Ogonanami Phọ 15 - Ạḍinya Iigbia

Ạruukpaany phọ ọpham bọ imananaany ekureriom mọ

¹ Kụ mị ụḅile ni ạmiin ẹnon eboom eḍeenaan ẹpe kꞌạke, dị eḍigh ịikia ruugu: oḍual ạruukpaany ụrol li dị ọpham oḍual imananaany. Ịphen kụ ịlo ekureriom ạghelhe phọ Ẹnaan.

² Kụ mị ạmiin ịdi ẹwa ọghighom ọphiiny asitamaḍiki dị aḅughonom nịan. Mị ụmiin kẹn ni bụphe ọkpar bọ opu elhom ẹnam mọ rꞌesi ạbal phọ aḍien phọ ọdi emuneniom bọ rꞌịyaar ọotughianam ghan ọdi phọ. Bịdi ụmeregha oogbom ọphiiny asitamaḍiki phọ kụ ọphamagh rugumogum mọ Ẹnaan ẹngo bọ bịdi.

³ Bịdi ụmoor ghan ḍụor phọ aMozis, oye oḍighi phọ Ẹnaan, ḅịle rꞌạḍio Ọony Oyool-ọga phọ mọ, “Ẹnaan Oomo Ịikpo, Ọmoogh-we phọ, Ọdaam oomo areelhe, iiḍighi phọ ạna ẹbugh ni, ẹḅile eḍigh ruugu. Eḍighinom ịyaar phọ ạna egey ni, ḅịle esel li.

⁴ Ọmoogh-we, ạnhian kụ ọdi nyịna kághiilaan bọ? Ạnhian kụ kakel bọ ọghaaph ịlo igbogh phọ ạna omitiom, ịdipho nạ bịn kụ aḍighi bọ oye aruukuan phọ? Oomo phọ areelhe phọ kotu ni okpuḍian ooseeny nyịna, ịdi eḍighi bọ aḍita phọ kụ rọmiin ni iiḍighi aruukuan phọ ạna.”

⁵ Ịphen phọ eten bọ, mị ụḅile ni aphogh kụ ạmiin otu ịiḅereghi phọ kꞌạke dị oghughuron rꞌOgbogo Ạdol Ẹnaan phọ.

⁶ Oḍual phọ ạruukpaany phọ Ẹnaan ọpham bọ oḍual imananaany ekureriom mọ ụḍua ni sịphe otu ịiḅereghi phọ omite. Bịdi uunmenan ịnmananmana iidugha dị ẹḅaal fịafia, kụ okuugha yogh rukuughaam agol rokpologhi phọ ạbidi.

⁷ Kụ oniin sịphe inya ạraraar phọ ẹmoogh bọ ḍiphooghu phọ ạngo oḍual phọ ạruukpaany phọ oḍual iḍukuru ạsigbagba agol, dị ạghelhe phọ Ẹnaan edi ghan bọ kꞌagee-pọ kꞌagee-pọ phọ amuza.

⁸ Ạmughi kꞌeegu rꞌịikpo phọ Ẹnaan ạdumughaan ni amuza otu ịiḅereghi phọ, bịn oye óḍigh mun tụtu oḍual phọ imananaany phọ oḍual ạruukpaany phọ ọpham bọ orumom meteneghu.