Ọtughemia Phọ 1 - Ạḍinya Iigbia

Dọl aḅirini phọ ịyaar ílho

¹ Ịphen ikpo ọnhu Ọtughemia phọ, ọony phọ aDevid, ọpo aḍighi bọ ọdaam mọ aJeruselem.

² Oopho oopho ni bịn, Ọtughemia phọ kụ ạḅem. Ạdol aḅirini phọ oopho ni bịn, oomo phọ ịne oopho oopho ni bịn.

³ Nyina reḍighi ghan oḍighi kephiemi mem eḍula loor anyina. Eeghe kụ ạsuo arukumuan phọ anyina?

⁴ Oghiil aru oghiil agheel kụ aḅirini phọ odi ghan ni bịn.

⁵ Erumuḍio phọ remite ghan ni kẹḅile edugh emeel eḅula ekpisi phọ rẹḍua ghan bọ keru.

⁶ Ookuugh rakugh ghan ni kạghi esoorom, ạḅile aghugh ạghi ephunom — raaghiraan ghan ni bịn kạḅile amiigh.

⁷ Oomo ịbam ạriphiiny rekil ghan kesoroghu ogbogh ọphiiny, kụ ogbogh phọ rámuza ghan. Ạmuum mọ raḅula ghan sịphe azin ạriphiiny phọ, bịn kạḅile amiigh.

⁸ Oomo ạraraar rẹteeny ghan ni mem odugh ọkporokporo — ḍidugh dị ọnhu kátue ạkaaph. Ariḍien ayira kétue mun ẹmiin ịdi kẹgbaanyan; areḅeri ayira kétue mun ẹnaghan ịdi kẹgbaanyan.

⁹ Ịlo memite ghan kẹḅile ni emite. Ịlo moḍighi ghan kọḅile ni oḍighi. Emoom ịyaar ílho sịen oomo aḅirini phọ.

¹⁰ Awe ọḅem mọ, “Ịmiin. Pọrono sịen emoom ịyaar!” Kụ eeye, oomo phọ ịne memite ghan ni igbaany, ebia kụ ogbi ọmaraghi ayira.

¹¹ Oye rạ́atughian ịlo memite ghan eten, kụ oye ólho riiḍio dị retu dị kạatughian ịdi kemite igbo ạnyiidipho rꞌamem dị ketu.

Ọdo oye dị Ọtughemia phọ aru

¹² Mị, Ọtughemia phọ, maḍighi ni ọdaam eelhe Ịzirel sịphe aJeruselem.

¹³ Mị ụkar ri ạnya ọoḅeghion ophogh rꞌọtuugha oomo ạraraar phọ roḍighi bọ sịen aḅirini phọ. Ẹnaan miseere iyira ḍighiil adool ọto.

¹⁴ Mị mạmiin ni oomo ạraraar phọ roḍighi ghan bọ sịen aḅirini phọ, kụ mị alegheri mọ oomo phọ ịne oopho ni bịn. Ẹkigh ophorogh ookuugh osiph.

¹⁵ Nyina kétue eelemi ịyaar dị mẹekulughian; nyina kétue egbi rạraar dị esi ílho.

¹⁶ Mị ụḅenian loor ạmi mọ, “Mị maḍighi ogbogh oye, dị ạmoogh olegheri ịyaar apu oomo ạbuphe mọda ghan bọ Jeruselem kụ egbi bọ ọteeny aani ạmi. Mị ạkar alegheri ịdi olegheri ịyaar rꞌologhi ẹman.”

¹⁷ Mị ụnya ni ọtuugha ọmaar ọgbaranaan dị odi esi ologhi rꞌelologhi, olegheri ịyaar rꞌẹlaal. Kụ mị ụwa ạmiin mọ kẹkigh dị mị rꞌaloor raporogh ghan ookuugh.

¹⁸ Olegheri ịyaar phọ ạna rạbugh, bịn ịiḅaghami ạna rẹbugh; nạ alegheri rạbughe, bịn okururu ạna rạbugh.