Nehemaya 13 - Ạḍinya Iigbia

Ọgbarion aruuruen

¹ Mem dị ạal bọ Ologh phọ aMozis, uru ni ọteeny esi dị ọḅem mọ ọlo Amonait rꞌọlo ạMoabait kꞌọrugh atum ọrugh kụ́moogh ọgel ọḅophoghan rꞌawe Ẹnaan.

² Ịyaar phọ eḍighi bọ, Amonait rꞌạMoabait phọ úmeera ụ́ngo eḍien rꞌạmuum we phọ Ịzirel mem mọ bịdi ọḍua bọ Ijipt romite. Ụḅile ghụn bịn ọkpe ikpoki Bẹlam mọ arulughi we phọ Ịzirel, kụ Ẹnaan phọ ayoor ịsighe itulughian phọ etene ḍịseph.

³ Mem dị awe phọ Ịzirel ọnaghan bọ ịbal ologh phọ ọphon, bịdi ụgbarion ni oomo aruuruen esi amarugh phọ ạbidi.

Ịpe aNehemaya aḍighi bọ ịlo onme eḍighinom ịyaar

⁴ Eliasib, oyil ạrikia phọ ọpo aphogh ghan bọ iisoph ooko ghan aruphua phọ sịphe otu phọ, maḍigh rịghiri rꞌaTobaya kꞌamem dị ebia.

⁵ Ọdi ạngo Tobaya ọodoony osoph sịphe Otu Ịiḅereghi phọ, dị aḍighi ọlo oseere ghan inmo ịbiakpa rꞌịnsens, ạraraar arukumuan ịpa Otu phọ, inmo ariil ạrikia phọ, amuniin abin esi aḍioph ịlo ịbiakpa rꞌamiim rꞌạmunum-ọliv dị rọngo ghan bụo aLivai rꞌạbuo ạsuor rꞌabukoriom Otu phọ.

⁶ Mem mọ ịphen phọ remite ghan bọ, mị ụ́tol ẹpe Jeruselem, ịdi eḍighi bọ, lhạ phọ ạḍiphe emuneniom bọ ịraardi rꞌịyal phọ kꞌamem mọ Atazakzis aḍighi bọ ọdaam ạBabilon, mị uḅula ọḅeni ọdi ịpe erelhe phọ ạmi ẹrol bọ. Esi ekulha amem kụ ọdi ụngo ịmi ịikpo oḅula aJeruselem.

⁷ Mị ạghi bọ asi, iḍighi ni ịmi ịyaar iikia ọmiin mọ Eliasib mạngo ọgel aTobaya ọsighe osoph orugh sịphe Otu Ịiḅereghi phọ.

⁸ Mị ụsighe ni ịghagh iloghi kụ mị aroḅologhi erugh oomo phọ ạraraar phọ aTobaya.

⁹ Mị ụto ni ạḅeni mọ owoph Otu phọ, ọḅile oḅulemi ạraraar arukumuan phọ, ịgbieneen ịbiakpa rꞌịnsens, esi phọ ẹkpe bọ ọrol.

¹⁰ Mị ụnaghan kẹn ni mọ ạbumoor sụor Otu phọ rꞌạbunon ạbuo aLivai mọwile Jeruselem oḅula iizo ạbidi, ịdi eḍighi bọ awe phọ rọ́ngo ghan mun bịdi eḍien dị ẹgbaanyan.

¹¹ Mị ụḅaam ni bụo iiḍighi phọ ọwile ịiḅereghi Otu Ịiḅereghi phọ dị kemeel. Kụ mị aḅulemi bụo aLivai rꞌạbumoor sụo phọ sịphe Otu phọ ọḅile omiigh oḍighi.

¹² Pọ kụ amem dị oomo awe phọ Ịzirel ọḅile omiigh ọsighe ghan oru sịphe iisoph aruphua phọ sịphe Otu phọ muniin abin esi aḍioph phọ ịlo ịbiakpa rꞌamiim rꞌạmunum-ọliv.

¹³ Mị useere bụen kọgo bọ ophogh ghan iisoph aruphua phọ: Selemaya oyil ạrikia; Zẹdok oye olegheri-ịyaar Ologh; rꞌaPedaya ọnyo aLivai. AHanan, ọony aZakur rꞌọony ọony aMatanaya, kụ aḍighi otum ạbidi. Mị ulegheri ni mọ awe phọ ạbuen awe oḍuom ologhi, mọ kodiighi ni rạraar ọngo bụeri phọ awe phọ ịdi ẹkpianaan.

¹⁴ Tụutughian, Ẹnaan ạmi, oomo ạraraar phọ ịphen mị maḍighi bọ ịlo ịiḅereghi phọ ịsiphe Otu phọ ạna.

¹⁵ Mem mọ ọpo phọ, mị ụmiin ni we aJuda dị rọpiloghom ghan iimuma avain ḍio ophooghian phọ. Bụnon awe ụgban ghan ịbiakpa, miim, iimuma avain, fịg rꞌịnon ạraraar ạnyu ịnam adool ạbidi kụ ọsighe ghan ọghi Jeruselem; mị ạphur bịdi rụru mọ kúbool ịyaar ḍio ophooghian.

¹⁶ Opol awe dị oḍighi bụo ẹmha aTaya, urugh ni Jeruselem. Bịdi ụsighe ni ina rꞌọdo kịrokiro ạraraar ọsighe oru sịphe ẹmha phọ aalha awe phọ ayoor ḍio ophooghian phọ.

¹⁷ Kụ mị ạḅaam buḍiemiom awe aJu phọ kụ mị ạḅem mọ, “Ịmiin ịkaraph dị nyina reḍighi! Nyina rẹepu ḍio ophooghian phọ!

¹⁸ Ịphen kụ ịyaar phọ Ẹnaan ẹlhiom bọ bụrude ạburude phọ anyina, kụ ẹtu bọ ephiemi ẹmha phọ ẹphen. Kụ nyina ẹkururu ni oḅulemi ịghagh iloghi Ẹnaan oruom awe Ịzirel esi ọopu aḍio ophooghian phọ.”

¹⁹ Esi ịduon phọ, mị ụto ni ạḅeni mọ ọkasaghi ghan rughuugh ạrunhu-aḍibuo emiighom ạtorobo aḍio ophooghian mem lọ aḍughul rekul, kụ kúkunyon tụtu aḍio ophooghian meten. Mị usereghi ni buniin awe ạmi sịphe ạrunhu-aḍibuo phọ ọmiin mọ ịyaar ụ́sighe ụlogh ẹmha phọ ḍio ophooghian phọ.

²⁰ Eeni amem abugbogh abumuul ḍighi rọmina ghan ni erugh ịlo okori amem dị kokunyon rughuugh ạrunhu-aḍibuo ẹmha phọ.

²¹ Mị ụḅaam ni bịdi iboom mọ, “Ẹekpia ílho dị nyina kẹtol ghan erugh kụ ekori mọ ạḍiroor ẹḅaal. Nyina ẹḅile eḍighi ịduon, mị kạsighe ịikpo kụ ịmiiniom inyina.” Emiigh kꞌamem mọ ọpo phọ, bịdi útu ghan mun ḍio ophooghian.

²² Mị ụto ni ạḅeni bụo aLivai mọ ọkia siloor ạbidi kụ ọghi okori rụnhu-aḍibuo phọ ọmiin mọ ooko ni ḍio ophooghian phọ oseere iigbia. Ụutughian ịmi, Ẹnaan esi ịphen phọ, kụ ạḅile ụwilenaan ịmi loor ẹmhu egbogh ẹphomoghian phọ ạna.

²³ Mem mọ ọpo phọ kẹn, mị ụwaaghi ni ạmiin mọ ịbadi awe aJu phọ mophinogh bụo Ạsdod rꞌAmon rꞌạMoab.

²⁴ Oolemi odi ạnmuny ạbidi ụḅa ghan ọnhu Ạsdod ḅịle rꞌịnon ạrunhu kụ úlegheri ịlo ọḅa ọnhu ayoor.

²⁵ Mị ụḅaam ni we phọ ạḅile arulughi; mị akuphogh kụ ạpham sịlaal ạbidi aḍurogh. Kụ mị aḍighi ịdi bịdi kokiran ịyo esi aḍien Ẹnaan mọ bịdi mꞌạnmuny ạbidi kóoḍikuan mun pinien rꞌaruuruen.

²⁶ Mị ụḅeni mọ, “Aruuruen ạnmariir kụ ụlhogh bọ Sọlomon Ọdaam mọ ẹku ịkaraph. Ọdi aḍighi oye dị apu bụnon ạraalha ịnon areelhe. Ẹnaan ịphomoghian ni nyọdi kụ ạsighe bọ nyọdi aḍighi ọdaam oomo Ịzirel, kụ ạḅile ni ameel aḍigh esi ịkaraph phọ ịphen.

²⁷ Kụ yoor kịdaph inyina ọḅaar ẹmhu esi Ẹnaan phọ ayira loor ophinogh aruuruen ạnmariir ḍụghum?”

²⁸ AJoyada kụ ọony Eliasib ogbogh oyil ạrikia phọ, kụ oniin ọony aJoyada aphin ọnyani ạSanbalat ọlo ẹmha Bẹt Horon. Esi ịduon phọ, mị uḍighi ni ịdi aJoyada ạḍua Jeruselem.

²⁹ Tụutughian, Ẹnaan, ịpe awe phọ ọopu bọ dọl oyil ạrikia rꞌịyo phọ nạ aghiran bọ rꞌariil ạrikia phọ ḅịle rꞌạbuo aLivai phọ.

³⁰ Mị ụusa ni we phọ esi ạtorobo ịyaar dị eḍighi eeruen; mị ụlogh ni iilogh ịlo ariil ạrikia phọ rꞌạbuo aLivai phọ pịdi tọrobo oye alegheri iiḍighi ịlo ọdi;

³¹ mị uukolobian ni aḍighi ịdi ịpe phọ ịpe kọpophoghiom ghan bọ inmo phọ ketu ghan mem mọ ọpo ẹkpianaan bọ, ḅịle ịdi awe kọsighe ghan inmo ịḅel ịbiakpa rꞌịḅel iimuma lọ ẹḅaal iizo ạbidi otu. Tụutughian oomo phọ ịphen, Ẹnaan, kụ ụngaani ịmi ḍịseph.