Ọtughemia Phọ 12 - Ạḍinya Iigbia

¹ Ịdipho kụ iḍighi kụ tụutughian Ọlemia phọ ạna, sịen nạ odi bọ ịḍoogh phọ kụ egbi ọteeny ariiḍio rꞌạsia ịirurughian dị nạ kạḅem mọ, “Mị ụ́kelom ghuḍum mọ.”

² Pọ kụ amem dị ẹmuom erumuḍio rꞌụnwanyu rꞌạraanaan phọ keḍimanaan nyịna kụ ọotu ọlophia phọ kạ́ḍua mun.

³ Kụ ạraghaagh phọ ẹpham ghan bọ nyịna kepiigha ni, kụ aruwol phọ ạna ẹkparagh bọ nyịidipho kephighphigha ni. Ạralaal phọ ạna kesugha iikoma dị nạ kátue mun ạtaal eḍien, kụ ariḍien phọ ạna egururu ọmiin eten.

⁴ Areḅeri ạna keḅaaghaph dị nạ kạ́naghan mun oghur ạḍiaḅa ạraraar eten phọ. Nạ kạkparagha ni kụ ạnaghan ḍịaḅa ạrana dị rẹgbe ịbiakpa ḅịle rꞌiitia arephegh lọ ropegh, kụ ọlo ạḍuor ẹnun bịn kẹsumeeny ni nyịna rạlha.

⁵ Nạ kakiilaan ni ọsiiny ạnyu, kụ erelhe bịn keḍighi ni eegu esi ạna. Ạsilaal ạna kẹḅaal li; kụ kẹkparanaan ni nyịna ọghogha ọghi esi, kụ oomo ạruuphua kẹḍuaghu ni. Yira rọki ekpisi eekuna ophooghian phọ, kụ sịphe areten phọ emoghi kụ kemuza.

⁶ Izime asilva phọ ketuuru ni kụ ọtozi agol phọ ameel aḅomaan kụ oḍigh ọkpaaghiom ạmuum mọ kasophaan ni kụ oko ạmuum kaatughuḍian.

⁷ Aruzu phọ ayira keḅula sịphe ophugh ade phọ, kụ aḍiphooghu aghuḍum mọ keḅula kꞌẸnaan phọ ọpo ụngo bọ iyira.

⁸ Oopho ni bịn, oopho ni bịn, kụ ịdi Ọtughemia phọ ạḅem. Oomo phọ ịne oopho ni bịn.

Ekureriom ọghaaph phọ

⁹ Ịdipho Ọtughemia phọ aḍighi bọ oye olegheri ịyaar phọ, ọdi ạlogh ẹmhu ọtughemi ghan awe phọ ịlo ọdi alegheri. Ọdi ạtuugha sidogh kụ ạkar aḅiligha ghan ọmiin mọ igey edimom ni.

¹⁰ Ọtughemia phọ ạkparagha ni ọwa ikpo ọnhu ịidereghi, kụ ikpo ọnhu phọ ọdi ạgeom bọ ịkpianaan ni.

¹¹ Ịpe awe olegheri ịyaar phọ rọḅem ghan bọ ẹkighogh ịsiosio ireeny dị abukoriom ịga rọpam ghan kụ korelhiom iyool-ịga, kụ asidogh dị ookpomoghi rẹtol ghan kebia mụdi iḍugh dị ọkan esi ọkparami. Ẹnaan kụ ịngo bịdi, nyọpo rapogh bọ oomo phọ ayira ịdipho iyool-ịga.

¹² Mọony ạmi, ẹnon ịyaar edi ni dị ẹnighe ogon ọmiin. Eekuna ílho ghan ịgeeghi ạrinya, kụ iboom ịtuugha keḍighi ịdi nạ kaminenom.

¹³ Oomo ịphen phọ reru reten, eniin ịyaar bịn kụ ẹdi ọghaaph: lọgh eegu Ẹnaan kụ ạnaghanan ịtooghi phọ ọdi, loor esi dị ịphen phọ bịn kụ ẹdi ọtuan bọ kụ ọlhem oye.

¹⁴ Ẹnaan kẹeḅeghion ni epogh tọrobo ịyaar lọ yira oḍighi, mꞌigey mꞌịkaraph, ghạlamo rꞌịlo ạaghian ni kụ oḍighi.