Nehemaya 9 - Ạḍinya Iigbia

Awe phọ ọgba omitiom ịkaraph phọ ạbidi

^1-2 Ḍio dị emuneniom ịyaldi rꞌinya sịphe ụnwanyu phọ ọpo phọ, awe phọ Ịzirel uukpomoghan ni ọrol ọkoony esi ịiḅereghi oḍeenaan ọto esi ịkaraph phọ ạbidi. Bịdi mọgbatan ni siloor ạbidi esi aruuruen kụ ọkpologhian rụsuoma ọto, ọḅile ophugha rụmhu ạbidi ọoru oḍeenaan ẹ́ḅaal ologhi, kụ ọmeregha kụ omiigh ootuma ịkaraph dị bịdi rꞌạburude ạburude ạbidi moḍighi.

³ Esi ịraar ạwa asuo-kẹny, Ologh Ọmoogh-we Ẹnaan phọ ạbidi ụaal li ghisigh ạbidi kụ esi ịnon ịraar ạwa bịdi uutuma ni ịkaraph ạbidi kụ ooseeny Ọmoogh-we Ẹnaan phọ ạbidi.

⁴ Ẹkaanaan ịyaar ọdagh ịrol li ẹlo ạbuo aLivai, kụ bụen kụ ụdagh bọ ịyaar phọ: aJesua, Bani, Kạdmiel, Sebanaya, Buni, Serebaya, Bani rꞌaKenani. Bịdi ụuḅereghi ni Ọmoogh-we Ẹnaan phọ ạbidi rꞌẹḍogh dị kọnaghan.

⁵ Bụen kụ ạbuo aLivai dị ọma ḍịmagh ooseeny Ẹnaan: aJesua, Kạdmiel, Bani, Hasabneya, Serebaya, Hodaya, Sebanaya rꞌaPetahaya. Bịdi ụḅem mọ, “Ịmeera eboom Ọmoogh-we Ẹnaan phọ anyina; iboom nyọdi kꞌagee-pọ kꞌagee-pọ! Tọrobo oye aboom ḍien eghuan phọ ọdi, ghạlamo ịdipho oboomi ọdi dị oye kạngo úlho bọ ni dị ạbugh ạgbaanyan.”

Ịiḅereghi iituma

⁶ Kụ awe phọ Ịzirel ọoḅereghi ịduon: “Nạ Ọmoogh-we, nạ bịn kụ Ọmoogh-we phọ; nạ kụ ụlhem de rꞌotu-ḅualhe rꞌoomo ạraraar phọ edi bọ ologhi ạbidi; nạ kụ ụngo ghuḍum oomo phọ ạbidi. Ịikpo phọ ịpe edi bọ kꞌạke phọ ekpuḍian ni reeseeny nyịna.

⁷ Nạ Ọmoogh-we Ẹnaan phọ kụ ụsaḅar bọ ni Ebram kụ aḍiemiom nyọdi omite aUr ẹpe Bạbilonia; nạ kụ unme bọ ni ḍien phọ ọdi aghol mọ Ebraham.

⁸ Nạ ụwa ni ạmiin mọ ọdi aḍuom ni nyịna ologhi, kụ nạ aghiran ịyo rꞌọdi Nạ uguanaan ọngo ọdi de awe aKenanait rꞌade ạbuo ạHitait rꞌạbuo Ạmorait, rꞌade ạbuo ạPerezait, rꞌade ạbuo Jebusait rꞌade ạbuo aGirgasait, oḍighi ade dị oghiil ạnmuny ọdi kotugh. Nạ ụphamanam ni ruguanaan phọ ạna loor esi dị nạ oye oḍuom ologhi.

⁹ “Nạ ụmiin ni ịpe ạburude ạburude phọ ayoor ọmiinom bọ ẹpe Ijipt; nạ ụnaghanan ni ḍịmagh ọloghonaan ạḍighaagh phọ ạbidi sịphe Ọphiiny Igbilha phọ

¹⁰ Nạ uḍighi rạraar ịiḍaany esi ọdaam mọ, esi ạbuo ịtooghi phọ ọdi rꞌawe eelhe phọ ọdi, loor esi dị nạ ulegheri ni ịdi bịdi ọmiine we phọ ạna. Nạ akola ni ḍien igbogh esi ạbidi kꞌarodon.

¹¹ Esi ọphiiny bịn nạ ạmitiomonaan ni we phọ ạna eten kụ aḍiemiom bịdi sịphe ạḍigharaghar ade phọ. Awe phọ ophorogh bọ bịdi uḅi ni ogbo ạmuum mọ ịdipho aḍighiigh reḅi ghan bọ ologhi ạmuum.

¹² Nạ uḍiemiom bịdi rꞌeekpoogh ọotu mem ootaany, kụ ḍughul nạ uḍiemiom bịdi rꞌeekpoogh ạnian.

¹³ Ẹpe Eegum aSainai nạ ạḍua kꞌạke asoor ude; Nạ ụḅaanaan we ạna kụ ạngo bịdi igey iilogh rꞌịma ịtughemi.

¹⁴ Nạ ụtughemi bịdi oseere aḍio ophooghian phọ ạna iigbia, kụ esi aMozis otelhedom mọ ạna kụ ẹdi nạ ạngo bịdi iilogh phọ ạna.

¹⁵ “Mem dị ọkoony asiph bịdi, nạ ụngo ni bịdi eḍien dị ẹḍua kꞌạke, rꞌạmuum dị ạḍua esi aḍighiigh mem ọkoony ạmuum. Nạ ụḅeni bịdi mọ ophogh de phọ ạḍiphe nạ aguanaan bọ ọngo ạbidi.

¹⁶ Kụ ọlo ạburude ạburude phọ ayoor ologhoma igbogh rꞌọḅaar ẹmhu kụ úmeera úḍighi ịlo nạ ạḅem mọ oḍighi.

¹⁷ Bịdi úmeeraam ụ́naghanan; bịdi uwula ni oomo phọ ịpe nạ aḍighi bọ; bịdi uwula ni ịiḍaany phọ nạ aḍighi bọ. Esi ologhoma igbogh, bịdi ụsaḅar ri oḍiemiom dị kạsighe bịdi aḅulemi Ijipt ẹpe ạdol ạrebene phọ. Kụ nạ Ẹnaan dị rạsar ghan kạwilenaan; nạ oye ạghusan rꞌẹphomoghian dị ráagborion ghan oḍeenaan ịghagh iloghi. Ọnma ighirigiir ạna ạbugh ni; kụ nạ bịdi ọ́gunom.

¹⁸ Bịdi ụka ni ịyaar ọoḅereghi dị ẹghigh mọony aḍilephiri ạnam kụ ọḅem mọ ẹpe kụ ịyaar phọ eḍiemiom bọ bụno omite Ijipt! Pọ eeghe ịdi ọgilaam nyịna Ọmoogh-we.

¹⁹ Kụ nạ ọ́wile bịdi ẹpe ẹdala phọ ịdi eḍighi bọ ọnma ighirigiir phọ ạna ạbugh ni. Nạ ọ́gbole ọotu phọ mꞌạnian phọ ịpe eḍeenaan bọ bịdi ḍughul rꞌootaany.

²⁰ Esi ẹnighe ologhi phọ ạna, nạ ụḅeni ni bịdi ịdi ẹkpe oḍighi; nạ ụngo ni bịdi eḍien ạmana, ạḅile ạngo bịdi mụum ọphughol.

²¹ Esi inyadi ạsia ẹpe ẹdala phọ, nạ ụngo ni bịdi tọrobo ịyaar lọ bịdi ọwa; arukpe ạbidi ị́panyuan, kụ ạrada ạbidi íḅerenu rꞌeephina.

²² “Nạ ụngo ni bịdi ịnyaam ọkpar opu areelhe rꞌạramar, rạmha dị ẹkuanagh bịdi. Bịdi eeghi ni ọkpar opu de aHesbon, ẹpe aSihon kụ ạda bọ, rꞌade ạBasan, ẹpe Ọg kụ aḍighi bọ ọdaam.

²³ Nạ ụngo bịdi ịbadibadi ạnmuny ịdipho ạraanaan phọ ịpe edi bọ okuaḍio phọ, kụ ạngo bịdi ịnyaam ọkpar opu kụ orugh sịphe ade phọ nạ aguanaan bọ ọngo bụrude ạburude ạbidi.

²⁴ Bịdi ụkpar ri opu we ade phọ aKenan. Nạ ụkpar ri apu we phọ orugh bọ ẹpe. Nạ ụngo ni we phọ ạna ịnyaam oḍighi ịlo ẹḅeeraan bịdi oḍighi awe ḅịle rꞌạraalha aKenan.

²⁵ Awe phọ ạna eeghian ni ọsighiogh rạmha dị ophiighiom rꞌịikpo, de ẹnuum, ruutu dị aruphua emuza rꞌariini ạmuum ọphughol dị oguphogh, ireeny ọliv, ireeny iimuma, rꞌiizo avain. Bịdi ule ni tọrobo ịyaar lọ bịdi ọwa, kụ ọbughogh; bịdi ụghelom ni oomo ịma ạraraar phọ nạ ạngo bọ bịdi.

²⁶ “Kụ awe phọ ạna ụḅaar ri ẹmhu kụ ụ́naghanan nyịna; bịdi ụgumom ni ọman Ologh phọ ạna. Bịdi ụze ni riil phọ ọphur ghan bọ bịdi rụru, bụphe ọḅeni ghan bọ bịdi mọ okiton osoman nyịna. Bịdi ụgilaam ni nyịna mem etum mem,

²⁷ kụ nạ ạngo ọgel mọ ạbumulogh-ḍien ọkpar opu bịdi kụ ọda. Mem ịiḅaghami bịdi ụmagh ni nyịna ọloghonaan ạḍighaagh, kụ nạ ạḍua ni kꞌạke ạnaghanan bịdi. Esi oboom ọnma ighirigiir phọ ạna, nạ uruom ni bịdi buḍiemiom dị ọtagharan bịdi esi ạbumulogh-ḍien ạbidi.

²⁸ Mem dị ẹepho mẹrol, kụ bịdi ọḅile oḍighi ịkaraph, kụ nạ ạḅile ạngo ọgel mọ ạbumulogh-ḍien ọkpar opu bịdi. Kụ mem dị bịdi okiton kụ ọlom nyịna ọphel ạbidi, kꞌẹpe kꞌạke nạ ụnaghan ni, kụ amem etum mem nạ ụtagharan ni bịdi esi oboom ọnma ighirigiir phọ ạna.

²⁹ Nạ ụphur ri bịdi rụru mọ ọnaghanan ịtughemi phọ ạna, kụ esi ologhoma igbogh, bịdi ughel li iilogh phọ ạna, ọbo, ooko ghan Ologh phọ ạna kụ eten aghuḍum. Kụ esi ọḅaar ẹmhu rꞌẹ́naghanan, bịdi ughel li ọnaghanan.

³⁰ Lhạ etum lhạ rꞌọkparam nạ ụphur ghan ni bịdi rụru. Nạ ụlogh aani uwaloor esi ariil phọ ạna mọ ọghaaph, kụ awe phọ ạna ụḅaaghaph ni, kụ nạ ạngo ọgel mọ ịnon areelhe ọkpar opu bịdi.

³¹ Kụ kẹn ni, loor esi ogbogh ọnma ighirigiir phọ ạna, nạ óghinom, ḅịle óphiemi bịdi. Nạ Ẹnaan ạghusan rꞌọnma ighirigiir.

³² “Ẹnaan, Ẹnaan phọ ayoor, pọ eeghe ịdi nạ ạbugh! Pọ eeghe ịdi nạ aḍigh eegu, ạḅile ạmoogh ịikpo. Nạ ạkar raako ghan ruguanaan ịyo phọ nạ aghiran bọ. Emiigh kꞌamem mọ ạbudaam Asiria phọ ụkpiloghom bọ iyoor kụ kꞌạnyiidipho ni, ọmiinom mọ ayoor mạbugh ni iboom! Ạbudaam ayoor rꞌabuḍiemiom rꞌariil ạrikia rꞌariil kꞌẸnaan, ạburude ạburude rꞌoomo awe phọ ayoor mọmiinom ni. Tụutughian ni oomo ịpe yoor mọmiinom bọ.

³³ Ịpe nạ ụliom bọ iyoor eḍighi ni ịne; nạ kőbi, ghạlamo ịduon yoor moḍighi bọ ni ịkaraph.

³⁴ Ạburude ạburude ayoor, ạbudaam mọ, abuḍiemiom mọ rꞌariil ạrikia phọ, úuko Ologh phọ ạna. Bịdi ụ́naghanan ikpo ọnhu phọ ạna rꞌọphur ạruru phọ.

³⁵ Esi ạḍiseph ạna, ạraalha ụda ni we phọ ạna mem dị bịdi orugh ẹeregha ade ẹnuum mọ nạ ạngo bọ bịdi; kụ bịdi ọwile okiton esi ịkaraph okumu ạna.

³⁶ Kụ nyịidipho yoor ạrebene sịphe ade phọ nạ ụngo bọ iyoor, ịma ade ẹnuum mọ rịngo ghan bọ iyoor eḍien.

³⁷ Tọrobo ịyaar lọ ade phọ emitiom rekeel ghan rạghaagh ạbudaam mọ, bụphe nạ ạngo bọ ọda ayoor loor ẹmhu ọpioman ayoor. Bịdi ruḍighinom ghan iyoor rꞌịnam mọ ayoor ịlo ẹḅeeraan bịdi, kụ yoor odi ni rꞌoboom amukum ologhi.”

Awe phọ ọviilom ḍịghaagh ḍịnya oghiran ịyo

³⁸ Loor esi oomo phọ ịpe memite bọ, yoor awe phọ Ịzirel omiighe loor kụ ọgian ḍịnya oghiran ịyo kụ abuḍiemiom mọ, awe ạbuo aLivai, ariil ạrikia phọ ayoor, kụ oomo awe ọviilom ni rạghaagh.