Zẹkaraya 13 - Ạḍinya Iigbia

¹ Ọmoogh-we Oomo Ịikpo phọ ạḅem mọ, “Mem dị amem mọ kẹteeny bọ, kọkoghoron ni okol ạmuum dị kaselemi ẹemara ẹemara phọ aDevid rꞌawe phọ aJeruselem esi ịkaraph phọ rꞌọoḅereghi aruru phọ ạbidi.

² Mem mọ ạmuphe phọ mị kạsighiogh ni siḍien aruru phọ sịphe ade phọ, bịn oye kạ́atughian mun bịdi. Mị kapiemi ni tọrotoro oye lọ ạḅem mọ ọno oyil, ḅịle kẹn mị kạsighe sịphe aloor phọ ạbidi ẹephua ọoḅereghi aruru.

³ Kụ eḍighi ịyaar dị oye ạkananaam mọ ọno kạmiin ịmiin, pọ ọde phọ rꞌonhiin phọ ọdi kọḅeni ni nyọdi mọ kokiigh ni nyọdi, loor esi dị ọdi maghophora rạḅem ghan mọ ọno rạkaaph ghan ikpo ọnhu Ọmoogh-we phọ, kụ ạri ọdi rạgba ghan ọkpe. Mem dị ọdi ạmiin ịmiin, ọde phọ rꞌonhiin phọ ọdi kọsighe ni ọsoph otoph nyọdi okiigh.

⁴ Mem mọ amem mọ kẹteeny bọ, oyil kạ́tol mun dị kaabagaam ịmiin phọ ọdi, mụghumo kẹn oḅo ịlo ariil, mụghumo kẹn ọkpologhian ạsuoma ariil lọ aakpurughan ọsighe ookeleghiom awe.

⁵ Kpạripe ghụn, oye phọ kạḅem mọ, ‘Mị kóyil Ẹnaan. Mị oḅephom ozo — mị raḅeph ghan iizo oomo aghuḍum mọ ạmi.’

⁶ Kụ eḍighi ịyaar dị oye apuru nyọdi mọ, ‘Ạrelem mọ ịpe edi bọ ekpologhi phọ ạna eeghe?’ ọdi kạpagharanaan mọ, ‘Mị ụmoogh rẹlem mọ ịphen phọ ẹpe kꞌọyaghiri ạmi.’”

Ịto mọ oghiigh okoriom iyool-ịga phọ kꞌẸnaan

⁷ Ọmoogh-we Oomo Ịikpo phọ ạḅem mọ, “Elhool ẹgham, ḅetenu azuom ẹgham okoriom iyool-ịga phọ ọpo ruḍighinaan bọ ịmi oḍighi phọ! Kiigh nyọdi bịn iyool-ịga phọ kẹwalala ni. Mị kazuom ni ẹgham weye phọ ạmi

⁸ kụ sịen ade phọ, odi weye phọ ạmi ịraar abin, ịyal abin esi ịraar phọ komugh ni.

⁹ Ḅịle kẹn, mị kạdegh ni apogh bin phọ ạmuphe asugha bọ kụ mị aselemi bịdi ịdipho rọsighe ghan bọ nịan koselemiom silva. Mị kạkar ri apogh bịdi ịdipho ropogh ghan bọ gol. Kụ bịdi ogbi ọoḅereghi ghan ọngo ạmi, kụ mị kạpagharanaan ghan ni bịdi. Mị kạḅeni ni bịdi mọ bịdi awe ạmi ni, ḅịle kẹn bịdi kọkaaph ghan ni omitiom mọ mị kụ Ẹnaan phọ ạbidi.”