Nẹhum 3 - Ạḍinya Iigbia

¹ Mephe! Ẹmha ọkpe phọ, ẹmha phọ rọze ghan bọ we phọ, mephe! Kụ aruphua emuza ịlo owum ọsighiogh ọḍuanam!

² Ịnaghan ḍịgur ịguroghom, ḍịkarakara ạḍiaḅa ariigida, opeleghu ạrusu, otirighaan arughuugh ẹgham!

³ Ạbuo oghiilom ạsu ozuom ẹgham, arolhool ẹgham rẹmepheghian, ịsoph enmeeghu! Egu awe dị momuughu kꞌẹpe ạnyu, ịlo ogbi ílho — awe rookpeteghaan ghan bịdi.

⁴ Rọliom Nineve, ạnir erelhe ipesi phọ, ạnir phọ ọpo ẹnighe phọ ọdi ẹmagh bọ reelhe phọ, ịkaraph ạrugba phọ ọdi ẹsighe bọ bịdi etene rẹbene.

⁵ Ọmoogh-we Oomo Ịikpo phọ ạḅem mọ, “Mị kạliom nyịna, Nineve. Mị kạrolomi nyịna ẹdaḅa kụ areelhe ọmiin nyịna, ọmiin nyịna rꞌoomo aroofola phọ ạna.

⁶ Mị kạḅitonaan nyịna kụ aakpereghiom nyịna atopha. Awe kosinini rꞌọto kụ ophogh nyịna.

⁷ Oomo ạbulo ọmiin nyịna kọnyaghaan kụ oḅula ọman. Bịdi kọḅem mọ, ‘Nineve mephe! Ạnhian kụ kạnma nyọdi ighirigiir? Ạnhian kụ kạadereghi nyọdi?’”

⁸ Nineve, nạ ạnighe ni apu Tebes ẹkpana ẹmha phọ Ijipt ḍụghum? ATebes kẹn bịn ạmoogh ni ọphiiny osophoghom ọdi mụdi iikpe — Ọphiiny aNail phọ kụ ọoḅakiom dị odianaan nyọdi.

⁹ Ọdi kụ ạda Ẹtiopia rꞌIjipt, ekureriom ílho ịikpo ọdi; ạLibia rꞌọdi kụ ụrol ḍiniin ạḍighaagh.

¹⁰ Ghạlamo ịduon phọ bịn ụsighe ni weye aTebes ọḍuanam ọrol dọl ạrebene. Tọrobo ẹkul eten ukuphogh ni nmụny ạbidi ọze. Ụkpooghi ni izime ikumoor awe phọ ạbidi kụ odiemi bụphe osiphi bọ bịdi.

¹¹ Nineve, nạ kẹn kanaghagha mụdi oye dị amiim maghiigh! Nạ kẹn kạwa ni okpetenaan esi ạmulogh-ḍien ạna.

¹² Oomo ariisi ogonaam aloor phọ ạna kẹkigh ireeny ạfig dị iimuma ẹḅaal — oye aphighemi iizin phọ, pọ iimuma phọ kẹkar ri eḍigh ọnhu ọdi!

¹³ Awe ẹgham ạna ọkigh nmạriir, kụ eelhe phọ ạna kétue ẹmerenyan ghisigh ạmulogh-ḍien phọ ạna. Ạnian kụ kele ịḅagham ạrunhu-aḍibuo ạna.

¹⁴ Ḍuughi mụum aakolobian ịlo okikimaam, kụ ạkparami riisi ogonaam mọ anyina! Zẹr ạḅay oḍighinom sibiriki, kụ ạsighe rọḅolom mọ ạabemi.

¹⁵ Ịlo nạ aḍighi aḍighi, kọsu ni nyịna nịan okiigh, ḅịle mꞌoghiigh ạna ẹgham. Koḅoor oomo anyina opiemi ịdipho ịizupha dị igurubia kụ ẹraal.

¹⁶ Nyina ịbugh ḍita ịdipho igurubia. Nyina ịmoogh bumuul aḍighi dị oḍiza opu rạanaan okuaḍio phọ! Kụ nyịidipho bịdi úlho mun mụdi igurubia dị ẹrere raphaaph ạbidi bịn ẹphepheghu ẹḍua.

¹⁷ Nyina awe iiḍighi phọ ẹkigh ḍita igurubia dị ẹlelogh loor iikpe ḍio ẹephoom. Kụ mem dị ogogo amite, bịdi ẹpepheghu ẹḍua!

¹⁸ Ogbogh ọdaam Asiria, awe phọ ạna ọdaaghi bọ momuughu, kụ igbogh awe ạna momeel rạlha bịn kọ́suma! Awe phọ ạna ọwalala ạnyu ạraaḅaraph, kụ oye ólho ọpham ạbidi orighelom.

¹⁹ Ọogho oḍighi ariisi phọ ạna ólho, kụ ariisi phọ kékeel. Oomo ạbudi ọnaghan iphirigba emeel phọ ạna rokpoola ghan rạghaagh ịlo ọḅaal ologhi. Rꞌoye akpetenaan ni ẹkaraph ẹrolom mọ ạna eekuna ị́tol bọ ḍụghum?