Shédíke angun ralnam legape meruu binam agom emmin ngolu podune.

⁸ Dem atídem sok yérum sokke ruutum kídíe kénmato, kapeila bulu kéntuamílo, erkí genam Ruutumme pansaa mayai.

⁹ Depe idokom dem sikepe attung: “Bím ayana kídí kepe Shédí bí ingkuem iruu bitudí, dem sékoke nyorungete tatmato; sékoke aapílote gemato.”

¹⁰ Idakkom Shédí bí ngolum bíkke Aid lokmin dem lengkantune; Aidde takam atíem eerína atíemte mapaadung.

¹¹ Legade tanilo duusuna tanike aid petom emin bíkke legangem kénsudune; dekepe, Shédíke atíem Shédíke Aid petom emin kénsudune.

¹² Ingkuem Shédí bí ngolum asampe bitudí dem ngolu kénsudope emla, tani among sokke aidem paamape Shédíke Aidem ngolu paatung.

¹³ Ngolu sikepemin podune; Aid agomlok aro aidem pokan dakla tani kénnam agomlok poyilmape Aid agom lokmin poyiltone.

¹⁴ Tani moomeme Shédíke Aidlok aana atíem torík sumang, legade bíkke legape de atí kídíde tosii manam ulpage, delokke bí dekedem tatkén kangkén mang, kapeila deke atí kídíde aidlokke atíe.

¹⁵ Aidlok yéna amide takam legangem bisardung, idola bímdan tanie bisar penayang kamang.

¹⁶ Legade: “Séko Ruutumke aapíem kéndun? Séko bím poyil ladun?” Idakkom ngoludan Kristoke aapíko gedung.