Rut 4 - Ạḍinya Iigbia

ẠBoaz aphin Rut

¹ ẠBoaz ạghi ni sịphe rọpam ghan bọ rạghaaph phọ sịphe ọnhu-aḍibuo ẹmha phọ kụ ạrol ude. Kụ íbia bịn oyogo phọ ọpo ọnyo asiya phọ Ẹlimelek ọpo ạBoaz aghol ghan bọ aru, kụ ạBoaz ạmagh nyọdi mọ, “Yạghiri ạmi, tue ẹphen ạrol ude.” Kụ oye phọ ạghi ạrol ude.

² Kụ ạBoaz ạmagh ḍioph ikumoor awe ịsiphe ẹmha phọ ạrolomi aani kẹn ude. Mem dị awe phọ mọrologhu ude,

³ kụ ọdi ạḅeni ọnyo asiya phọ ọdi mọ, “Sịen aNaomi mạḍua bọ Mọab arigheel, ọdi rạwa aal ade phọ ạḍiphe Ẹlimelek ọnyo asiya phọ ayira ạmoogh bọ.

⁴ Kụ mị ragbiom ghan mọ nạ ạkpe ni olegheri. Kụ eḍighi ịyaar dị ẹḅeeraan ni nyịna ogho, pọ ko sịen awe phọ ạbuen odi aani bọ. Kụ eru mạar dị nyịna ị́ḅeeraan, pọ ḅẹm ni, loor esi dị ạraraar phọ ịphen phọ ẹpur esi nyịna kụ egbi ọteeny ạmi.” Kụ ọdi ạphagharanaan mọ, “Mị kako ni.”

⁵ Kụ ạBoaz ạḅeni oye phọ mọ, “Ẹnighe ni, kụ ọlo eḍighi ịyaar dị nạ rako de phọ ḍịghaagh aNaomi, pọ nạ rakoom kẹn ni Rut ekpukele ạnir ọlo ạMoab phọ pịdi ade phọ ẹtolonaan ọto kꞌoye phọ mamugh bọ.”

⁶ Kụ ọnyo asiya phọ ọdi ạḅem mọ, “Eḍighi ịdipho, pọ mị kạnyagharanaan ni riliom mọ ạmi. Mị káko de phọ, loor esi dị ịduon phọ rẹḅem ghan mọ ạnmuny ạmi kóle erua de phọ. Nạ ko, mị káko.”

⁷ Mem mọ ọpo ạbidi, eḍighi ịyaar dị oye rabool ịyaar ọdi, pọ uwo ịyaar phọ kạkporonaan owol okoro ọdi ạngo oye phọ ọpo rako bọ ịyaar phọ. Ẹphen kụ eḍighinom ịyaar aweye phọ Ịzirel dị eḍeenaan ghan mọ ọghaaph phọ mamuneen.

⁸ Kụ iḍighi kụ mem mọ oyogo phọ ọnyo asiya phọ ọdi ạḅeni bọ Bọaz mọ, “Nạ ko,” ọdi ạkpotonaan owol okoro ọdi ạngo Bọaz.

⁹ Kụ ạBoaz ạḅeni ikumoor awe rꞌoomo ạbueri phọ odi bọ pạ mọ, “Nyina ẹmeera enye rodon ẹmiin mọ mị magho ḍịghaagh aNaomi oomo ạraraar phọ Ẹlimelek rꞌạnmuny phọ ọdi Kilion rꞌaMalon.

¹⁰ Ḅịle kẹn, aRut ọnyani ọlo ạMoab phọ aMalon aphin ghan bọ maḍighi ạnir ạmi, ọbo aḍien ọpo mamugh bọ kepe ghan bọ sịphe abumor phọ ọdi rꞌaḍibuo otu phọ ọdi. Ịphen phọ kẹpamanam rạraar oye phọ mamugh bọ sịphe otu phọ ọdi, bịn eghunotu phọ ọdi képe sịen ẹmha phọ. Nyina mẹmeera enye rodon.”

¹¹ Kụ ikpolom awe phọ rꞌoomo phọ ạbueri phọ ọḅem mọ, “Ii, yoor ọmeera ni enye phọ. Ọmoogh-we phọ ạseph ạnir phọ ọphon ratigheel bọ kꞌạna ịdipho aRechel rꞌaLia, bụen phọ ọmaraghinaan bọ Jẹkob ịbadi ạnmuny! Nạ, ḍighi ni ogbogh oye sịen ọto phọ Ẹfrat, amitiom ḍien sịphe Bẹtilihem!

¹² Ạnmuny phọ Ọmoogh-we phọ kạngo bọ kụ ọnyani phọ ọphon ạmaranaan nyịna oḍighi ni ịdi eghunotu phọ ạna kẹkigh nyẹpe ạPerez ọony phọ aJuda rꞌạTamar!”

ẠBoaz rꞌẹemara ẹemara ọdi

¹³ Ẹpe kụ esi dị ạBoaz ạsighe Rut agheelom aḍighi ạnir ọdi. Kụ Ọmoogh-we phọ ạseph ni ọnyani phọ kụ ọdi aamor kụ ạmar olephiri.

¹⁴ Kụ ạnmariir phọ ọḅeni Naomi mọ, “Boom ni Ọmoogh-we phọ. Ọdi mạngo nyịna mọony-oko rodon dị kaphogh ghan nyịna. Aḍien ọony phọ ọphon eganana ni esi awe phọ Ịzirel!

¹⁵ Ạnir ọony phọ ạna ạphomoghian ni nyịna, kụ maḍighinaan nyịna rạraar dị epel oḍual ạnmuny. Kụ nyịidipho ọdi mạngo nyịna mọony-oko dị kạsighe kumoom aghuḍum aruomonaan nyịna mem lọ nạ mạkpo.”

¹⁶ Kụ aNaomi aḅeton mọony phọ aghuraam, aakonom.

¹⁷ Kụ ạnmariir phọ ạbuphe orugh bọ otuman bịdi oghol ọony phọ mọ Obed kụ bịdi ọḅeni tọrotoro oye mọ, “Mọmaranaan mọony aNaomi.” Obed kụ ạmar bọ Jẹsi, ọpo aḍighi bọ ọde phọ aDevid.

^18-22 Ẹphen kụ ẹemara ẹemara phọ emiigh Pẹrez kụ ẹteeny Devid: ạPerez, ạHezron, ạRam, Ạminadab, aNason, aSalmon, ạBoaz, Obed, ạJesi rꞌaDevid.