Zẹkaraya 3 - Ạḍinya Iigbia

Ịmiin dị egbolomaam ogbogh oyil ạrikia phọ

¹ Esi ịnon ịmiin Ọmoogh-we phọ uḍeenaan ni ịmi Josua ogbogh oyil ạrikia phọ dị ạmeera risigh ọokpaany Ọmoogh-we phọ. Ḅịle kẹn sịphe ạḍiagaany phọ aJosua Setan phọ ẹmeera, eekolobian ọgba ịkaraph oye phọ omitiom.

² Ọokpaany Ọmoogh-we phọ ạḅeni Setan phọ mọ, “Ọmoogh-we phọ asoph ọoruen aphume nyịna, Setan! Ọmoogh-we phọ ọpo ạphomoghian bọ Jeruselem asoph ooruen aphume nyịna! Oye phọ ọphon ạkigh ḍịpe dị ogboton egu ạnian.”

³ AJosua ạmeera ni sịphe phọ; ạkpologhian rụsuoma dị eḍigh ẹenir iboom.

⁴ Ọokpaany phọ ạḅeni butelhedom ọdi mọ, “Ịkporion rụsuoma ẹenir phọ oye phọ ọphon ạkpologhian bọ.” Kụ ọdi agbi ọḅeni aJosua, “Mị mạsighe ịkaraph phọ ạna kụ mị kạngo nyịna imoom ạrusuoma ọkpologhian.”

⁵ Kụ ọdi ạto ạḅeni butelhedom mọ ọdi mọ ọsighe eghoony lọ ẹenir íḍigh ozu ẹmhu aJosua. Bịdi ọtuugh ịduon phọ oḍighi, kụ ogbi ọsighe imoom ạrusuoma phọ ọkpologhi ọdi sịphe ọokpaany Ọmoogh-we phọ ạmeera bọ ni.

⁶ Kụ ọokpaany phọ agbi ọḅeni aJosua mọ

⁷ Ọmoogh-we Oomo Ịikpo phọ mạḅem: “Eḍighi ịyaar lọ nạ ạnaghanan ni iilogh phọ ạmi kụ ạḅile ạtuugh aḍighi iiḍighi lọ mị ạngo nyịna, pọ nạ kaḍiemiom ni ophogh Otu Ịiḅereghi phọ ạmi ạkiom ghisigh, ḅịle kẹn mị kạnaghan ghan ni ịiḅereghi ạna ịdipho mị rạnaghan ghan bọ ịiḅereghi ạruukpaany phọ ạbuphe odi ghan bọ egbodo phọ ạmi.

⁸ Ler rụru nụun, Josua nạ phọ aḍighi bọ ogbogh oyil ạrikia phọ; ḅịle kẹn, iler rụru, nyina phọ ạbueri phọ ariil ạrikia phọ ọdi, nyina phọ eḍighi bọ eḍeenaan igey dị edi risigh: mị kagananami ni otelhedom mọ ạmi ọpo oghol bọ mọ Ọla Phọ.

⁹ Mị raseere risigh aJosua ḍiniin aḍighiigh dị ẹmoogh oḍual ạsiagaany. Mị kạpogho ịge loor aḍighiigh phọ, kụ ḍiniin aḍio bịn mị kạsighe ịkaraph ade phọ aḍien ạḍuanam.

¹⁰ Mem dị aḍio phọ ạḍiphe ketu bọ, tọrotoro ọnyo anyina kạmagh ni matuman ọdi mọ aru ạghelom ẹepho rꞌạdol-ẹereegh esi dị ireeny avain rꞌaruman kụ eghoonyom.”