Nehemaya 4 - Ạḍinya Iigbia

ANehemaya ạkpar apu bụo osophoghom oḍighi phọ ọdi

¹ Mem dị ạSanbalat ạnaghan bọ mọ yoor awe aJu phọ momiigh ọḅile ọlogh iikpe phọ, ịghagh iloghi ọdi ịbugh ni, kụ ọdi amiigh ọmilogh ayoor.

² Ghisigh ạbumatuan ọdi rꞌawe ẹgham aSameria, ọdi ạḅem ni mọ, “Eeghe kụ ẹdi ighiil awe aJu phọ ạbuen phọ ogbi mọ bụno roḍighi? Bịdi ọotughian ọḅile ọlogh ẹmha phọ ḍụghum? Bịdi rogbi ghan mọ esi ọphinyon ạrikia kụ ẹdi bụno kọman oḍighi phọ ḍio ḍụghum? Bịdi rogbi ghan mọ bụno kotue ni ọsighe egu ịzeghe dị ạnian melhe otene sighiigh ọloghom otu?”

³ ATobaya ạrol ọogaany ọdi kụ ạḅem aani mọ, “Eeghe ọdo iikpe kụ ẹdi bịdi kotue ọlogh? Ghạlamo ẹekpako bịn kenyu ni elereghi!”

⁴ Mị ạaḅereghi, “Nạghan ịdi bịdi rụmilogh iyoor, Ẹnaan. Ạreer phọ ạbidi azuoghom ni rụmhu ạbidi! Oomo aruphua lọ bịdi ọmoogh ephiom ni bịdi, ḅịle ọsighiogh ni bịdi ogheelom eeruen ẹmha ịdipho ạrebene.

⁵ Kạ́bilenaan sịpioghom ạbidi ḅịle kábula ịkaraph ạbidi, ịdi eḍighi bọ bịdi mụgilaam iyoor phọ rọlogh bọ iikpe phọ.”

⁶ Kụ yoor ọlogh iikpe phọ ọghiom, kụ mọony amem bịn esi oolemi-odi aḍiphoph phọ, ịdi eḍighi bọ awe phọ ụmoogh ni ẹephua okumuan.

⁷ ẠSanbalat, aTobaya rꞌawe Arebia, Amon rꞌẠsdod ọnaghan bọ mọ yoor rọki ni ghisigh esi ọḅile ọlogh iikpe phọ aJeruselem kụ mọ aropholopool phọ ẹrol bọ iikpe phọ reḍuan kemineen, kụ bịdi ọmoogh igbogh ịghagh iloghi.

⁸ Kụ bịdi oopuruan oru ozuom aJeruselem ẹgham ọowalami ạraraar,

⁹ kụ yoor ọoḅereghi Ẹnaan phọ ayoor, kụ yoor ọson we okori ghan ạbidi dulhe rꞌootaany.

¹⁰ Awe aJuda phọ ụmoogh ni ḍụor dị ọmoor ghan mọ: “Yira modugh orool asidool; Egu ịpherepe asighiigh orool dị edi ẹbugh ni. Yira kọlogh bọ ika iikpe phọ rodon?”

¹¹ Ẹpomoghian phọ ayoor ugbi mọ yoor kọ́miin bịdi, ḅịle kólegheri ịlo remite tụtu bịdi uzuom iyoor, ọḅile ụze iyoor bịn oḍighi phọ ayoor aphe.

¹² Kụ ọlo amem etum mem awe aJu dị odi igbo ẹpomoghian phọ ayoor uru ghan ni ụphur iyoor rụru ịlo ịpe ẹpomoghian phọ rugbiighinaan bọ iyoor.

¹³ Esi ịduon phọ, mị aakolobian we phọ ịlo ẹgham rꞌarolhool rꞌịsoph rꞌạsikumugh, kụ mị asereghi bịdi ọman iikpe, ọto atum ọto, tọrobo esi lọ kọ̋lhogh ọman.

¹⁴ Mị ụmiin mọ aruugu rasiph we phọ, kụ mị ạḅeni bịdi rꞌabuḍiemiom mọ rꞌạbuo iiḍighi phọ ạbidi mọ, “Kékiilaan ẹpomoghian phọ ayira. Ịitughian ịpe Ọmoogh-we phọ ạman bọ esi eegu rꞌịikpo, kụ eghol we ẹmha phọ anyina, nmụny anyina, nmạriir anyina rꞌaruutu anyina eeghi ẹgham mọ.”

¹⁵ Ẹpomoghian phọ ayoor ụnaghan mọ yoor molhegheri ịitughian phọ ạbidi kụ bịdi ologhoma mọ Ẹnaan mẹphue ịitughian phọ ạbuno. Kụ oomo phọ ayoor oḅula ọḅile ọlogh iikpe phọ.

¹⁶ Kụ emiigh sịphe kụ ẹghi, oolemi-odi awe phọ ạmi ukumuan ghan rukumuan, kụ oolemi-odi ọmeera ghan okori ạbidi, ụkpologhian ịinya ẹgham, buniin ọpham ịsoph, rꞌịsuaram ikpo, rꞌạsikumugh. Kụ abuḍiemiom ayoor uḅegh ni we phọ

¹⁷ ọḅile bọ kọlogh iikpe phọ. Ghạlamo ạbuphe rọḅiir bọ iikpe phọ bịn ụpham ịyaar ẹgham ḍiniin ạḍighaagh kụ ọpham ịyaar arukumuan ḍịeri phọ,

¹⁸ kụ tọro lọ rạlogh aani iikpe phọ ạkpua ni elhool ẹgham esin ọdi. Ọpo kapula bọ ọkuodu ọphurom ạruru phọ ạrolan rꞌạmi.

¹⁹ Mị ụḅeni we phọ rꞌạbuo iiḍighi rꞌabuḍiemiom mọ ạbidi mọ, “Oḍighi phọ ạtara ni iboom dị loor ạḍidoony phọ oniin ọnyo ayira kạkelan ghan ni nyoniin sịphe iikpe phọ.

²⁰ Eḍighi ịyaar dị nyina ẹnaghan ọkuodu phọ, pọ itu eekpomoghan sịphe mị odi bọ. Ẹnaan phọ ayira keenaan ni iyira.”

²¹ Kụ tọrobo aḍio, emiigh ḍịroor kụ ẹghi ẹteeny mem lọ ạraanaan adulhe kemite, oolemi-odi ayoor rọlogh iikpe phọ kụ ạbueri phọ ọmeera rokori ghan rꞌịsoph.

²² Mem mọ ạmuen phọ, mị ụḅeni oomo ạbuphe ropogh bọ oḍighi phọ rꞌạbuphe rọloghonaan ghan bọ ḍịghaagh phọ, mọ bịdi kọtol ghan ḍughul ẹpe Jeruselem, pịdi yira okori ghan ẹmha phọ ḍughul kụ oḍighi oḍighi ootaany.

²³ Ghạlamo ḍughul, mị ụ́kporonaan ghan ạsuoma ạmi, ạbuphe rụdaph bọ ịmi kẹn ni, rꞌabutelhedom ạmi rꞌawe phọ rukori ghan bọ ịmi. Oomo phọ ayoor ụpham ghan rạraar ẹgham mọ ayoor rạghaagh.