Zẹkaraya 10 - Ạḍinya Iigbia

Ọmoogh-we phọ aguanaan pẹleeny

¹ Ịlom Ọmoogh-we phọ ọdi ạngo ọlophia osoor phọ. Ọmoogh-we phọ kụ rạngo ghan omuuria rꞌọlophia kụ iizo ạtorotoro oye kegbi oḍum.

² Awe rọki ghan idike esi ịkaaghineen ạraraar ḅịle rꞌesi ạpiiph-pịiph, kụ ọlo ọphagharanaan dị bịdi rọmoogh ghan eḍighi ọkpe dị ụ́moogh ịyaar oḍighinom. Buniin rọgba ghan mạlha lọ oye ạmalha, kụ ọlo riikeleghi ghan ni inyina bịn; ịidereghi phọ bịdi rọngo ghan bọ ị́moogh ịyaar oḍighinom. Kụ iḍighi kụ awe phọ royeela ghan bọ mụdi iyool-ịga dị mephe. Bịdi odi esi ịiḅaghami ịdi eḍighi bọ bịdi ụ́moogh oḍiemiom.

³ Ọmoogh-we phọ ạḅem mọ, “Mị rạkagham ni ologhi ruuruen phọ ọda bọ weye phọ ạmi, kụ mị kạliom bịdi. Awe phọ aJuda ạbuo ạmi, kụ mị Ọmoogh-we Oomo Ịikpo phọ kạmaar ri apogh bịdi. Bịdi koḍighi rụsu ịikpo ẹgham mọ ạmi.

⁴ Sịphe igbo phọ ạbidi awe komite ni dị koḍighi bụo ịtooghi rꞌabuḍiemiom ḅịle rꞌaruwo ẹmhu ẹgham dị kọda weye phọ ạmi.

⁵ Awe phọ aJuda kọmoogh ni ọkpar opu ịdipho awe ẹgham dị ọozeghi ẹpomoghian phọ ạbidi ọloghoḍi ọposo sịphe areten phọ. Bịdi kobe ni loor esi dị Ọmoogh-we phọ odi ni rꞌạbidi, kụ bịdi kọkpar ri opu ghạlamo ẹpomoghian phọ ạbuphe oḍiku bọ ạsu phọ.

⁶ “Mị kạkparami ni weye phọ aJuda; Mị kạtagharan ni weye phọ Ịzirel. Mị kạmoogh ni ọnma ighirigiir esi ạbidi kụ mị ạsighe oomo phọ ạbidi aḅulemi ologhi otu. Kẹḅile ẹtol mụdi mị kőghel ghan bịdi rꞌamem. Mị kụ Ọmoogh-we Ẹnaan phọ ạbidi; mị kạpagharanaan ghan ni ịiḅereghi ạbidi.

⁷ Awe phọ Ịzirel kọmoogh ịikpo ịdipho awe ẹgham, kụ iloghi ẹḅaal ịdipho awe lọ rọpughol miim. Ẹemara ẹemara ạbidi kọotughian ghan ni ọkpar opu phọ ọphon kụ iloghi ẹḅaal ghan loor esi ịphen Ọmoogh-we phọ maḍighi bọ.

⁸ “Mị kạmagh ni weye phọ ạmi kụ aakpomoghi. Mị kạtagharan ni bịdi kụ mị aḍighi ịdi bịdi koḍiza ịdipho ọrol ghan bọ.

⁹ Ghạlamo ịduon mị mạwalalami bọ ni bịdi igbo areelhe phọ, bịn bịdi kụutughian ghan ni ịmi ẹpe egher ekpisi phọ. Bịdi rꞌạnmuny ạbidi kokpetenaan ni kụ ọḅophoghan otigheel otu.

¹⁰ Mị kạsighe ni bịdi ẹpe Ijipt rꞌAsiria kụ mị atighelom bịdi otu kụ mị aḍighi ịdi bịdi kọtol sịphe eelhe phọ ạbidi. Mị kạtolomi bịdi ẹpe Gịliad ḅịle rꞌạLebanon; Awe kụ komuza oomo phọ ade phọ.

¹¹ Mem lọ bịdi roten ogbo ọphiiny ịiḅaghami phọ ạbidi, Mị Ọmoogh-we phọ kạgur ri oologh phọ, kụ ude Ọphiiny aNail ạkaraghar. Asiria phọ aphoophe bọ loor phọ kasoorom kụ Ijipt phọ aḍighi bọ ophelegbe phọ kạ́moogh mun ịikpo.

¹² Mị kạkparami ni weye phọ ạmi; bịdi kọoḅereghi ọḅile ụnaghanan ịmi.” Ọmoogh-we phọ kụ mạḅem.