Tạitos 2 - Ạḍinya Iigbia

Igey ịtughemi

¹ Kụ ọlo nạ ạmoogh ọtughemi ịpe ẹḅophan bọ rꞌigey ịtughemi phọ.

² Ḅẹni ikumoor awe phọ mọ bịdi ọmoogh eeḅi ẹzo, ọmoogh olegheri ịyaar, ooko siloor ạbidi, ọmoogh ogey ọkuakua omeeraam rꞌẹphomoghian rꞌọkparam.

³ Tụugh igina phọ ịphen phọ kẹn kụ ạḅeni ikumoor ạnmariir phọ mọ bịdi ọrol dọl phọ ạḍiphe ẹkpianaan bọ dị ạnmariir aruukuan kọrol. Bịdi kụ́pue ghan ḍien oye, ḅịle kẹn kúḍighi rẹbene amiim. Bịdi ọtughemi ghan ịpe ẹnighe bọ,

⁴ ọbo arisina phọ ọtuughaany bịdi ọphomoghian burulhom mọ rꞌạnmuny phọ ạbidi,

⁵ ooko ghan siloor ạbidi, ọmoogh ọser-sẹr ologhi, oḍighi bugey ạnmariir ilom, dị kosooromi ghan siloor esi aburulhom ạbidi, ọbo oye kạgba ghan bọ ịkaraph ạḅam ẹmhu ọghaaph phọ Ẹnaan!

⁶ Tụugh igina phọ ịphen phọ kẹn kụ ạḅeni ạkpaariom ugheel ạnmuny phọ mọ bịdi ooko ghan loor ạbidi.

⁷ Nạ rꞌaloor ạna, esi oomo areten ḍighi ni oye dị ạbunon awe kọtuughaany iiḅi iiḍighi phọ ạna. Kạ́amo ghan ọghaaph. Gbononomi ghan ạḅile ạmanami ịyaar esi ịtughemi phọ.

⁸ Kạaph ghan igey ikpo ọnhu dị kọ́ḍagha, ọbo umugholoor asiph bụmulogh-ḍien phọ ạna, loor esi dị bịdi ụ́moogh ịkaraph ịlo ayira, dị kọkaaph.

⁹ Ḅẹni rẹbene phọ mọ bịdi osooromi ghan siloor ọngo bụrude-otu phọ ạbidi, ọḅile oḍighi ghan ịlo kẹḅeeraan bịdi. Bịdi kụ́gbagharan ghan ịlo ọḅeni bịdi,

¹⁰ ḅịle kẹn ịsum kụ́sum ghan. Oḍeenaan ghan ghụn mọ bụno abugey awe ni dị ọkpe ni oḍuom ologhi, ọbo oomo phọ ịpe bịdi koḍighi bọ ẹlogh ọman ịtughemi Ẹnaan Ọpelia phọ ayira.

¹¹ Ịyaar phọ eḍighi bọ, Ẹnaan megananami ooḅi ọghor phọ ọdi ọphelom oomo awe.

¹² Ọdi rụtughemi ghan iyira mọ ọwile dọl dị Ẹnaan úlegheri rꞌạruuphua aḅirini phọ, ọrol sịen aḅirini phọ dọl osereghian, ooko loor ayira. Oseleman, olegheri Ẹnaan,

¹³ kụ okoriom ghan ḍio ọḅaal ologhi phọ ạḍiphe Egbogh Ẹnaan phọ rꞌạJizos Kraist Ọpelia phọ ayira kọpam bọ eegu phọ ạbidi omitiom oganana, ịdipho yira oḍuom bọ ologhi phọ.

¹⁴ Ọdi ạsighe loor ọdi aḍighinom ịyaar aghuḍum ọtagharanam ayira esi oomo ịkaraph, rꞌowophom ayira ọḅaalami, mọ oḍighi bụo ọno bịn, ọmoogh oophugh oḍighinom ghan iiḅi iiḍighi.

¹⁵ Tụghemi ghan rạraar phọ ịphen. Sịghe oomo ịikpo ịtooghi phọ ạna kụ ạkparamiom ghan iloghi awe phọ, ạḅile ạḅaaghiom ghan bụphe rọnaghan bọ ịpe nạ rạkaaph bọ. Rꞌoniin ọnyo ạbidi nyịna kúpogh usooromi.