Ogonanami Phọ 12 - Ạḍinya Iigbia

Ạnir phọ ḅịle rꞌanonom mọ

¹ Kụ eboom eḍeenaan emite ẹpe kꞌạke. Ạnir ạrol li dị ạkpologhian erumuḍio phọ, ạkpasaghiom ruwol ọdi ụnwanyu phọ, ạḅile azua ẹmhu ọdi eghoony ọdaam aḍioph rꞌịyal ạraanaan.

² Resiom nyọdi ọmar, kụ oghunughun phọ rꞌịminimiin ẹmaria phọ eḍighi ịdi ọdi amoghi amitiom.

³ Kụ ẹnon eḍeenaan ẹḅile emite ẹpe kꞌạke. Oboom anonom ẹtogh-tọgh ẹnam ạrol li dị ẹmoogh oḍual ạrumhu rꞌaḍioph ạraphaal, kụ ẹmhu ẹmhu rꞌeghoony ọdaam, dị ezua.

⁴ Ẹsoph phọ ọdi, ịghoghom muniin esi ịraar abin ạraanaan phọ ẹpe kꞌạke eroph esiemi ude. Ọdi ạmeera ghisigh ạnir phọ oghunughun phọ rakun bọ, ọbo ọmar mọony phọ roseere bịn ọdi ạba.

⁵ Kụ ạnir phọ ạmar olephiri aseere, ọdi kạpam ịkpara okuron kụ ạdaam oomo areelhe phọ. Kụ oziton nyọdi mọony phọ ạar ọsighe ọghiom Ẹnaan sịphe ạgada ọdaam mọ.

⁶ Ạnir phọ asuma agheel ẹdala dị Ẹnaan meekolobian esi eseenaan nyọdi, dị kọzo nyọdi oniin ọonir ịyal okuron rꞌodiinydi aḍughul-otu.

⁷ Kụ oruphe ẹgham ẹpe kꞌạke. ẠMaikel rꞌạruukpaany phọ ọdi ọrol ḍịghaagh eenan nonom oḍual ạrumhu phọ rꞌạruukpaany phọ ọdi.

⁸ Kụ ọkpar opu nonom mọ, bịn úmeera mun mọ ọdi rꞌạruukpaany phọ ọdi ọḅile ọrol kꞌạke.

⁹ Kụ oroph oboom mọ anonom oḍual ạrumhu phọ omitiom. Ọdi kụ egbaany ẹkaraph-ịyaar phọ oghol bọ mọ Eru ḅịle rꞌaSetan phọ eekeleghi bọ oomo aḅirini phọ. Kụ oroph nyọdi rꞌoomo ạruukpaany phọ ọdi osiemi ude.

¹⁰ Kụ mị ạnaghan ḍịolho ẹpe kꞌạke dị rẹḅem ghan mọ, “Nyịidipho ạpeleeny phọ Ẹnaan masi sịen. Nyịidipho Ẹnaan meḍeenaan ịnyaam mọ ọdi, mọ ọno kụ ọdaam mọ ni. Nyịidipho aKraist phọ ọdi maḍeenaan ịikpo phọ ọdi, ịdipho moroph bọ ọnyo iḅoroghom mọ ạmeera bọ ghisigh phọ Ẹnaan raḅoroghom ghan bụo asiya phọ ayira ḍughul rꞌootaany, omitiom kꞌạke.

¹¹ Ịḅaal Ọony Oyool-ọga phọ ḅịle rꞌigey phọ bịdi ogbeelom bọ kụ iḍighi bọ dị bụo asiya phọ ayira ọkpar opu nyọdi. Bịdi umeeraam ni omugh, ụ́maghami ịyaar ghuḍum mọ ạbidi.

¹² Nạ ạke phọ rꞌoomo ạbuphe orugh bọ ẹpe, ịmoogh ni iboh. Kụ pọ eeghe ọdo ịminimiin dị kịrolonaan inyina phọ erugh bọ sịen ade phọ rꞌọphiiny phọ, ịdi eḍighi bọ Eru phọ meru ịteeny inyina. Ọghagh ologhi ọdi ạbugh ni, ịdipho ọdi malhegheri bọ mọ amem dị esughanaan nyịno ekom ni iboom.”

¹³ Mem mọ anonom oḍual ạrumhu phọ eloghoma bọ mọ ọno mameel asi ude phọ, ọdi ạtomoghi ni ạnir phọ ạmar bọ mọony phọ aphorogh.

¹⁴ Kụ ọngo ạnir phọ ịyal araphaaph oboom uga ịlo ọpheephom osi ẹdala phọ moseleminaan bọ nyọdi esi dị kọzo nyọdi ịraar ạsia rꞌạpakiri kụ ẹkaraph-ịyaar phọ nyọdi kẹ́miin mun.

¹⁵ Kụ ạmuum dị ạghigh ịdipho ọphiiny akilogh ọnhu ẹkaraph-ịyaar phọ amite, ịlo okilom ạnir phọ ọḍuanam.

¹⁶ Kụ esi ọloghonaan ạḍighaagh ạnir phọ, ade phọ ikpegherenu ni kụ oomo ạmuum mọ akilogh bọ amite ọnhu ẹkaraph-ịyaar phọ aḍiku.

¹⁷ Kụ anonom oḍual ạrumhu phọ ạghagham ni ologhi ạnir phọ dị tụtu ọdi aḅetenu ạghi oruphiom ẹgham bụeri phọ ạbuo ẹemara phọ ọdi, oomo phọ ạbuphe ọnaghan bọ ịtooghi iilogh phọ Ẹnaan kụ ọphamanam bọ igey phọ ạJizos agananami bọ.

¹⁸ Kụ ẹnam oḍual ạrumhu phọ ạmeera sịphe oogbom ọphiiny phọ.