1 JOAN 1 - DEENA BAIBÉL (BSI)

¹ Lendak delokai duuna, ngoluke tattonam, ngoluke agí amiglok kaasunam, kaala ngoluke alaglok uktet sunam sim delokke turmona Agom sim ngolu pogoodung.

² Turname aato, ngolu kaasuto, delokrongem Abulokke ngolukíng aana duuyarna turnamem ngolu nolukíng pogoo bodung.

³ Nolute ngolukíng angoope idokupe nolukelo ngoluke kaanam kénnam sim ngolu pokan bidungku. Delokrongem ngoluke leko bosunamde Abu kílang delokke Jisu Kristokíng iyéku.

⁴ Ngoluke ashénge apíídope emlamin ngo sim atdune.

Shédí Bí Angune

⁵ Bíkkelo tatnamem ngoluke nolu kíng pokan binam kobore simino; depe emnamde Shédí bí angune; bíkkíng kaamo kamaberok.

⁶ Ngolu bím angong ngoobo sudung emdula kaamolo yédumílo, ngolu medung, delokke arolok yémang.

⁷ Idakkom bí angunlo yédunade emla ngolu angunlo yémílo, ngoluke aralo leko bosudung, delokke bíkke Oo Jisuke iyyie ngolum paab takam lokke deemoyéku.

⁸ Ngolu paab kamang emsu dumílo, ngolu agísuem yadsudung delokke arode ngolukelo kamang.

⁹ Idola ngoluke paabem ponkan sumílo bí ngoluke paabem maab biyéku, delokke deemang aamo takam lokke ngolum arbínyéku, kapeila bí míídíínam arolo yéne.

¹⁰ Ngolu paab imang emsu dumílo, ngolu bím yadnape imodung delokke bík agome ngoluke yénamlo duupeko kamang.