Ọtughemia Phọ 2 - Ạḍinya Iigbia

¹ Mị ụḅem mọ mị kạmoogh oḍe kụ ạwa ọdo ịyaar lọ ọḅaal ologhi aru; kụ mị ạmiin kẹn ni mọ ịphen phọ oopho ni bịn.

² Mị ạwa ạmiin mọ ạreer pọ elologhi, mọ oḍe rạ́ngo ghan sụo.

³ Loor ẹephua ọwa olegheri ịyaar mị ạḅem mọ mị kạpughol ghan miim ạawalamiom ịiḅaghami ạmi. Mị ugbi mọ ẹphen kụ ịma ẹrolom dị awe kọtol ghan ekulha amem mọ bịdi kọtol bọ sịen ade phọ.

⁴ Mị uḍighi yogh ni igbogh ạraraar. Mị ụlhoghoḍi ni ruutu kụ ạzuphogh ịbadi iimuma avain.

⁵ Mị ughoonyogh ni roghoony ạpoghogh rukpu ade dị ọzuphogh ọdo kịrokiro iimuma.

⁶ Mị uguphogh ni rụunu ạmuum mọ ooduom ghan bọ ịizupha phọ.

⁷ Mị ugho ni ịbadi ạrebene, kụ buniin ạrebene ọrol dị ọmaraghi sịphe ọto kꞌạmi. Mị ụmoogh ni ịnam ozo apuemi ịlo ạtorobo oye dị mạmoogh ghan ịnam sịphe Jeruselem.

⁸ Mị ukpologhi ni silva rꞌagol sịphe arookoom aruphua ạraalha arikpisi eelhe phọ mị ạda bọ. Alephiri rꞌạnmariir ụmoor ghan ni sụor ọḅaalami ologhi ạmi, kụ mị ụmoogh ni oomo ạnmariir dị oye katue ạwa.

⁹ Igey ni, mị ụbugh ni apu tọrobo ọnon oye lọ marugh ghan sịphe Jeruselem; kụ olegheri ịyaar phọ ạmi ịmi úbi.

¹⁰ Tọrobo ịyaar lọ mị ạwa, mị ụmoogh ni. Mị ụ́paranaan loor ạmi ịma. Mị uubagaam ni tọrobo ịyaar lọ mị akumuan kụ ạmoogh, kụ oomo ịphen kụ ạsuo ạmi.

¹¹ Kụ mị ạatughian oomo ịpe mị maḍighi bọ rꞌịnyaam mọ mị akumunaan bọ, kụ mị ạmiin mọ oomo phọ ịdi oopho ni bịn. Ịghigh ophorogh ookuugh kụ osiph. Oopho ni bịn.

¹² Ọkar ọmaar ophogh, ọdaam kaḍighi ịdi ạbunon ạbudaam moḍighi ghan bịn. Kụ mị amiigh ọotughian ẹmhu olegheri ịyaar rꞌọwalawala rꞌelologhi.

¹³ Ii mị alegheri ni mọ olegheri ịyaar kụ ạnighe ni apu elologhi, ịdipho ạḍiḅaal ẹnighe bọ epu ufiri.

¹⁴ Awe olegheri ịyaar kọmiin ni ekpisi lọ bịdi rọki, kụ ạbuo elologhi kọ́miin. Kụ mị ạḅile ni alegheri mọ aḍiniin phọ ạdol phọ kụ rekori ni oomo ayira.

¹⁵ Kụ mị ạḅenian loor ạmi mọ, “Mị kạmoogh aani ọkaraph ugho phọ rꞌạbuen elologhi, kụ eeghe kụ ạsuo olegheri ịyaar phọ ạmi?” Kụ mị ạphagharanaan mọ, “Oopho ni bịn, oopho ni bịn.”

¹⁶ Oye rạ́atughian ghan weye olegheri ịyaar kụ oye kẹn rạ́atughian ghan we elologhi. Riiḍio dị retu, kobula ni oomo phọ ayira. Oomo phọ ayira komuughu ni — aweye olegheri ịyaar rꞌạbuen elologhi iniin phọ ni.

¹⁷ Bịn aghuḍum mọ ọ́man mun ịyaar esi ạmi, loor esi dị oomo ạraraar dị edianaan ghuḍum ịngo ịmi ịiḅaghami. Oomo phọ ịne oopho ni bịn. Mị uphorogh ghan ookuugh.

¹⁸ Ịyaar lọ mị kụ akumuan ạmoogh dị ẹghigh mun ịyaar esi ạmi ílho, loor esi dị mị kạbilenaan ni oye dị kạsighe dọl phọ ạmi,

¹⁹ kụ ọdi iini kaḍighi oye olegheri ịyaar, iini oye elologhi — ạnhian kụ alegheri? Tọrobo ịlo ẹrol, ọdi kụ kạmoogh oomo ạraraar phọ mị akumuan bọ ạmoogh, oomo ạraraar phọ olegheri ịyaar phọ ạmi mụngo bọ ịmi sịen aḅirini phọ. Oomo phọ ịne oopho ni.

²⁰ Kụ mị ạḅile ạkpalham ghan loor ạmi mọ mị ughol eeghe kụ akumuan bọ oomo ịpe phọ.

²¹ Nạ ukumuan ghan rꞌoomo olegheri ịyaar rꞌologhi rꞌẹmaar ọmoogh ịyaar bịn kụ nạ ạbilenaan ọnon oye dị loor ụ́uḅaghamian. Oopho ni bịn íḍighi elhiom.

²² Nạ akumuan kụ ạaḅaghamian oomo aghuḍum ạna, kụ eeghia kụ ẹdi nạ ạmoogh ọsighe oḍeenaan?

²³ Legheri mọ oomo ạdol aghuḍum mọ ạna, tọrobo ịyaar lọ nạ aḍighi kéruom nyịna ịyaar emuton ọoḅaghamian aloor rꞌọto. Ghạlamo rꞌaḍughul bịn ologhi ạna kápooghian. Oomo phọ ịne oopho ni.

²⁴ Ọkar ịma ịyaar dị oye kaḍighi, olhe ọphughol rꞌọghelom ịlo ọdi ạmoogh. Mị aloghoma mọ rꞌịphen phọ kẹn ni bịn rẹḍua ghan esi Ẹnaan kụ keru.

²⁵ Miḍighi ika kụ nạ mụmoogh ịyaar olhe, ạḅile ạmoogh ẹereegh rꞌaloor ạna?

²⁶ Ẹnaan kụ rẹngo ghan olegheri ịyaar rꞌologhi rꞌọḅaal ologhi bụlo oḍighi ịlo ẹḅeeraan nyọdi, kụ ọdi raḍighi ghan ịdi abuḍighinom ịkaraph kokumuan ghan ọmoogh kụ ookpomoghi pịdi ọsighe ịpe bịdi ọmoogh bọ ọngo bụlo oḍighi ịlo ẹḅeeraan nyọdi. Oomo phọ ịne oopho ni bịn. Ẹkigh ophorogh ookuugh kụ osiph.