Ọtughemia Phọ 8 - Ạḍinya Iigbia

¹ Oye olegheri ịyaar, bịn kụ ạkar alegheri ẹmhu ạraraar. Olegheri ịyaar raḍighi ghan ịdi ọdi kạyigh, bin eghire mẹeḅua risigh ọdi.

Nạghanan ọdaam mọ

² Ḍighi ghan ịlo ọdaam mọ ạḅem, kụ káguan ghan iguegue aruguanaan ạngo Ẹnaan.

³ Ọdaam mọ raḍighi ghan ni ịlo ẹḅeeraan nyọdi; ḍụa egbodo ọdi; kạ́tol esi dị eḍighi ooto rꞌosooromineen.

⁴ Ọdaam mọ ạmoogh ni ịikpo, kụ oye ólho dị kạagbakian ịlo ọdi aḍighi.

⁵ Nạ ạdaph ghan ịto phọ ọdi, pọ ịyaar nyịna réḍighi, kụ oye olegheri ịyaar alegheri ni ịlo oḍighi rꞌamem lọ ẹkpe oḍighi.

⁶ Amem dị ẹkpe rꞌịdi ẹkpe oḍighi ạtorobo ịyaar edi ghan ni, kụ ọlo yira olegheri ẹnum bịn!

⁷ Rꞌoniin ọnyo ayira ólhegheri ịlo kemite, kụ oye ọḅeni ayira ólho.

⁸ Oye ólho dị kakpetenaan ḍuugh, ḅịle kaḅoton ḍio aḍuugh ọdi. Pọ kụ ẹgham dị yira kótue okpetenaan; eten oogbegheḍiom oḅugh kụ ọḍua ílho.

Ọkaraph oye phọ rꞌoye aruukuan phọ

⁹ Mị ụmiin ni oomo phọ ịphen mem dị mị ạatughian ịlo ạraraar dị roḍighi ghan sịen aḅirini phọ, aḅirini dị buniin ọmoogh ịikpo kụ bụnon kọmiinom ghan eeḍian ạbidi.

¹⁰ Ii, mị mạmiin ni ịkaraph awe dị oḍi ọloghoḍi iloghi iiḍi phọ ạbidi, kụ ọḍua ẹkaraph eḍum mọ rotigheel bịn awe ọseph bịdi sịphe ọkaraghi egbogh ẹmha phọ bịdi oḍighi yogh bọ ịkaraph phọ. Oopho ni bịn.

¹¹ Iḍighi ika kụ awe roogborion ghan bọ osereghi asighiton phọ? Ịdi eḍighi bọ rọ́nuun ghan kọlhiom ạkom-sereghi phọ.

¹² Eeni amem abuḍighinom ịkaraph kosoroghu ni oniin okuron iilogh bịn kụ odi ni eye. Ii, mị alegheri ni ịdi bịdi rọḅem ghan: “Eḍighi ịyaar dị nạ ạnaghanan Ẹnaan, pọ oomo ạraraar kẹnighe ni,

¹³ kụ ọlo kẹ́nighenaan ịkaraph awe. Aghuḍum ạbidi ạkigh oogho kụ bịdi komugh ni ẹpuuny loor esi dị bịdi ụ́naghanan Ẹnaan.”

¹⁴ Kụ kị́duon. Mịin ịpe remite bọ sịen aḅirini phọ: eeni amem awe aruukuan kụ rọmoogh ghan ghẹlhe abuḍighinom ịkaraph, kụ ịkaraph awe ọmoogh sụo awe aruukuan. Mị ạḅem mọ oopho ni bịn.

¹⁵ Esi ịduon phọ mị ạkar kụ ameeraam mọ ẹnighe ni dị oye kạkelom ghan ịlo ọdi ạmoogh, loor esi dị ẹnon ịyaar dị kẹḅaalami ologhi ọdi ílho emuton olhe ọphughol rꞌọḅaalami ologhi ọdi. Ịlo eḍighi eḍighi, ẹkpianaan nyọdi oḍighi ịphen phọ sịen phọ ọdi rakumuan bọ oomo amem mọ Ẹnaan kẹngo bọ nyọdi ọrol ịsien aḅirini phọ.

¹⁶ Ḍughul rꞌootaany mị ụrol ghan ẹ́naani kụ ạkururu ọmoogh olegheri ịyaar kụ ọtuugha ịpe remite bọ sịen aḅirini phọ,

¹⁷ kụ mị ạmiin mọ oye órue ọnaghanan ịlo Ẹnaan reḍighi. Tọrobo ịlo ọdi ạkparagha, ọdi órue ọwa omitiom. Awe olegheri ịyaar opu ni okophora mọ ạbuno olegheri, kụ úlegheri.