Ogonanami Phọ 13 - Ạḍinya Iigbia

Ịyal ilhom ịnam mọ

¹ Kụ mị ụḅile ni ạmiin elhom ẹnam dị ẹsoghoronu sịphe ọphiiny phọ retu. Ịmoogh ḍioph ạraphaal rꞌoḍual ạrumhu, kụ ọphaal ọphaal rꞌeghoony ọdaam, ḅịle ẹmhu ẹmhu rꞌaḍien ọopuom Ẹnaan dị ọge.

² Elhom ẹnam mọ mị ạmiin bọ ịwa ọghigh ootiir. Aruwol phọ ịghigh ịlo eephe-ạno, ọnhu phọ ạghigh ọlo ạnam-dịka. Ẹnam oḍual ạrumhu phọ ịngo ni elhom ẹnam mọ ịikpo phọ rꞌạgada ọdaam ẹmha phọ rꞌigbogh ịtooghi phọ ọdi.

³ Ịghigh mụdi mọgbemeghi eniin ẹmhu elhom ẹnam mọ okiigh. Ariisi phọ ọgbemeghi bọ regheleghu, kụ eroor oomo phọ aḅirini phọ kụ ọdaph ghan nyọdi.

⁴ Oomo awe phọ uuseeny ni ẹnam oḍual ạrumhu phọ, ịdi eḍighi bọ ọdi mạḅogh ịtooghi phọ ọdi ạlogh ḍịghaagh elhom ẹnam mọ. Bịdi uuseeny kẹn ni elhom ẹnam mọ kụ ọḅem ghan mọ, “Ạnhian kụ ạghigh aani elhom ẹnam mọ? Ạnhian nụun kụ katuphiom nyọdi ẹgham?”

⁵ Umeeraam ni mọ elhom ẹnam mọ eetuma ẹghaaphogh ịlo ẹḅeeraan nyọdi ẹepuom Ẹnaan, kụ ọngo nyọdi ịnyaam ọtooghiom ạraraar esi inyadi rꞌịyal ụnwanyu.

⁶ Kụ emiigh ọopu Ẹnaan rꞌaḍien phọ ọdi rꞌamarugh phọ ọdi ḅịle rꞌoomo phọ ạbuphe orughogh bọ kꞌạke.

⁷ Umeeraam ni mọ ọdi aruphiom ẹgham we phọ Ẹnaan, ạḅile ạkpar apu bịdi. Kụ ọḅile kẹn ọngo nyọdi ịnyaam ọtooghiom ạraraar ọngo oomo arughunughun rꞌạramha rꞌạrunhu rꞌareelhe.

⁸ Oomo awe phọ orugh bọ sịen ade phọ kooseeny ni nyọdi; oḍighom ọghaaph, oomo ạbulo siḍien ạbidi ụ́ge aani sịphe ạḍinya ạbuphe odi bọ. Ạḍinya phọ ạḍio Ọony Oyool-ọga phọ ọpo oghiigh bọ; ọdi kụ ạgeeghi bọ siḍien phọ aseere kꞌamem dị aḅirini phọ kọ̋lhem.

⁹ “Oye lọ ạmoogh rụru ọnaghanan, ạnaghan!

¹⁰ Oye lọ mẹgianaan mọ osiph, kosiph ni. Oye lọ mẹgianaan mọ elhool ẹgham kụ eghiigh, kekiigh ni. Ịphen phọ rẹḅeni ghan we phọ Ẹnaan mọ ọmoogh ọkparam rꞌomeeraam.”

¹¹ Kụ mị ụḅile ni ạmiin ẹnon elhom ẹnam dị ẹḍua sịphe ade phọ remite. Ịmoogh ịyal ạraphaal ịdipho ịlo ọony oyool-ọga, kụ ẹḅa ḍịaḅa dị ẹghigh ḍịo ẹnam oḍual ạrumhu.

¹² Kụ ọdi ạsighe ni oomo ịikpo ẹḅel elhom ẹnam mọ ẹrol bọ ghisigh phọ ọdi ạtooghiom rạraar. Ọdi ạkpaariom ni de phọ rꞌoomo awe phọ ọdi mọ ooseeny ẹḅel elhom ẹnam mọ ariisi phọ ịpe ọgbemeghi bọ megheleghu bọ.

¹³ Elhom ẹnam mọ ẹphen emuneniom bọ ịyal phọ iḍighi yogh ni iboom ịiḍaany, ọḅaram ọmagh ạnian kꞌạke oseere ịsien ade phọ ghisigh oomo awe.

¹⁴ Kụ ọdi ạsighe ni ịiḍaany phọ omeeraam bọ mọ ọdi aḍighi yogh amitiom ghisigh ẹḅel elhom ẹnam mọ aakeleghiom oomo awe phọ orugh bọ sịen ade phọ. Ẹnam mọ ẹphen phọ ịḅeni ni oomo awe aḅirini phọ mọ ọka ịyaar ọotughianam ghan elhom ẹnam mọ ẹpe elhool ẹgham mọ esoroghuom bọ kụ úmugh bọ.

¹⁵ Umeeraam ni mọ elhom ẹnam mọ emuneniom bọ ịyal phọ ephooghu ḍiphooghu aghuḍum ẹlhogh ịyaar phọ ọka bọ ọotughianam ghan ẹḅel elhom ẹnam mọ, ọbo ẹḅa, ẹḅile ẹze oomo phọ ạbuphe kőmeera bọ ooseeny ghan nyọdi.

¹⁶ Elhom ẹnam mọ ịkpaariom ni oomo awe, bụbam rꞌabugbogh, rạalha rꞌarukulom, rẹbene rꞌạbuo ade, mọ ọlogha yogh relegh rạghaagh elhiom rꞌarolhor ạbidi.

¹⁷ Mọ oye ịyaar kúko, ḅịle kúbool, emuton lọ ọdi ạlogha elegh phọ ẹphen phọ; oḍighom ọghaaph, mọ káḍien elhom ẹnam mọ, pọ ọnhu esi ạbal lọ aḍien phọ emuneniom.

¹⁸ Ịphen phọ regbologh ghan olegheri ịyaar. Oye lọ ạsu ologhi kạatughian ni ẹmhu esi ạbal lọ elhom ẹnam mọ emuneniom, ịdi eḍighi bọ esi phọ ẹphen emeghenom ni ḍien oye. Esi ẹlo ẹphen phọ emuneniom odiiny okuron odiinydi rꞌodiiny.