Ogonanami Phọ 10 - Ạḍinya Iigbia

Ọokpaany phọ Ẹnaan rꞌạḍibam aḍikpooghineen ạḍinya phọ

¹ Kụ mị ụmiin ni ọnon oboom ọokpaany Ẹnaan dị ạḍua kꞌạke rasoor. Ọdi ạkpologhian ọotu. Ughiinyom ẹmhu ọdi ghozogh oburukeeny. Aghisigh ọdi ịdipho erumuḍio, aruwol ọdi ịdipho anem ạnian.

² Ọdi ạpham ni rạghaagh ọdi mọony aḍikpooghineen ạḍinya dị okpegheron. Ọdi ạdaari owol elhiom mọ ọdi ọphiiny kụ owol ekeeny phọ ạrol ạnyu ade,

³ kụ ạlooghi ạghiom ạnyu ịdipho ạnam-dịka dị remoghi. Ọdi rọlooghi rosophe kụ oḍual ạraghaagh ọomaany ẹraph emegheron.

⁴ Bịdi ọkaaph bọ roseere bịn mị ụwa ni ọge, kụ mị ạnaghan ẹḍogh dị ẹḅa ghan kꞌạke mọ, “Bọoghi ni ịpe oḍual ạraghaagh ọomaany phọ ẹḅem bọ, ụ́ge ghan esi.”

⁵ Kụ ọokpaany phọ Ẹnaan mị ạmiin bọ ạmeeraam bọ owol ạnyu ade, owol ọphiiny phọ, aphoophe ḍịghaagh elhiom ọdi ạghiom ạnyu,

⁶ kụ aghunya esi aḍien Ẹnaan phọ edi ghan bọ kꞌagee-pọ kꞌagee-pọ phọ ạlhem bọ kẹ phọ rꞌoomo ạraraar phọ edi bọ ẹpe phọ, de phọ rꞌoomo ạraraar phọ edi bọ sịphe, ḅịle ọphiiny phọ rꞌoomo ạraraar phọ edi bọ ologhi phọ, mọ, “Kóobinyemiom mun.

⁷ Mem dị ọokpaany phọ ọpo amuneniom bọ oḍual phọ maphula ọkuodu phọ ọdi, Ẹnaan keḍighi ni emuneni ịpe ịbooghian phọ ọdi magbiighi bọ, ịdipho ọdi ạghaaph bọ amitiom ạḅeni riil phọ oḍighi ghan bọ oḍighi phọ ọngo nyọdi.”

⁸ Kụ ẹḍogh phọ ẹpe mị mạnaghan ghan bọ dị edi kꞌạke kụ rẹkaaph phọ, ẹḅile kẹn ẹghaaph ịḅeni ịmi mọ, “Kịa ạar ḍikpooghineen ạḍinya phọ okpegheron bọ kụ edi bọ ḍịghaagh ọokpaany phọ Ẹnaan ạmeera bọ owol ọphiiny, owol ạnyu ade phọ.”

⁹ Mị ụghi ni ạteeny ọokpaany phọ ạḅeni mọ, “Ụngo ịmi mọony aḍikpooghineen ạḍinya phọ.” Kụ ọdi mọ, “Sịghe ạraal ạminogh. Kekiḍim ni ọkuruḅaka phọ ạna, kụ kẹmen ni ịdipho ẹnuum aḍiowo ọnhu phọ ạna.”

¹⁰ Kụ mị ạsighe mọony aḍikpooghineen ạḍinya phọ sịphe ạḍighaagh phọ ọdi ạraal, kụ ịmen ni ịdipho ẹnuum aḍiowo ọnhu phọ ạmi. Mị rọmin kụ aḍikuḅaan ạmi eeph.

¹¹ Kụ ụḅeni ịmi mọ, “Nạ kạḅile ni ạkaaph ịmiin phọ ịpe Ẹnaan egananami bọ ịlo ịbadi areelhe rꞌạramha rꞌạrunhu rꞌạbudaam mọ.”