1 KORINTH 12 - DEENA BAIBÉL (BSI)

Aid Aman Legange

¹ Supak bíro kídía, ngo nolum aid aman legangem kénsuyépe emla míídung.

² Noluke mipakpe idungem kape pakmala nolum are kamana mimang kumsu kolo yényok boto, dem nolu kénsudupe.

³ Delokke legape ngo nolum podung, Shédíke Aidlok, pona amide edílokom “Jisume pémayé” delokke Deena Aid made sékokom “Jisu bí Ruutume” emmaruyé.

⁴ Amande angu angudung idakkom Aid atel lokke.

⁵ Igule angu angudung, idakkom Ruutum atele.

⁶ Agér iname angu angudung idakkom Shédí atel takam amilo, takam kelo agér gérdung.

⁷ Supak mipillo Aidem melíktung, de takam legapemin.

⁸ Ayokonem Aidlok dooying pojibona gyanem, míngkengem bitung, akonem Aidlok kénnamem bitung.

⁹ Aid atelde akonem míngkengem, akonem ipí nana amanem Aid atel delok bitung.

¹⁰ Akonlo irisinyo pauarem, akonlo polupoor bola nanem, akonlo angu angu aidem kangkén nana ralnamem, akonlo angu angu tatkí manam agom pola nana ayuem delokke akonlo lumík biku nana ayuem bitung.

¹¹ Si takam si atel lokke agére delokke Aid atele, delokke bí mipilem bíkke míínampe bidung.

Amíl Atele Taronge Deddíko

¹² Amíl si ole angu angu idakkom, abung atele; delokke sokke ole bojé dungkom, bulu amíl atelkope idung. Deke kísape Kristokíng kom idung.

¹³ Legade idung, Judai dokom Grik dokom, abíl dokom, ruutum dokom, ngolu Aid atel lokke amíl atelpe idope emla baptis isutubong delokke ngolum takam Aid atelem tííbo suyépe emla bitung.

¹⁴ Supak amíl si ole atelsok píname idakkom bosi borang dumsuemin.

¹⁵ Alede, “Ngo alag mapía, ngo amíl sokkemang” emmílo delok legalok bí amíl sokke olekonpe iyimayé emmang.

¹⁶ Delokke nyorunge “Ngo amig mapía, ngo amíl sokke ole kumang” emmílo delok lega delok bí amíl sokke olekonpe iyimayé empenam kamang.

¹⁷ Tabung amílsi amig kope iduamílo ingkolok tatnane dooyé kuane? Amíl tabusi nyorung atelkope iduamílo ingkolok aríem namkén nadokuan?

¹⁸ Idakkom Shédí bí arorupe amíl ole takamem idumsula amíl atelkope pítung, ole mipíem bíkke míngkam pakpe pítung.

¹⁹ Bulu takamde angu eelensupe iyamílo ingkolodí amíle iyane?

²⁰ Amíl ole si deddíne idokom tabude atele.

²¹ Amigde alagem, “Ngo nom míímang!” emmang. Delokke dumpode alem “Ngo nom míímang!” emmang.

²² Dempenem, amíl lokke ansoo yalumpe kaanam olesi duupe runeke,

²³ delokke amíl sokke remíkna olem ansoope míínamem ngolu edííyape inadung. Delokke amíl sokke lengkan sulamanam olem ngolu edííyape inadung,

²⁴ dekepe idola ngoluke kaapasunam ole kídísim dekepe ipenam kamang. Idakkom Shédí bí amíl sokke remík yana ole kídíem idum sutung delokke pííramna ole kídíem edííyape inadope bitung,

²⁵ dekepe iname amíl atello apé aré ibosumape idakla sokke ole mipíe akone akonem akampe míngge bosudope emla inamko.

²⁶ Olekone kimílo ole mipíe kimín gedo; olekonem mínggemílo ole mipíe ashémíndo.

²⁷ Supak nolu Kristoke amíl atele, delokke mipile bíkke amíl lokke olesue.

²⁸ Delokke mondolilo luyém Shédí bí kerayalumpe takam tomlíknam kídíem, annyinape, deena kotokiem, angumnape, poyil luyilbona kídíem, melíkto, delokrongem irisinyo ina kídíem, kumpí ipína kídíem, igul miríína kídíem, igebopena kídíem delokke ayolok angu angu mibo agom popena kídíem bito.

²⁹ Takamde tomlík namía? Takamde deena kotokia? Tabude luyil poyil bonía? Takamde irisinyo agérem idunía?

³⁰ Tabude kumpí ipí nana aman paatunía? Takamde tatkí manam agom poladunía?

³¹ Idakkom botteyana amanem mííbodung Delokke supak ngo bedum yalum agomem lengkanyé.