Ọtughemia Phọ 9 - Ạḍinya Iigbia

¹ Mị ụsighe mem ạkparami ạtuugha oomo ịphen phọ, ạmiin mọ Ẹnaan kụ rẹpamaghan ghan eḍighinom ạraraar awe, ghạlamo ẹphomoghian rꞌạḍikia ạbidi. Oye ólhegheri rꞌẹnum ịlo ạraraar dị edianaan nyọdi risigh.

² Ọgbaranaan ólho. Ḍiniin ạdol bịn kụ edianaan oye aruukuan rꞌoye ạsipioghom, mꞌogey mꞌọkaraph, mꞌạbuphe olegheri bọ Ẹnaan mꞌạbuphe óghel bọ nyọdi, mꞌạbulo rọpinyon rꞌạbulo rọ́pinyon rịkia. Ogey oye ọ́nighe opu oḍighinom ịkaraph; oye dị aghunyian ọ́nighe opu nyọpo úkunyian bọ.

³ Ḍiniin ạdol phọ kụ edianaan ni oomo phọ ạbidi, kụ ịphen phọ ebeeph ni ịdipho ạtorobo ịnon ạraraar dị remite ghan sịen aḅirini phọ. Ịdipho aghuḍum awe kạtol ghan bọ ni, ạsipioghom rꞌẹlaal kụ kemuza ghan ni iloghi ạbidi, kụ ekperenom bịn bịdi momugh.

⁴ Kụ ọlo tọrobo oye dị odi eye sịen aḅirini phọ ạmoogh ni oḍuom ologhi: aghoogh dị odi eye kụ apu ạnam-dịka dị mamugh.

⁵ Ii, bụphe ọdi bọ eye phọ olegheri mọ bụno komugh ni, kụ bụphe momugh bọ úlegheri mun ịyaar. Bịdi ụ́moogh mun sụo. Mowula bịdi bịn ọman.

⁶ Ẹphomoghian ạbidi, ạmulogh-ḍien ạbidi, ạruuphua ạbidi, oomo phọ ịne ẹdaph ni ḍuugh bịn. Bịdi ụ́moogh mun bin esi ịlo remite sịen aḅirini phọ.

⁷ Lọgh ni ẹmhu. Le eḍien ạna ạmoogh ọḅaal ologhi; ạphughol miim aafola ọghaaph. Oomo phọ ịdi esel li esi Ẹnaan.

⁸ Tọl ghan dọl ọḅaal ologhi rꞌọyigh oomo amem!

⁹ Tọlan igey ạnir phọ nạ ạphomoghian bọ sịen nạ odi ḍighiil oopho ạdol phọ Ẹnaan eseere bọ nyịna sịen aḅirini phọ. Kẹlom tọrobo aḍighiil oopho aḍio mem aghuḍum mọ ạna, loor esi dị ịpe bịn kụ ạsuo arukumuan dị nạ kạmoogh.

¹⁰ Kpạrami ḍịghaagh tọrobo ịyaar lọ nạ raḍighi, loor esi dị oḍighi omitiom kạ́tol, ịitughian kẹ́tol, olegheri-ịyaar kạ́tol, ologhi ólho ghan ẹpe ọmar iḍim — kụ ẹpe kụ ẹdi nạ rạki bọ.

¹¹ Ẹnon ịyaar dị mị ạatughian ịduon: mọ, sịen aḅirini phọ ọphon, awe dị oogborion eghiil kụ rọ́nuun ghan kosi, mọ awe dị ọkpo ekpeḍien kụ rọ́kpar ghan ẹgham, mọ awe dị ọsu ologhi rógbor ghan kogbo ḍigbo, awe dị ọkpianaan kụ rógbor ghan kọrologhu igbogh ariisi. Ẹkaraph elhor rẹtolonaan ghan ni oomo awe.

¹² Nạ ólhegheri mem mụo ạna dị retu. Ịdipho ịnun dị aḍiphil esiph ekperenom, ịdipho ina dị emeel ọseki, kụ ẹdi risiph ghan iyira ẹkaraph amem dị yira ologhi úseere.

Ịitughian ịlo olegheri ịyaar rꞌelologhi

¹³ Ẹnon ịyaar edi ni dị mị ạḅile ạmiin. Ịyaar phọ eḍeenaan ịdi awe rokuraam ghan olegheri ịyaar sịen aḅirini phọ.

¹⁴ Eniin ẹbam ẹmha ịrol li dị iikoma awe ọrol. Ọdaam dị ạmoogh ịikpo aru ni azuom ẹgham. Ọdi aaghironom ni ẹmha phọ we ọdi kụ ạnya olhereghi iikpe oghoony phọ.

¹⁵ Oniin uwekulom oye ạrol li dị ạmaar ikeḍi dị mụpelom ni ẹmha phọ, kụ oye nyọdi ọ́otughian.

¹⁶ Oomo amem mị rạḅem ghan ni mọ olegheri ịyaar kụ ạnighe apu ịnyaam, kụ ọlo awe rọ́otughian ghan uwekulom oye ghạlamo alegheri ni ịyaar ḅịle rọ́naghanan ghan ịlo ọdi ạḅem.

¹⁷ Ẹnighe ọnaghanan iiphola oye olegheri ịyaar epu imophoghuan ọdaam mọ esi ookpomoghan aruwelologhi.

¹⁸ Olegheri ịyaar kụ aḍighi igey ạraraar apu reenema, kụ oniin oḍighinom ịkaraph kạpue ni ịbadi igey ạraraar.