Ogonanami Phọ 3 - Ạḍinya Iigbia

Adom dị aKraist arom ạghiom Sạadis

¹ “Gẹ ịphen ạghiom ọokpaany phọ Ẹnaan rapogh bọ sịosi phọ ạSaadis mọ, ‘Ọpo ạpham bọ oḍual aruwaloor phọ Ẹnaan rꞌoḍual ạraanaan phọ, ạsighe dom mọ ạḍien kụ ratu. Mị alegheri ni iiḍighi phọ anyina; ọḅile rogbiom ghan mọ nyina edi ni eye, kụ ạri nyina memugh ni kụ retelhe.

² Ịsuma rạlha phọ eemanam, ẹngo ịnyaam ịlo isughanaan inyina lọ ke̋mugh ẹman. Mị ạwa ạmiin mọ ịpe nyina meḍighi bọ esughanam ni ghisigh Ẹnaan phọ ạmi.

³ Ịmaar ghan ẹpham ẹkparami ịpe ịtughemi bọ inyina ẹdaph kụ ekiton esi ịkaraph phọ anyina. Mọ nyina ị́suma, mị katu ịdipho ọḅa, kụ nyina kélegheri kẹn rꞌamem mọ mị katu bọ.

⁴ Kụ mạman anyina edi ni ẹpe Sạadis dị kọ̋biphoghom ẹenir rụsuoma ạbidi. Nyina kẹkpologhian ni ịphalaḅaal kụ nyina rꞌạmi etelhian, loor esi dị nyina ẹman ni oḍighi ịduon phọ.

⁵ Bụphe kọkpar bọ opu kọkpologhian ịphalaḅaal kụ kọ́ogbirion ḍien ạbidi sịphe ạḍinya ạbuphe odi bọ. Mị kạgba ni amitiom ghisigh Ọde phọ ạmi rꞌạruukpaany phọ ọdi mọ bụphe kọkpar bọ opu ạbuo ạmi ni.

⁶ “‘Oye lọ ạmoogh rụru ạnaghanan ịpe Uwaloor phọ rạḅeni bọ sịosi ẹmha kịrokiro phọ!’”

Adom dị aKraist arom ạghiom Filadelfia

⁷ “Gẹ ịphen ạghiom ọokpaany phọ Ẹnaan rapogh bọ sịosi phọ aFiladelfia mọ, ‘Oye aghuḍuul rꞌigey phọ ạpham bọ ịsabi phọ aDevid, ạsighe dom mọ ạḍien kụ ratu. Ọdi aghughuron, oye rátue ghan kaghughi; ạḅile aghughi, oye rátue ghan kaghughuron.

⁸ Mị alegheri ni iiḍighi phọ anyina. Mị alegheri ni mọ nyina ẹmoogh ẹphurukpu ịnyaam kụ nyina mẹnaghanan ni ọghaaph phọ ạmi, nyina ḍien phọ ạmi kẹ̋pharanaan. Mị mighughuronaan inyina eghuugh dị oye kátue akughi.

⁹ Ịnaghan. Bụphe oḍigh bọ eghoroghan phọ aSetan kụ oghophora bọ ọḅem mọ ạbuno ạbuo aJu phọ, mị kaḍighi dị bịdi kotu okpuḍughian sịphe aruwol phọ anyina. Oomo phọ ạbidi kolegheri ni mọ mị ịphomoghian ni inyina.

¹⁰ Nyina mẹkparam bọ ni ịdipho mị ạḅem bọ, pọ mị kaḍighi ni dị nyina kekoronaan mem mọ ịminimiin phọ kesoor bọ ọdegh oomo aḅirini phọ ophogh.

¹¹ Mị ạnuun ni ratu. Ịmaar ghan ẹpham ẹkparami ịlo nyina ẹmoogh, ọbo kimirighan ghan bọ inyina ozua eghoony iphelegbe phọ.

¹² Mị kaḍighi oye lọ ạkpar apu ẹko sịphe otu ịiḅereghi Ẹnaan phọ ạmi. Oye phọ ọpo kạ́ḍua mun sịphe phọ. Mị kạge loor ọdi ḍien Ẹnaan phọ ạmi, rꞌaḍien ẹmha omoom aJeruselem mọ Ẹnaan phọ ạmi kẹsighe bọ kꞌạke kụ eseere. Mị kạge kẹn ni loor phọ ọdi ḍimoom aḍien phọ ạmi.

¹³ “‘Oye lọ ạmoogh rụru ạnaghanan ịpe Uwaloor phọ rạḅeni bọ sịosi ẹmha kịrokiro phọ!’”

Adom dị aKraist arom ạghiom Lodisia

¹⁴ “Gẹ ịphen ạghiom ọokpaany phọ Ẹnaan rapogh bọ sịosi phọ aLodisia mọ, ‘Ọpo ráanmia ghan bọ, ogey ọgbaanaan phọ rạ́gba ghan bọ kạloghom kụoom mọ, ọpo Ẹnaan emiighom bọ ọlem mọ, ạsighe dom mọ ạḍien kụ ratu.

¹⁵ Mị alegheri ni iiḍighi phọ anyina. Nyina eḍighi asugha-ogbo dị rẹ́kologhol, ḅịle rẹ́ephoom. Esi ạmi, ọbo nyina mephogh dọl ẹtol.

¹⁶ Kụ nyina meḍighi bọ asugha-ogbo dị rẹ́kologhol ḅịle rẹ́ephoom, mị kikuḅa ni inyina ọnhu ạmi amitiom.

¹⁷ Nyina ịḅem mọ, “Mịneghenom iyoor, yoor ọmoogh ẹelha, ịyaar iyoor ikuom.” Nyina íloghoma mọ nyina meḍigh ni ạagia rꞌọbiph. Nyina arukulom dị edi ẹdaḅa, ḅịle eten rẹ́miin.

¹⁸ Mị riroma nụun inyina mọ itu ịteeny ịmi egho ọfiafia agol, ọbo eḍighi aani rạalha. Ikoom ni ịphalaḅaal iinmenan, dị nyina keenmenan eekpereghiom ẹdaḅa umugholoor phọ anyina. Ikoom ni rọogho dị nyina keḍighinaan riḍien phọ anyina, ọbo ẹmiin aani eten.

¹⁹ Mị rꞌaloor ạmi ramooghaam ghan ni, kạḅile ạliom oomo ạbulo mị ạphomoghian. Isereghian nụun ekiton esi ịkaraph phọ anyina.

²⁰ Ịnaghan. Mị ạmeera ni sịphe ọnhu-aḍibuo phọ rakar ghan eghuugh phọ. Kụ oye lọ ạnaghan ẹḍogh phọ ạmi kụ aghughuron otu phọ, mị kaḍigh ni ologhi otu phọ ọdi mị rꞌọdi olian eḍien.

²¹ Kụ ọpo kạkpar bọ apu, mị kạngo ni ịikpo ọrolan ạmi sịphe ạgada ọdaam mọ ạmi, ịdipho mị mạkpar bọ ni apu kụ mị mạrolan aani bọ Ọde phọ ạmi sịphe ạgada ọdaam ẹmha phọ ọdi.

²² “‘Oye lọ ạmoogh rụru ạnaghanan ịpe Uwaloor phọ rạḅeni bọ sịosi ẹmha kịrokiro phọ!’”