Ogonanami Phọ 7 - Ạḍinya Iigbia

Aweye Ịzirel dị ọman 144,000

¹ Mem dị ịphen meten, mị ụmiin ni inya ạruukpaany Ẹnaan dị ọmeregha inya ạrughulukul aḅirini phọ kụ ọpham inya oghim aḅirini phọ roḅulemi ghan ọman, ọbo oghim kakim ghan bọ sịen ade phọ apighemi ọphiiny mꞌoreeny.

² Mị uphogh ni ẹpe erumuḍio phọ remite ghan bọ kụ ạmiin ọnon ọokpaany dị ạpham oba Ẹnaan phọ edi ghan bọ ratumom. Kụ ọdi ạlho ạghiom ạnyu ạmagh inya ạruukpaany phọ Ẹnaan mẹngo bọ ịikpo oḍighinom aḅirini phọ rꞌọphiiny phọ ịlo ẹekaany,

³ mọ, “Kéḍighi aḅirini phọ rꞌọphiiny rꞌireeny phọ ịlo ẹekaany, tụtu yoor ọsighe oba phọ ọloghoḍiom elegh rolhor ạbuo iiḍighi Ẹnaan phọ ayira.”

⁴ Kụ ụḅeni ni ịmi ḍita ạbuphe ọloghoḍi bọ elegh phọ rolhor phọ ạbidi, kụ aḍita awe oomo arughunughun phọ Ịzirel ịman oniin okuron rꞌinyadi rꞌinya.

⁵ Bụo eghun aJuda dị ọloghoḍi elegh phọ ụman ḍioph rꞌịyal ọonir; bụo eghun aRuben dị ọloghoḍi elegh phọ ụman ḍioph rꞌịyal ọonir; bụo eghun ạGad dị ọloghoḍi elegh phọ ụman ḍioph rꞌịyal ọonir;

⁶ bụo eghun Ạser dị ọloghoḍi elegh phọ ụman ḍioph rꞌịyal ọonir; bụo eghun ạNaftalai dị ọloghoḍi elegh phọ ụman ḍioph rꞌịyal ọonir; bụo eghun ạManase dị ọloghoḍi elegh phọ ụman ḍioph rꞌịyal ọonir;

⁷ bụo eghun ạSimion dị ọloghoḍi elegh phọ ụman ḍioph rꞌịyal ọonir; bụo eghun aLivai dị ọloghoḍi elegh phọ ụman ḍioph rꞌịyal ọonir; bụo eghun ạIsaka dị ọloghoḍi elegh phọ ụman ḍioph rꞌịyal ọonir;

⁸ bụo eghun ạZebiulon dị ọloghoḍi elegh phọ ụman ḍioph rꞌịyal ọonir; bụo eghun ạJosef dị ọloghoḍi elegh phọ ụman ḍioph rꞌịyal ọonir; bụo eghun ạBenjamin dị ọloghoḍi elegh phọ ụman ḍioph rꞌịyal ọonir.

Ạsiadam awe phọ

⁹ Mem dị ịphen phọ meten bọ, mị uphogh ni kụ ạmiin sịadam awe oomo areelhe rꞌarughunughun rꞌạramha rꞌạrunhu dị útue ụbal umuneni. Bịdi ụmeregha ni ghisigh ạgada ọdaam ẹmha phọ rꞌaghisigh Ọony Oyool-ọga phọ. Bịdi uunmenan ịphalaḅaal kụ ọphamagh ịghiriki ịriir rạghaagh ạbidi,

¹⁰ kụ ọlo ghan ọghiom ạnyu mọ, “Ạpeleeny phọ ayira ạḍua ghan kꞌẸnaan phọ ayira ẹrolom bọ ạgada ọdaam aḅirini phọ rꞌesi Ọony Oyool-ọga phọ kụ ratu.”

¹¹ Kụ oomo ạruukpaany phọ Ẹnaan ọmeregha oko okitonom ạgada phọ rꞌikumoor awe phọ rꞌinya ạraraar phọ ẹmoogh bọ ḍiphooghu phọ, kụ okpuḍughian ghisigh ạgada ọdaam ẹmha phọ ozumeri rụmhu ạbidi kụ ooseeny Ẹnaan,

¹² mọ, “Agey ni. Iboh rꞌeegu rꞌolegheri ịyaar rꞌạḍiseph rꞌeghuan rꞌịikpo rꞌigbogh ịlo Ẹnaan phọ ayira kꞌagee-pọ kꞌagee-pọ. Ẹrol li ịdipho!”

¹³ Kụ oniin okumoor oye phọ upuru ịmi mọ, “Bụen ịphalaḅaal iinmenan phọ ạbughen? Ụḍua ẹghen kụ oru bọ?”

¹⁴ Kụ mị mọ, “Oye phọ, nạ kụ ulegheri.” Kụ ọdi mọ, “Bụen ạbudi mokpetenaan bọ iboom ịminimiin phọ. Bịdi ụsighe ịḅaal Ọony Oyool-ọga phọ kụ ootolom bọ rụsuoma phọ ạbidi ọḅaalami.

¹⁵ Ịduon kụ iḍighi kụ bịdi ọmeera bọ ghisigh ạgada ọdaam aḅirini phọ roḍighi ghan oḍighi kọngo Ẹnaan ḍughul rꞌootaany sịphe otu ịiḅereghi phọ ọdi. Ọdi kụ aḍibuo dị bịdi oḍigh.

¹⁶ Bịdi kóloghoma mun ọkoony eḍien rꞌạmuum. Erumuḍio ḅịle rꞌọmu bịdi kẹ́gur mun,

¹⁷ ịdi eḍighi bọ Ọony Oyool-ọga phọ odi bọ sịphe ogbo ạgada phọ kụ kaḍighi opoghom mọ ạbidi, kụ atorori bịdi ạteenye rụunu adir dị ạmuum aghuḍum rakil. Kụ Ẹnaan kegbuurogh ni oomo phọ izin phọ ạbidi ẹsighe.”