Ogonanami Phọ 19 - Ạḍinya Iigbia

¹ Ịphen phọ eten bọ, mị ụnaghan ni ḍịolho dị ẹghigh ọyugh aḍita awe dị rẹḅem ghan ẹpe kꞌạke mọ, “Iboom Ẹnaan. Ạpeleeny rꞌeegu rꞌịikpo ịlo Ẹnaan phọ ayira ni.

² Ịiruen phọ ọdi esel li ḅịle ọkaraghi igey ni ịdipho ọdi masoph bọ ni aphume oboom oboom oliom ẹmha phọ apesi ghan bọ ipesi phọ ạphuenom aḅirini phọ. Ọdi ạzeeghi bụo iiḍighi phọ Ẹnaan kụ Ẹnaan ẹliom bọ nyọdi.”

³ Kụ bịdi ọḅile kẹn ọlo mọ, “Iboom Ẹnaan. Ạmughi ạnian phọ rele bọ eboom mọ ẹmha phọ rạdumughaan ni kꞌagee-pọ kꞌagee-pọ.”

⁴ Ịyaldi rꞌinya ikumoor awe rꞌinya ạraraar phọ ẹmoogh bọ ḍiphooghu phọ ikpuḍughian ni kụ eeseeny Ẹnaan phọ ẹrolom bọ ạgada ọdaam mọ kụ ẹḅem mọ, “Ẹrol li ịdipho! Iboom Ẹnaan.”

Amalhe kꞌạrogo Ọony Oyool-ọga phọ

⁵ Kụ ẹḍogh ẹḅem ghan sịphe ạgada ọdaam ẹmha phọ mọ, “Oomo ạbuo iiḍighi phọ ọdi rꞌoomo awe, bụbam rꞌabugbogh, lọ rọlogh ghan nyọdi eegu, iboom ni Ẹnaan phọ ayira.”

⁶ Kụ mị ụnaghan ni ḍịaḅa dị ẹghigh ọyugh aḍiboom aḍita awe, mụdi oghur ạmuum dị akil rasoroghu oolhe rꞌịdipho ọomaany dị rạtaphan. Mị ụnaghan ni dị bịdi ọḅem mọ, “Iboom Ẹnaan. Ẹnaan Oomo Ịikpo, Ọmoogh-we phọ ayira kụ ọdaam ẹmha.

⁷ Itu ọmoogh iboh rꞌọḅaal ologhi. Iboom igbogh phọ ọdi. Mẹteeny ḍio dị Ọony Oyool-ọga phọ kapin ạnir, kụ ọnyani phọ maakolobian ni loor ọdi rakori ghan.

⁸ Mọngo ni nyọdi iidugha dị ọdi kaanmenan.” (Iidugha phọ pọ iiḍighi aruukuan awe phọ Ẹnaan.)

⁹ Kụ ọokpaany phọ ụḅeni ịmi mọ, “Gẹ ịphen. Iboh kꞌẸnaan kẹtolonaan ni bụphe ọḅeni aani bọ ọghi kꞌọyogo Ọony Oyool-ọga phọ.” Kụ ọdi ạḅem ni ạloghom mọ, “Ịphen kụ ọkaraghi ikpo ọnhu phọ Ẹnaan.”

¹⁰ Mị ukpuḍian ni rạda aruwol ọdi ooseeny ọdi, kụ ọdi ụḅeni ịmi mọ, “Káḍighi ịduon. Sịphe oḍighi phọ, mị kụ ọḅarama ạna rꞌạbuo asiya phọ ạna rꞌoomo ạbuphe rọkaaph ghan bọ ịpe ạJizos agananami bọ. Seeseeny ghụn Ẹnaan.” Ilegheri mọ ịpe ạJizos agananami bọ kụ ịsiiny bọ riil phọ.

Ọpo aḍigh bọ ọphalaḅaal ạsu phọ

¹¹ Kụ mị ụḅile ni ạmiin ịdi ạke phọ aghughuronu, rꞌọphalaḅaal ạsu dị odi. Nyọpo ạsu phọ rakiilom bọ ughol mọ Óbi rꞌÓkue. Esophom ịiruen phọ rꞌeenom ẹgham mọ ọdi resel ghan ni.

¹² Ariḍien phọ ọdi ịdipho anem ạnian. Azua yogh ni ịbadi aroghoony ọdaam. Ḍien dị ọge loor phọ ọdi emuton nyọdi ọnon oye ólhegheri ẹmhu phọ.

¹³ Ịḅaal kụ imuza ạsuoma phọ ọdi ạkpologhian bọ. “Ekpo ọnhu phọ Ẹnaan” kụ aḍien dị rọmagh ghan nyọdi.

¹⁴ Bụo ẹgham kꞌạke dị oḍiku ịphalaḅaal ạrusu ọḅile oonmenan ọmur ụdaph ni nyọdi.

¹⁵ Ẹrue-rụe elhool ẹgham dị ọdi kabiom ạkpar apu reelhe aḅirini phọ ipuka ni ọnhu ọdi. Ọdi kạsighe ịkpara okuron kụ ạtooghiom rạraar ạngo bịdi. Ọdi kamiim ni miim sịphe roḍighi ghan bọ mụkaraph amiim ạghelhe phọ Ẹnaan Oomo Ịikpo phọ.

¹⁶ Sịphe ạsuoma phọ ḅịle rꞌowol phọ ọdi ụge ni ḍien phọ ạḍien mọ, “Ọdaam aḅirini rꞌỌmoogh-we dị emuton nyọdi ọnon úlho ghan.”

¹⁷ Kụ mị ụḅile ni ạmiin ọokpaany dị ạmeera sịphe erumuḍio phọ. Ọdi ạlho ni ạghiom ạnyu ạḅeniom ghan oomo ịnun phọ rẹpeeph bọ ẹpe eekuna okuaḍio phọ mọ, “Itu eekpomoghan ele eboom ẹyaal phọ Ẹnaan.

¹⁸ Itu ạa iphulupul ạbudaam-ẹmha, rꞌịlo ạbuo ẹgham rꞌaruwo ẹmhu phọ ạbidi, rꞌịlo ạrusu rꞌạbulo bịdi rekiilom, rꞌịlo oomo awe, rẹbene rꞌạbuo ade, bụbam rꞌabugbogh.”

¹⁹ Kụ mị ụḅile ni ạmiin elhom ẹnam mọ rꞌạbudaam aḅirini phọ rꞌạbuo ẹgham mọ ạbidi, dị ookpomoghan oruphiom ẹgham nyọpo ạsu phọ rakiilom bọ rꞌạbuo ẹgham mọ ọdi.

²⁰ Usiph ni elhom ẹnam mọ rꞌoyil ọkpe phọ aḍighi yogh ghan bọ ịiḍaany ghisigh phọ ọdi ọlogh ikoli. (Ọdi ạsighe ịiḍaany phọ ịpe phọ kụ aakeleghiom bọ bụphe ọlogha yogh bọ elegh elhom ẹnam mọ rꞌạbuphe ooseeny bọ ịyaar ọotughianam ghan ọdi phọ.) Uroph ni elhom ẹnam mọ rꞌoyil ọkpe phọ imoom osumeeny ọodu ạnian phọ reemorom bọ sọlfa phọ.

²¹ Bụo ẹgham mọ ạbidi ụziom elhool ẹgham mọ epuka bọ ọnhu ọpo ạsu phọ rakiilom bọ, kụ oomo ịnun phọ ạa iphulupul phọ ạbidi ẹpherogh.