Ogonanami Phọ 11 - Ạḍinya Iigbia

Ịyal phọ ạbugbaanaan phọ

¹ Kụ ogbi ọngo ạmi oghologo dị ạghigh ịkpara, kụ ụḅeni ịmi mọ, “Ḅetenu ạtooghi otu ịiḅereghi phọ rꞌenmeny ạrikia phọ kụ ạal bụphe rooseeny ghan bọ Ẹnaan sịphe phọ,

² kụ ọlo ụ́loghom ghan erugh phọ, ịdi eḍighi bọ mọḅogh ọngo ruuruen dị kọozeghi ẹmha iigbia phọ inyadi rꞌịyal ụnwanyu.

³ Mị katom ni ịyal ạbugbaanaan ạmi dị oonmenan iinmenan ọto, kụ bịdi kọkaaph ni ịpe Ẹnaan egananami bọ tụtu oniin ọonir ịyal okuron rꞌodiinydi aḍughul-otu phọ memunughan.”

⁴ Ịyal phọ ạbugbaanaan phọ kụ ịyal iizin ọlivs rꞌịyal ịtozi phọ ẹmeregha bọ ghisigh Uwade phọ.

⁵ Oye lọ ạwa oḍighi ạbidi ịlo ẹekaany, ạnian kẹḍua ni rụnhu ạbidi emite epiemi bụmulogh-ḍien phọ ạbidi. Ịduon phọ kụ ịdi kokiigh tọrobo oye lọ ạwa oḍighi ạbidi ịlo ẹekaany.

⁶ Bịdi ọmoogh ni ịikpo oghughi okuaḍio phọ mọ ọlophia kụ́loph ḍughul otu phọ bịdi kọkaaph bọ ịpe Ẹnaan egananami bọ, ḅịle rꞌịikpo okiton ạrumuum ạruunu adir otene ịḅaal, ḅịle rꞌịikpo ọsighe imananaany kịrokiro oseere ịsien ade phọ, ọnhu amem lọ ẹḅeeraan bịdi.

^7-8 Bịdi rọghaaph dom mọ ạbidi rọmadan, kụ elhom ẹnam mọ kẹḍua bọ ooni phọ emite ketuphiom ni bịdi elephiri. Ẹnam mọ kẹkpar ri epu kụ ẹzeeghi bịdi, kụ iimugha aruzu phọ ạbidi ẹgbiran roḅodo eboom ẹmha phọ ẹpe ọkan bọ Ọmoogh-we phọ ạbidi oghiigh. Bụphe ọmoogh bọ ọnaghan ạḍughum aruwaloor phọ rokol ghan ḍien ẹmha phọ mọ ạSodom ḅịle mọ Ijipt.

⁹ Awe oomo areelhe rꞌarughunughun rꞌạrunhu rꞌạramha kopogh ghan iimugha aruzu phọ ạbidi esi ịraar aḍughul-otu rꞌạpakiri, kụ kómeera mọ oḍiighi bịdi.

¹⁰ Kụ aḍuugh ịyal phọ awe phọ ạbuen kẹngo ni iboh weye aḅirini phọ. Bịdi kokughuḍi ni, oniin ạkiom nyoniin ruunmo, ịdi eḍighi bọ ẹmiiniom dị ịyal ariil phọ Ẹnaan phọ ạbuen ọmiine bọ we aḅirini phọ ịphughan ni.

¹¹ Ịraar aḍughul-otu rꞌạpakiri phọ meten, kụ Ẹnaan ephooghu ḍiphooghu aghuḍum ẹlhogh loor ạbidi kụ bịdi oḅerenu, kụ iḍighi ni ruugu iboom esi oomo ạbulo ọmiin bịdi.

¹² Kụ ịyal phọ ariil phọ Ẹnaan ọnaghan ḍịolho dị rẹḅem ghan kꞌạke mọ, “Itu ẹphen ạnyu!” Ạbumulogh-ḍien phọ ạbidi odi ni ropogh, kụ ọmiin dị bịdi oḍigh ọotu rokeel kꞌạke.

¹³ Mem mem mọ ọpo phọ bịn ade phọ ephiigha ẹekia ephiighaam, ịdi ephiemi muniin esi aḍioph abin ẹmha phọ, ẹḅile ẹze we dị ọman oḍual ọonir. Iḍighi ni ruugu iboom esi ạbueri phọ awe phọ, kụ oboomiom igbogh phọ Ẹnaan edi bọ kꞌạke phọ.

¹⁴ Imananaany phọ emuneniom bọ ịyal phọ meten ni, kụ mị ụḅile ni ạmiin ịdi ịpe emuneniom bọ ịraar phọ meesulom ni sịen.

Ọkuodu phọ amuneniom bọ oḍual phọ

¹⁵ Ọokpaany phọ Ẹnaan amuneniom bọ oḍual phọ aphula ọkuodu phọ ọdi, kụ otebe ịlooghi ameel kꞌạke mọ, “Ịikpo ọdaam aḅirini phọ nyịidipho meḍigh ḍịghaagh Ọmoogh-we phọ ayira rꞌaKraist phọ ọdi, kụ ọdi kạda ni kꞌagee-pọ kꞌagee-pọ.”

¹⁶ Kụ ịyaldi rꞌinya ikumoor awe phọ ọrologhom bọ sịgada ạbudaam mọ ạbidi ghisigh phọ Ẹnaan okpuḍughian ozumeri rụmhu ạbidi ooseeny Ẹnaan,

¹⁷ kụ ọḅem mọ, “Ẹnaan Oomo Ịikpo, Ọmoogh-we phọ ọpo odi bọ kụ ạrol bọ, yoor rọseph ni nyịna ịdipho nạ mạsighe bọ iboom ịikpo phọ ạna amiighom ọda phọ.

¹⁸ Ạbuo aruru phọ ụghagh ni iloghi, ịdi eḍighi bọ mẹteeny mem mọ ạghelhe phọ ạna kasoor bọ, kọḅile bọ oogboonaan ịiruen bụphe momuughu bọ. Mẹteeny mem mọ koonmo bọ ruunmo riil phọ roḍighi bọ oḍighi phọ kọngo nyịna, rꞌoomo awe phọ ạna, bụbam rꞌabugbogh, rꞌoomo ạbuphe ọlogh bọ nyịna eghuan phọ. Ọphon kụ amem mọ kopiemi bọ bụphe ropiemi bọ aḅirini phọ.”

¹⁹ Kụ oghughuron otu ịiḅereghi phọ Ẹnaan ẹpe kꞌạke kụ ọmiin Igbe Ịyo phọ sịphe phọ. Kụ aḍio phọ ẹḅaaghi, ẹmepheghian ẹḅile ẹraphan. Iboom ibikpo ẹghar. Ade phọ ephiigha.