Zẹfanaya 3 - Ạḍinya Iigbia

Ịkaraph aJeruselem rꞌọtagharan phọ

¹ AJeruselem maphe, ẹmha ạḍikaraph ạdol rꞌọḅaar ẹmhu rꞌọkpiloghom ghan aweye ạbidi.

² Ọdi kọ̋naghanan Ọmoogh-we phọ, ḅịle kőmeeraam mạlhiom. Ọdi kọ̋kpasi oḍuom ologhi ọdi esi Ọmoogh-we phọ, kọ̋lhom ọdi ọloghonaan ạḍighaagh.

³ Awe iiḍighi ọdi ọkigh ạnam-dịka dị remeephaghuan, abuugboom ịiruen phọ ọdi ọkigh ilhom ịnam dị ọkoony rasiph, esiphom dị kótue osugheeny rꞌọḅarara tụtu ẹteeny ḍịroor.

⁴ Ariil phọ ụ́logha siloor eegu kụ ọpomoghian iigbegheḍiom; ariil ạrikia phọ rọopu ghan ịyaar lọ eḍighi ẹlo iigbia, kụ okiton ologh phọ Ẹnaan otene ịlo ạsuo ạbidi.

⁵ Kụ ọlo Ọmoogh-we phọ odi ni sịphe ẹmha phọ; ọdi raḍighi ghan ni ịlo ẹnighe, kị́lo eeph. Tọrobo ạḍiroor ọdi rạ́piom ghan, ọdi rạngo ghan iiḅi ịiruen weye ọdi. Kụ ghạlamo rꞌịduon phọ, awe ạsipioghom lọ odi roḍighi ni ịkaraph phọ kụ umugholoor ósiph.

⁶ Ọmoogh-we phọ ạḅem mọ, “Mị maphiemi ikpom areelhe; mị maagulemi rạmha phọ ạbidi kụ iikpe aruutu eedanien phọ ạbidi meegulaan. Rạmha phọ awe mosumughu; areten ogbo ẹmha phọ mepokoro — rꞌoye ósugha.

⁷ Mị ugbi mọ mem mọ ọpo phọ awe phọ ạmi kụlogh ni ịmi eegu kụ omeeraam mem lọ mị aalemi ọpioman ạbidi, ḅịle mọ bịdi kóbula ịtughemi lọ mị ạtughemi. Kụ íbia bịn bịdi mọḅile ọtol ịdipho ọrol bọ kꞌemiighom mọ.

⁸ “Ikori kụ,” Ọmoogh-we phọ ạḅem, “Ikori ḍio phọ mị kaḅetenu bọ ọkpalham areelhe phọ. Mị mạnya ookpomoghi areelhe rꞌạramar kịrokiro, ọbo bịdi ologhoma ịdi ạnian ophin ologhi phọ ạmi ạrol. Oomo ade phọ kopiemiom nịan ophin ologhi ạmi.

⁹ “Kụ mị kanme weye areelhe phọ, kụ bịdi ụuḅereghi ghan ịmi bịn, kị́non ạrumugh. Oomo ạbidi kụnaghanan ghan ịmi.

¹⁰ Ghạlamo kꞌẹpe ịikela arikpisi Ẹtiopia awe ạmi ọwalala bọ kụngo ghan ịmi ruunmo.

¹¹ Mem mọ ọpo, nyina awe phọ ạmi kẹ́moogh mun umugholoor mọ nyina ẹḅaar ẹmhu esi ạmi. Mị kạgbole tọrobo oye lọ aphoophe loor rꞌeboom ekpom, kụ nyina kẹ́ḅaar mun ẹmhu esi ạmi ạnyu eegbolom iigbia phọ ạmi.

¹² Mị kaseere sịphe we lọ osooromi loor kụ ọmoogh ẹepho, bụdi kotu esi ạmi ọwa ạpeleeny.

¹³ Awe Ịzirel lọ osugha kọ́pioman mun esi oye, ọkpe kọ́gba, ḅịle oye kóokeleghi. Bịdi kọmoogh ẹelha kụ ịyaar kẹ́ḅogh, oye kókiilaan.”

Ạḍuor iboh

¹⁴ Ịmoor sụor, ẹlo rꞌọḅaal ologhi, weye Ịzirel! Ịmoogh iboh rꞌoomo ologhi anyina, ẹmha aJeruselem!

¹⁵ Ọmoogh-we phọ makunughi ọliom anyina; Ọdi mạgbole oomo ạbumulogh-ḍien anyina. Ọmoogh-we phọ, ọdaam mọ Ịzirel, odianan rꞌanyina; Ịyaar ọtuan kụ oghiilaan ílho mun.

¹⁶ Amem mọ retu ni dị bịdi kọḅeni Jeruselem mọ, “Kékiilaan, ẹmha phọ ạZayon! Kémeera ạraghaagh anyina edugh!

¹⁷ Ẹnaan phọ anyina, Ọmoogh-we phọ odianan rꞌanyina; ịikpo phọ ọdi kụ rịngo inyina ọkpar-opu. Ọmoogh-we phọ kạmoogh ni ḍịḅeeraan esi anyina, kụ esi ẹphomoghian ọdi kụ ẹdi ọdi kịngo inyina kumoom aghuḍum. Ọdi kạmoor sụor kụ ạmoogh iboh esi anyina

¹⁸ rꞌibo ịdipho awe dị role ẹyaal.” Ọmoogh-we phọ ạḅem mọ, “Mị makunughi ịpaaran ịiḅaghami ạḅile ạsighe umugholoor esi anyina.

¹⁹ Amem mọ retu ni! Mị kạliom bụlo rịkpiloghom inyina; Mị kạtagharan oomo ạbuo ạraagha kụ mị ạsighe bụphe ọrol bọ iiruen arikpisi phọ atighelom. Mị kakiton umugholoor ạbidi eḍighi rughuenian, kụ oomo aḅirini phọ oboom bịdi.

²⁰ Amem mọ retu ni! Mị kạsighe weye phọ anyina ọwalala bọ atighelom; Mị kaḍighi ịdi nyina kemitiom ḍien oomo aḅirini phọ kụ ạḅile kẹn iḍume inyina.” Ọmoogh-we phọ kụ mạḅem.