Tạitos 3 - Ạḍinya Iigbia

Ạroozo dị ẹkpianaan weye Ẹnaan

¹ Kịom ologhi we phọ ạna mọ bịdi osooromi ghan loor esi ạbudaam rꞌạbuo ịtooghi, ọnaghanan ghan bịdi, kụ ọḅile ookolobian ghan oḍighi igey tọrobo areten.

² Ḅẹni bịdi mọ kụ́kaaphaan ghan oye ịkaraph, ịtolom ghan ẹepho rꞌẹphomoghian, kụ ọḅile oḍeenaan ghan ọbolobolo ologhi esi oomo awe,

³ ịdi eḍighi bọ mem dị eten yira rꞌaloor ayira ụrol ghan ni dọl elegheri ịyaar rꞌẹnaghanan rꞌẹkaraph eḍighinom ịyaar. Yira uḍighi ni rẹbene ọngo ịkaraph ạruuphua rꞌẹedugha kịrokiro. Yira uphiemi ni ghuḍum mọ ayira ọrol ghan dọl ịghughian rꞌiloghi ẹḍim. Bụnon awe ụlogh ni iyira ḍien kụ yira ụlogh aani ni bịdi.

⁴ Kụ mem mọ Ẹnaan Ọpelia phọ ayira egananami bọ ọnma ighirigiir rꞌẹphomoghian phọ ọdi, ọdi ụphel li iyira.

⁵ Ọ́tuan iiḅi iiḍighi dị yira rꞌaloor oḍighi yogh, ạtuan ghụn ọnma ighirigiir phọ ọdi kụ ụphel bọ iyira, loor esi ạmuum mọ uwur bọ iyira ootolom ịkaraph phọ, rꞌemoom ẹmaram rꞌakumoom aghuḍum mọ Uwaloor Iigbia phọ rụngo ghan bọ iyira.

⁶ Ẹnaan ighol ẹmhu ạJizos Kraist Ọpelia phọ ayira, kụ imuzeḍinaan iyira ooḅi Uwaloor Iigbia phọ,

⁷ ọbo ẹtuan ọnma ighirigiir phọ ọdi ẹsighe mọ yira awe aruukuan ni, mọ ophin aani bin aghuḍum kꞌagee-pọ phọ yira oḍuom bọ ologhi phọ.

⁸ Ọphon phọ ogey ọghaaph ni. Mị rạwa ni mọ kạaph ni rạraar phọ ịphen ạkpaariom, pịdi bụphe omeeraam bọ Ẹnaan ozuumaam iiḅi iiḍighi phọ oḍighi ghan. Ịphen phọ ẹnighe ni, ẹḅile kẹn ni ẹmoogh ịyaar oḍighinom esi awe.

⁹ Kụ ọlo kạ́logh ḍịghaagh ạna esi ịnonuan elologhi, rꞌọodoony oḍigh ạburude ạburude, ịruonu, rꞌịigbaghanaan ịlo Ologh phọ aMozis. Ịphen phọ oopho ni bịn, sụo ị́moogh.

¹⁰ Pụr ghan ni rụru amuneni ịyal amem we lọ rọkom ghan ịlo ọgbaragbarami awe phọ, kụ agbi omutonaan ạbidi.

¹¹ Nạ alegheri ni mọ ọdo phọ awe phọ ạbuen mọphuughi, kụ ịkaraph phọ ạbidi ẹgba ni emitiom mọ bịdi mọpioghom ni.

Oroma okureriom

¹² Mem lọ mị arom Ạtemas mꞌạTikikos oru ọteeny ạna, ụ́bile ghan oru ạNikopolis ọteeny ạmi, ịdi eḍighi bọ mị maguan ọrol ẹpe rụnwanyu unu phọ.

¹³ Ụ́bile ghan ọloghonaan ạḍighaagh Zenas ọgbaam iilogh phọ, rꞌẠpolos, ịlo bịdi komiigh erelhe phọ ạbidi, ạḅile aḍighi ịdi ịyaar bịdi kékuom.

¹⁴ Tụghemi we phọ ayira mọ ọmaar ọkuom mem mọ ạbidi oḍighi yogh ghan iiḅi iiḍighi, pịdi ọloghonaan ghan ḍịghaagh bụlo ẹkaraghi ekuom. Bịdi kụ́tol ḍighiil ạdol.

¹⁵ Oomo phọ ạbuphe rꞌạmi odi bọ ẹphen mopuru nyịna. Upurunaan iyoor iiḅi asiya phọ ayira esi omeeraam mọ. Ooḅi ọghor phọ kꞌẸnaan ịrolonaan inyina!