Ọtughemia Phọ 4 - Ạḍinya Iigbia

¹ Kụ mị ạḅile aphogh ạmiin ịkaraph ịiruen phọ edi bọ sịen aḅirini phọ. Bụphe rọkpiloghom bọ romoghi ni, kụ oye ólho ọloghonaan ạbidi ḍịghaagh. Oye bịdi rạ́pel loor esi dị awe phọ rọkpilighiom bọ bịdi kụ ụmoogh ịikpo phọ.

² Mị apogh bụphe momuughu bọ oten ạḅeni mọ eeḅio; ịlo ạbidi ẹmalaam epu bụphe odi bọ eye phọ.

³ Kụ bụdi ẹnighenaan epu ịyal ạbueri phọ, bụphe kọ̋mar bọ rọmar ọmiin ịkaraph ịiruen awe ịsien aḅirini phọ.

⁴ Mị mạḅile kẹn alegheri ịpe eḍighi bọ kụ awe rokumuan ghan bọ iboom lọ kẹnighenom bịdi. Eḍighi ịdi bịdi ropogh ghan matuman ạbidi kọḅeni mọ eeḅio. Kụ ọlo oopho ni bịn. Ẹkigh ophorogh ookuugh.

⁵ Bịdi rọḅem ghan mọ oye lọ aghura rạghaagh bịn kụ ọkoony aghiigh pọ uwelologhi.

⁶ Iini ịduon phọ ni, kụ ẹnighe ọmoogh ẹnum rꞌọphooneen oḅio epu okumuan ghan oomo amem rꞌịyal ạraghaagh, ọkparagha osiph ookuugh.

⁷ Mị mạḅile kẹn ạmiin ẹnon ịyaar sịen aḅirini dị eḍighi kẹn oopho ni bịn.

⁸ Pọrono sịen oye dị aku otu arugh. Ọdi mọony ọ́moogh, umor ọ́moogh kụ odi ghan rukumuan, ẹelha phọ ọdi ị́gbaanyan nyọdi. Rakumunaan ghan ạnhian kụ kạ́moogh bọ mem oḍe phọ? Ịphen kẹn oopho ni bịn — aḍinukuru ạdol ọrol.

⁹ Ịyal awe kụ ụnighe opu oniin oye, loor esi dị ọḅophan pọ bịdi koḍighi ni ịyaar ọkuami.

¹⁰ Eḍighi ịdi oniin ameel ude, ọphori phọ kạpam ni aḅeton. Kụ eḍighi ịdi ogina oye kụ odi kụ ameel, kebeeph ni iboom loor esi dị oye oḅeton ọdi kạ́tol.

¹¹ Eḍighi ịyaar dị osipheeny kụ odi kụ ịyal awe ọmina esi kụ oḅolan, pọ ẹenyuum kẹtol li, kụ ogina ạna ẹenyuum kẹtol bọ ika?

¹² Ịyal awe kọkpar ri opu ẹgham dị oniin oye kámerenyan. Oḍigh ịraar ạreetena kạkpar ri oruur.

^13-14 Oye kaḅetenu ni dọl ekulom bịn aḍighi ọdaam eelhe ọdi, ḅịle kẹn kạḍua ni otu ikoli bịn ạki ạtolom ạgada ọdaam mọ. Kụ ọlo eḍighi ịdi ọdi mạkpo kụ odimom elologhi ọdi kạ́sighe oroma, ọdi ọ́nighe opu onyugheel uwekulom dị ạsu ologhi.

¹⁵ Mị ạatughian ịlo oomo awe dị odi sịen aḅirini phọ, kụ mị ạmiin mọ eniin esi igbo ạbidi oniin onyugheel ọony odi ni dị kạsighe esi ọdaam mọ.

¹⁶ Ọdaam mọ katue ni ạda we dị kótue ogbi, mem dị ọdi mamugh aten, oye ólho dị kạseph oḍighi phọ ọdi. Oopho ni bịn. Ẹkigh ophorogh ookuugh osiph.