Nẹhum 2 - Ạḍinya Iigbia

Emeel aNineve

¹ Ẹmha phọ aNineve, ạmulogh-ḍien ratu ozuom ạna! Ịikpo phọ kẹewalami bọ nyịna meru! Pạm riisi okikima phọ ạkparami! Pogh eten phọ akananaam! Nyạ ịlo ẹgham!

² (Ọmoogh-we phọ rạwa oḅulemi eghuan phọ Ịzirel, ịdipho ẹrol bọ kụ ạmulogh-ḍien phọ aphiemi bọ.)

³ Awe ẹgham ạmulogh-ḍien phọ ọpam ịsuaram dị ẹtogh kụ ọkpologhian ịtogh-tọgh iinmenian. Bịdi rookolobian ozuom elephiri! Arughuugh ade ẹgham mọ ạbidi reemor ịdipho ạnian! Ạrusu ạbidi repeleghu!

⁴ Arughuugh phọ retoraan ịlo ẹḅeeraan sịphe areten phọ ẹghi risigh ẹki ọman sịphe arurugh ephegh phọ. Bịdi ẹmhu ịdipho ịtozi kụ rẹmepheghian mụdi aḍio dị kẹloph.

⁵ Ạbuo iiḍighi mọmagh esi; bịdi okpetaan mem dị bịdi rọki ghisigh. Bụphe rozuom ghan bọ oogborion osi sịphe iikpe phọ kụ ọmaar oseere ọsuaram mọ ogonom sighiigh lọ awe ẹmha phọ kotoḅologhi.

⁶ Ạrunhu-aḍibuo ịigaany ọphiiny phọ eghughuronu rꞌịnyaam; Aḍiigu kụ imuza sịphe ogiga ọdaam mọ.

⁷ Mosiph ạnir ọdaam mọ ọḍuanam; abutelhedom ọdi oyeela ịdipho arukurughozo rookurughan loor ọto.

⁸ Ịdipho ạmuum dị rakil kạḍua esi iikpe dị okikimaam kụ memeel, awe ọḍua Nineve kụ rokiil. “Isophe! Isophe!” emoghi ẹki ạnyu — kụ rꞌoye ọman óphogh.

⁹ Ibum ẹsighiogh silva phọ! Ibum gol phọ ẹsighe! Ẹmha phọ ẹelha kụ imuza!

¹⁰ Mophiemi Nineve! Mọḍuaghu, oye ólho mun! Iloghi mekururu esi oghiilaan; aruukum epiigha, ịnyaam ílho mun; asighisigh ekelele.

¹¹ Ẹmha phọ edi nyịidipho ẹghen, ẹpe ẹrol ghan bọ mụdi ạdol ạnam-dịka, esi phọ ọde rꞌonhiin ọghi ghan bọ ọngo eḍien ịbam ạnam-dịka phọ, kụ nmụny ạbidi ịyaar ị́ḅogh?

¹² Ạnam-dịka phọ eghiigh ịyaar ạa kụ erunyi etene ịpherepe eseenaan nyọori phọ rꞌạnmuny ọdi; ọdi amuzeḍiom esi ạdol ọdi iphulupul ịnam.

¹³ “Mị ạmulogh-ḍien anyina!” Ọmoogh-we Oomo Ịikpo phọ ạḅem. “Mị kạsuughi rughuugh anyina. Weye anyina kọze erugh ẹgham, kụ mị kạsighiogh tọrobo ịyaar lọ nyina ẹsighe rạghaagh ạbunon awe. Sịen aḅirini phọ kọ́naghan mun ịlo ịikpo phọ anyina.”