Zẹkaraya 4 - Ạḍinya Iigbia

Ịmiin dị egbolomaam ọmeremiom ọtozi

¹ Ọokpaany phọ ọpo rạkaaphan ghan bọ rꞌạmi ạḅile ni aru kụ uuzigh ịmi mụdiadi mị ụnaani ghan ni.

² Kụ ọdi apuru mọ, “Ẹphen nạ rạmiin bọ eeghe?” Kụ mị ạphagharanaan mọ, “Ọmeremiom ọtozi dị oḍighinom gol. Ẹpe ạnyu phọ oseere ẹkpa ọlogh ghan ạmunum mọ. Sịphe ạnyu ọmeremiom mọ ọḅam oḍual ịtozi kụ tọrotoro ọtozi ạmoogh oḍual ariisi ọlogh iḍigh ọtozi.

³ Ịyal ireeny ọliv edi ni ọgbal ọmeremiom ọtozi phọ, oniin odi ọogaany phọ ọphon, oniin odi ọphori phọ ọogaany phọ.”

⁴ Kụ mị agbi opuru ọokpaany phọ mọ, “Oye phọ, eeghe kụ ẹmhu ạraraar phọ ịphen?”

⁵ Ọdi upuru ịmi, “Nạ ólhegheri ḍụghum?” Kụ mị ạphagharanaan mọ, “Eeye, oye phọ. Mị úlegheri.”

^10b Kụ ọokpaany phọ ụḅeni ịmi mọ, “Oḍual phọ ịtozi phọ, pọ oḍual ariḍien Ọmoogh-we phọ, ịpe rẹmiin ghan bọ oomo aḅirini phọ.”

¹¹ Kụ mị agbi opuru ọdi mọ, “Ịyal phọ ireeny ọliv phọ ediighi bọ ọogaany ọmeremiom ọtozi phọ ẹmeera eeghia?

¹² Ḅịle kẹn, eeghia kụ ẹmhu ịyal ịla ọliv phọ etuman bọ ịyal ariiphiim mọ oḍighinom bọ gol phọ sịphe ạmunum-ọliv phọ akiton bọ kụ razuughian ghan bọ?”

¹³ Ọdi upuru ịmi, “Nạ ólhegheri ḍụghum?” Kụ mị ạphagharanaan mọ, “Eeye, oye phọ. Mị úlegheri.”

¹⁴ Pọ kụ amem dị ọdi ạḅem mọ, “Bụen kụ ịyal awe phọ Ẹnaan mẹsaḅar bọ ẹḅile ẹsagharan elo mọ okumu nyịno Ọmoogh-we oomo aḅirini phọ.”

Ịpe Ẹnaan eguanaan bọ ọngo ạZerubabel

⁶ Ọokpaany phọ ụḅeni ni ịmi mọ ọḅeni ạZerubabel dom Ọmoogh-we phọ ạḍien: “Ọkpar opu dị nạ kạmoogh kạ́ḍua esi ịikpo awe ẹgham mꞌesi ịnyaam ạna kụ ọlo kạḍua esi uwaloor ạmi kụ atu.

⁷ Ghạlamo aruuḅurom dị eleeny ịdipho ạraaḅaraph kepeeghu ni egbodo ạna. Nạ kạḅile ni ạlogh Otu Ịiḅereghi phọ, kụ mem mọ ọpo nạ kạḅiir bọ asiemi, awe phọ kọlooghi ni kụ ọḅem mọ, ‘Ạnighe ni o, ạnighe ni o.’”

⁸ Ạḍinon adom ịḍua ni esi Ọmoogh-we phọ ịteeny ịmi.

⁹ Ọdi ạḅem mọ, “ẠZerubabel maphighi ephighiom Otu Ịiḅereghi phọ, kụ ọdi kạlogh ni otu phọ ạmadan. Mem dị ịphen phọ emite, awe phọ ạmi kolegheri ni mọ mị phọ ni kụ urom bọ nyịna ọghi ọteeny ạbidi.

^10a Iloghi ạbidi ị́ḅaal loor esi dị oḍighi phọ ráagborion. Kụ ọlo bịdi kọmiin ni dị ạZerubabel ạlogh Otu Ịiḅereghi phọ rạkiom, kụ iloghi ạbidi ẹḅaal.”