Ogonanami Phọ 21 - Ạḍinya Iigbia

Omoom ạke phọ rꞌaḍimoom ade phọ

¹ Mị ụḅile ni ạmiin omoom ạke rꞌaḍimoom ade. Ọḅel ạke phọ rꞌạḍiḅel ade phọ meten. Ọphiiny phọ kẹn ọ́rol mun.

² Kụ mị ạmiin dị omoom aJeruselem ẹmha iigbia phọ ẹḍua kꞌẸnaan ẹpe kꞌạke resoor ude. Ạnyaaghian aakolobian mụdi ọnyani dị aanmenan ogheel kꞌolhom ọdi.

³ Mị ụnaghan ni ḍịolho dị ẹḅem ghan sịphe ạgada ọdaam mọ mọ, “Nyịidipho amarugh phọ Ẹnaan masoor ude ạteeny we. Ọdi katughan ni bịdi, ḅịle bịdi oḍighi weye ọdi. Ẹnaan rꞌaloor ọdi kẹtolan ni bịdi, eḍighi Ẹnaan ạbidi.

⁴ Ọdi kagbuurogh ni oomo izin riḍien ạbidi. Aḍuugh rꞌamukum ologhi rꞌemoghi rꞌeephina kẹ́tol mun, ịdi eḍighi bọ ịḅel ạraraar phọ meten.”

⁵ Kụ ọpo ạrolom bọ ạgada ọdaam mọ ạḅem mọ, “Nyịidipho mị raḍighi oomo ạraraar phọ imoom.” Ụḅeniom kẹn ni ịmi mọ, “Gẹ ịphen ịdi eḍighi bọ ikpo ọnhu phọ ịphen ịne ni, amabi ólho.”

⁶ Kụ ọdi ạḅem mọ, “Moḍighi ni ọman. Mị kụ Ạlfa phọ rꞌOmega phọ, emiighom mọ ḅịle rꞌekureriom mọ. Tọrobo ọlo ạmuum rạpu, mị kaḍu ni mụum sịphe ọonu adir aghuḍum mọ ạngaani oopho.

⁷ Tọrobo oye lọ ạkpar apu, mị kạngo ni ruunmo phọ ịphen: mị kaḍighi ni Ẹnaan ọdi, ọdi aḍighi mọony ạmi.

⁸ Kụ bụo eepuph phọ rꞌemeeraam mọ, rꞌạbuminian rịiniom mọ, rꞌạrookom enu phọ, rꞌạbuo ipesi phọ, bụlo rọgbe ghạma rꞌạbulo rọoḅereghi ruru rꞌạbugbaam ọkpe — ọodu phọ ọpo ạnian rꞌạsolfa phọ reemor bọ kụ esi dị oseenaan bịdi. Ḍịen kụ aḍuugh phọ emuneniom bọ ịyal phọ.”

Omoom aJeruselem mọ

⁹ Oniin sịphe oḍual ạruukpaany phọ ọmoogh bọ oḍual iḍukuru ạsigbagba phọ ọlogh bọ oḍual imananaany ekureriom mọ omuzeḍi aru ni ụteeny ịmi kụ ạḅem mọ, “Tue, mị kaḍeenaan nyịna ọnyani phọ, nyọpo Ọony Oyool-ọga phọ kapin bọ.”

¹⁰ Uwaloor phọ ụsiiny ni ịmi kụ ọokpaany phọ ụpheephom ịmi asiemi ạnyu eboom eegum. Ọdi ạma ni Jeruselem ẹmha iigbia phọ ẹḍua bọ kꞌẸnaan ẹpe kꞌạke resoor ude phọ uḍeenaan ịmi.

¹¹ Ạḍiḅaal eegu phọ Ẹnaan isoorom ni ẹmha phọ kụ ẹmhu ịdipho ạjaspa, ẹnmananmana ịdipho ạkiristel.

¹² Ẹmha phọ ịmoogh ni iboom iiphopha iikpe rꞌaḍioph rꞌịyal ạrunhu-aḍibuo dị ḍioph rꞌịyal ạruukpaany okori ghan. Sịphe ạrunhu-aḍibuo phọ ụgeeghi ni siḍien aḍioph rꞌịyal arughunughun aweye phọ Ịzirel.

¹³ Ịraar ạrunhu-aḍibuo kụ ịrol ghan tọrobo ạḍiagaany — ịraar ekeeny, ịraar elhiom, ịraar ọman, ịraar ghisigh.

¹⁴ Uphighi iikpe phọ ekoom bọ ẹmha phọ ạnyu aḍioph rꞌịyal asighiigh dị ọgeeghi siḍien aḍioph rꞌịyal abutelhedom Ọony Oyool-ọga phọ.

¹⁵ Ọokpaany phọ ạghaaph bọ ụḅeni ịmi ạmoogh ni oghologo agol ọlo ọtooghiom ẹmha phọ rꞌạrunhu-aḍibuo phọ rꞌiikpe phọ.

¹⁶ Inya phọ ạraghaagh ẹmha phọ iileeny ni ḍịdoony rꞌẹreghe. Kụ ọokpaany phọ ạsighe ni oghologo phọ ọdi ạtooghiom ẹmha phọ. Ạḍidoony phọ ịman ịyal ọonir rꞌinya okuron itobi. Ẹreghe phọ rꞌaḍiphoph ạnyu phọ rꞌạḍidoony phọ iilenyan ni.

¹⁷ Ọokpaany phọ ạtuugh ni ẹtooghiom awe kụ ạḅile ạtooghi ḍiphoph iikpe phọ kụ ẹman odiinydi akuḅu, ọdaphan ọkaraghi ịpe ịto phọ ẹḅem bọ.

¹⁸ Iikpe phọ ụloghom jạspa. Ẹmha phọ ụloghom ọfiafia agol ịdipho atamaḍiki dị rátonyonaan.

¹⁹ Sighiigh phọ ophighiom bọ iikpe ẹmha phọ ụdaaghiom ni ọdo kịrokiro ịbekulari. Sịphe ephighiom mọ, ạḍiḅel aḍighiigh phọ, ạjaspa; ḍịphe etum bọ pạ, ạsafair; ḍịphe emuneniom bọ ịraar phọ, ạget; ḍịphe emuneniom bọ inya phọ, ẹmerald;

²⁰ ḍịphe emuneniom bọ oogh phọ, ọniks; ḍịphe emuneniom bọ odiiny phọ, ikpo ẹbe; ḍịphe emuneniom bọ oḍual phọ, ạkuats; ḍịphe emuneniom bọ ọphaanya phọ, ạberil; ḍịphe emuneniom bọ esugha phọ, ạtopas; ḍịphe emuneniom bọ ḍioph phọ, ạkalsedoni; ḍịphe emuneniom bọ ḍioph rꞌoniin phọ, ạtukuos; ḍịphe emuneniom bọ ḍioph rꞌịyal phọ, ametist.

²¹ Ḍioph rꞌịyal phọ ạrunhu-aḍibuo phọ, pọ ḍioph rꞌịyal ịbekulari. Ụsighe ghan nyeniin ekpo ẹbe kụ oḍighi tọrobo ọnhu-aḍibuo. Olhom oḅodo ẹmha phọ uḍighinom ọfiafia agol dị ạnmana ịdipho atamaḍiki.

²² Mị ụ́miin otu ịiḅereghi sịphe ẹmha phọ, ịdi eḍighi bọ otu ịiḅereghi ẹmha phọ, pọ Ẹnaan Oomo Ịikpo Ọmoogh-we phọ rꞌỌony Oyool-ọga phọ.

²³ Ẹmha phọ ị́moogh ịyaar oḍighinom ạḍiḅaal erumuḍio phọ rꞌụnwanyu phọ, loor esi dị ạḍiḅaal eegu phọ Ẹnaan esoorom ni nyọdi, ḅịle Ọony Oyool-ọga phọ kụ ọtozi ọdi.

²⁴ Aweye areelhe phọ kotelhiom ḍịḅaal phọ ọdi; ḅịle, ạbudaam aḅirini phọ kọpam ni ẹelha phọ ạbidi otumom.

²⁵ Ạrunhu-aḍibuo ẹmha phọ kekunyonu ghan ni ootaany, ḅịle sịphe ẹmha phọ aḍughul kékul.

²⁶ Kọpam ni igbogh phọ rꞌẹelha areelhe phọ otumom ẹmha phọ.

²⁷ Ạḅaphanya mꞌọlo raḍighi yogh ghan rạraar umugholoor mꞌọgbaam ọkpe káḍigh roḍigh sịphe ẹmha phọ. Bụphe Ọony Oyool-ọga phọ mạgeeghi bọ siḍien phọ ạbidi ologhi ạḍinya ạbuphe odi bọ bịn kụ koḍigh sịphe ẹmha phọ.