Nehemaya 2 - Ạḍinya Iigbia

ANehemaya rạki Jeruselem

¹ Eniin aḍio mem dị inya ụnwanyu meten, dị Atazakzis ogbogh ọdaam mọ rale ghan eḍien, mị ụsighe miim kụ ạghiom nyọdi. Ọdi ịmi kụ̋miin ghan rꞌạdol ẹ́ḅaal ologhi,

² kụ ọdi apuru mọ, “Uḍighi ika kụ ologhi phọ ạna ọ́ḅaal bọ? Nạ ụ́ururughian bọ, pọ ologhi ạna ọ́ḅaal.” Mị ukperaan ni

³ kụ ạphagharanaan mọ, “Ọdaam, tọl kꞌagee-pọ. Mịna kạkparam bọ ika dọl ẹ́ḅaal ologhi mem dị ẹmha phọ ẹpe oḍi bọ bụrude ạburude phọ ạmi mephe kụ ạrunhu-aḍibuo iikpe ẹmha phọ ạnian meegulemi?”

⁴ Ọdaam mọ apuru mọ, “Eeghia kụ ẹdi nạ rạwa?” Mị ụuḅereghi Ẹnaan kꞌạke phọ,

⁵ kụ mị ạḅeni ọdaam mọ mọ, “Eḍighi ịyaar dị ọdaam mọ ạmoogh ḍịḅeeraan esi ạmi, pọ nạghanan ịlom mọ ạmi mị ụki eelhe phọ aJuda, ẹpe ẹmha phọ oḍi bọ bụrude ạburude phọ ạmi mị ụḅile ụlogh ẹmha phọ.”

⁶ Ọdaam mọ rꞌạnir phọ ọdi ọtol ootumanaan, kụ ọdi ameeraam ịlom mọ ạmi. Ọdi upuru ni ịmi mem dị kẹsighe ẹghi phọ ạmi rꞌorigheel phọ, kụ mị ạḅeni nyọdi.

⁷ Kụ mị ạlom nyọdi rịnya ọgel rꞌịikpo, ịlo ọngo awe phọ ạbuphe ọda bọ eelhe aYufratis ẹpe erumuḍio phọ remeel ghan bọ ọḅeni ạbidi ịlo ẹghi phọ ạmi ẹpe Juda.

⁸ Mị ụḅile ni ạlomom ḍịnya ọngo Asaf, ọpo rapogh ghan bọ ẹekpua ọdaam mọ, ọḅeni ọdi ọngo ạmi ireeny oselemiom ạrunhu-aḍibuo Otu Ịiḅereghi phọ rꞌiikpe ẹmha phọ ḅịle rꞌotu phọ ọpo mị kạtol bọ. Ọdaam mọ ụngo ni ịmi oomo ạraraar phọ mị ạlhom bọ, ịdi eḍighi bọ Ẹnaan ịrolan ni rꞌạmi.

⁹ Ọdaam mọ ạlogh ni we ẹgham rꞌawe dị rokiilom ạsu ọdaph ạmi kụ mị ạghi asi ẹpe eelhe aYufratis ẹpe erumuḍio phọ remeel ghan bọ. Sịphe mị ụngo ni rịnya ọdaam mọ bụphe ọda bọ.

¹⁰ Kụ ọlo ạSanbalat ọlo ẹmha ạBet Horon rꞌaTobaya, oye oḍighi sịphe eelhe phọ Amon ọnaghan bọ mọ oye maru okumuan arukumuan ịlo ọngo awe phọ Ịzirel, ịghagh iloghi ạbidi ịbugh ni.

¹¹ Mị ụghi ni asi Jeruselem, kụ esi ịraar aḍughul-otu

¹² mị ụ́ḅeni oye ịpe Ẹnaan ẹḅogh bọ ekpom ạmi ịlo oḍighi ẹpe Jeruselem. Rẹteeny ogbo aḍughul kụ mị aḅetenu amite, mị rꞌopol awe phọ ạmi. Yoor ụpham eniin ẹnam adool dị mị aḍigh bịn.

¹³ Iḍighi ni ḍughul mem mọ mị amite bọ ẹmha phọ. Mị ukiton Ọnhu-aḍibuo Eḍiiny phọ ẹpe erumuḍio phọ remeel ghan bọ kụ mị ạghi ẹpe esoorom mọ atenom Ọodu Elhom Ẹnam mọ kụ mị ạghi asi ẹpe Ọnhu-aḍibuo Atopha phọ. Ịdipho mị ạghi bọ mị ụuḅeghion aphogh iikpe oghoony ẹmha phọ olhereghi bọ rꞌạrunhu-aḍibuo phọ ạnian phọ ephiemi bọ.

¹⁴ Kụ ẹpe erumuḍio phọ remite ghan bọ sịphe ẹmha phọ, mị ụghi ẹpe ephunom mọ atenom eḍighom Ọnhu-aḍibuo Ọonu Adir kụ asi Ọonu Ọdaam mọ. Ẹnam adool phọ mị aḍigh bọ ị́moogh esi oten loor egu ọogha iikpe phọ emeel bọ.

¹⁵ Kụ mị ạghi rꞌạsu phọ ẹpe eḍiiny phọ ạKidron kụ aphogh ghan iikpe phọ. Kụ mị aḅula eten phọ ẹpe mị akiton bọ kụ atenom Ọnhu-Aḍibuo Eḍiiny phọ kụ aḍigh ẹmha phọ.

¹⁶ Rꞌoniin ạbuo iiḍighi phọ odi ghan bọ ẹpe ẹmha phọ ólhegheri ẹpe mị ạghi bọ rꞌịyaar phọ mị aḍighi ghan bọ. Ịyaar mị ụ́ḅeni rꞌoniin ọnyo aJu, riil ạrikia phọ, buḍiemiom mọ, bụo iiḍighi phọ rꞌạtorobo oye lọ kạmoogh aani ịyaar oḍighi pạ arukumuan phọ.

¹⁷ Kụ nyịidipho mị ụḅeni ni bịdi ịduon mọ, “Ịmiin ịiḅaghami dị yira ọmoogh ịdi eḍighi bọ aJeruselem maphe kụ ạrunhu-aḍibuo phọ meegulaan! Itu ọḅile ọlogh iikpe ẹmha phọ, oḍighi ịdi umugholoor ayira kasi eekuna.”

¹⁸ Kụ mị ạḅeni bịdi ịdi Ẹnaan ạrolan rꞌạmi kụ ụlhoghonaan ịmi ḍịghaagh, rꞌịpe phọ ọdaam mọ ụḅeni bọ ịmi. Kụ bịdi ọphagharanaan mọ, “Omiigh ọḅile ọlogh!” Kụ bịdi ookolobian omiigh oḍighi.

¹⁹ Mem dị ạSanbalat, Tobaya rꞌọlo Arebia dị oghol mọ aGesem ọnaghan bọ ịpe yoor rookolobian bọ oḍighi, bịdi ụmilogh ni iyoor kụ ọḅem mọ, “Eeghia kụ ẹdi nyina egbi bọ mọ nyina reḍighi? Nyina rẹwa ọḅaar ẹmhu esi ọdaam mọ ḍụghum?”

²⁰ Mị ạphagharanaan mọ, “Ẹnaan kꞌạke phọ kịngo ni iyoor ọkpar opu. Yoor abutelhedom ọdi kụ yoor komiigh ọlogh iikpe phọ. Kụ ọlo nyina kẹ́moogh bin rꞌariiliom esi aruphua sịen Jeruselem, kụ nyina ị́moogh bin esi eḍighinom ạraraar ịsien.”