Nehemaya 12 - Ạḍinya Iigbia

Ạḍikool ariil ạrikia rꞌạbuo aLivai

¹ Ḍịen kụ ạḍikool asiḍien ariil ạrikia rꞌạbuo aLivai dị ọḍua iiruen origheel rꞌạZerubabel ọony ạSialtiel rꞌaJosua ogbogh oyil ạrikia phọ:

^2-7 Ariil ạrikia: Seraya, Jerimaya, Ẹzra, Amaraya, Maluk, Hatus, Sekanaya, Rehum, Meremot, Ido, Ginetoi, Abaija, Mijamin, Maadaya, Bilga, Semaya, Joyarib, Jedaya, Salu, Amok, Hịlkaya, rꞌaJedaya. Awe phọ ạbuen phọ uḍighi buḍiemiom igbo ariil ạrikia riiḍio phọ aJosua.

⁸ Ạbuo aLivai: Bụen kụ abuḍiemiom ạbuo ạsuor ọsephom Ẹnaan: Jesua, Binui, Kạdmiel, Serebaya, Juda rꞌaMatanaya.

⁹ Bụen kụ ụmoor ghan sụor ọphanyanaan: Bakbukiya, Uni, rꞌạbunon ạbuo aLivai.

Ạnmuny ạnmuny aJosua ogbogh oyil ạrikia phọ

¹⁰ Josua kụ ọde aJoyakim; aJoyakim kụ ọde Eliasib; Eliasib kụ ọde aJoyada;

¹¹ aJoyada kụ ọde ạJonatan; kụ ạJonatan kụ ọde aJadua.

Aruw-ẹmhu aropolo ariil ạrikia phọ

^12-21 Mem mọ aJoyakim kụ aḍighi bọ ogbogh oyil ạrikia, bụen kụ uḍighi ruwo ẹmhu aropolo ariil ạrikia phọ: Oyil ạrikia Opolo Meraya Seraya Hananaya Jerimaya Mesulam Ẹzra Jehohanan Amaraya Jọnatan Maluki Jọsef Sebanaya Ạnda Harim Helkai Merayot Zẹkaraya Ido Mesulam Gineton Zikri Abaija Miniamin Piltai Moadaya Samua Bilga Jẹhonatan Semaya Matenai Joyarib Uzi Jedaya Kalai Salai Eber Amok Hasabaya Hịlkaya Nẹtanel Jedaya

Oyil ạrikia Opolo Ịge ịlo arughunotu ariil ạrikia rꞌạbuo aLivai

²² Ịge ịrol li ịlo aruwo ẹmhu arughunotu ạbuo aLivai rꞌariil ạrikia, mem dị abugbogh ariil ạrikia phọ ạbuen ọrol eye: Eliasib, Joyada, Jọnatan rꞌaJadua. Ụmadan ịge phọ ịphen mem dị ạDarios kụ aḍighi ọdaam mọ aPasia.

²³ Ụge ọlogh rịnya siḍien aruwo ẹmhu arughunotu ạbuo aLivai tụtu ẹteeny mem ạJonatan ọony ọony Eliasib bịn.

Odiighi iiḍighi sịphe Otu Ịiḅereghi phọ.

²⁴ Esi oḍiemiom aHasabaya, Serebaya, Jesua, Binui rꞌạKadmiel kụ ẹdi odiighi bụo aLivai rịikpigh. Ịyal yạl ạriikpigh mem kụ oboom ghan Ẹnaan ọḅile ọseph nyọdi esi ikpo ọnhu oḍighinom phọ ịpe aDevid ọdaam mọ, oye phọ kꞌẸnaan, ạḅem bọ.

²⁵ Bụen kụ abukoriom Otu dị ophogh ghan bọ iisoph aruphua phọ etuman bọ rụnhu-aḍibuo Otu Ịiḅereghi phọ: Matanaya, Bakbukiya, Obadaya, Mesulam, Talmon rꞌAkub.

²⁶ Awe phọ ạbuen ụrol mem mọ aJoyakim ọony aJosua rꞌọony ọony ạJehozadak, rꞌamem mọ aNehemaya ọdaam mọ, rꞌamem mọ Ẹzra oyil ạrikia rꞌoye olegheri ịyaar Ologh phọ.

ANehemaya ạḅogh iikpe oghoony ẹmha phọ ạlogh ḍịghaagh Ẹnaan

²⁷ Mem dị ọḅogh bọ iikpe oghoony phọ aJeruselem ọlogh ḍịghaagh Ẹnaan, ụmagh ni bụo aLivai phọ ọḍua rikpisi lọ bịdi orughogh oru pịdi bịdi ọdaph aani esi arukumuan iboh rꞌạsuor ọsephom Ẹnaan dị ọḅaram ịsagha rꞌạrene.

²⁸ Arughunotu ạbuo aLivai phọ rọmoor ghan bọ sụor phọ uukpomoghan ni ọḍua rikpisi phọ bịdi orughogh bọ ooghironom aJeruselem kụ oru ḅịle rꞌạramha dị eeghironom Netofa,

²⁹ rꞌẹpe Bẹt Gịlgal, Geba rꞌAzmavet.

³⁰ Ariil ạrikia rꞌạbuo aLivai uḍighi ni ịinua ọkia asiloor ạbidi rꞌawe phọ rꞌạrunhu-aḍibuo phọ rꞌiikpe phọ.

³¹ Mị uukpomoghi ni buḍiemiom aJuda ạnyu iikpe phọ kụ mị aseere bịdi esi ịyal ạrooloogh awe orelhe ooghironom ẹmha phọ rọngo ghan Ẹnaan ḍịseph. Ọḅel ọoloogh awe phọ ụghi ni ḍịghaagh elhiom ạnyu iikpe phọ pạkiri ẹpe Ọnhu-aḍibuo Atopha phọ.

³² AHosaya arelhe ghan ọman ạbuo ạsuor phọ, kụ oolemi-odi abuḍiemiom mọ aJuda ọdaph.

^33-35 Ariil ạrikia phọ ạbuen kọgo bọ kụ ụdaph, ophula ghan ruuḍue: Azaria, Ẹzra, Mesulam, Juda, Bẹnjamin, Semaya rꞌaJerimaya. Bụdi otum sịphe Zẹkaraya, ọony phọ Jọnatan rꞌọony ọony aSemaya. (Ạbunon oghiil ọdi aMatanaya, Mikaya rꞌaZakur ọlo ọto Asaf)

³⁶ Ạbunon awe ọto phọ ọdi kụ utum sịphe — Semaya, Ạzarel, Milalai, Gilalai, Maay, Nẹtanel, Juda rꞌaHanani — oomo phọ ạbuen phọ ụpham ni rạraar iitia, ịdo phọ ịpe aDevid ọdaam mọ, oye phọ kꞌẸnaan, aphegh ghan bọ. Ẹzra oye olegheri-ịyaar ạḍinya kụ aḍiemiom ḍịkool phọ ạḍien.

³⁷ Ẹpe Ọnhu-aḍibuo Ọonu Adir phọ bịdi ụuda ẹedaneen dị ẹghi esi ẹmha aDevid, oten otu-ọolha aDevid kụ ọḅile oḅula ẹphen iikpe phọ ẹlo Ọnhu-aḍibuo Ạmuum ạga emitenom erumuḍio ẹmha phọ.

³⁸ Ọphori phọ ọoloogh ạbuphe ọseph ghan bọ Ẹnaan phọ ụghi ni ḍịghaagh ekeeny ạnyu iikpe phọ, kụ mị ạdaph bịdi rꞌoolemi-odi awe phọ. Yoor urelhe otenom Otu-oghoph ẹpe Aruwol Ịisa phọ kꞌẹpe Ẹreghe Iikpe,

³⁹ kụ ọḍua sịphe ọghi otenom Ọnhu-aḍibuo Ifraim, Ọnhu-aḍibuo aJesana, Ọnhu-aḍibuo Ina, ẹsogolo esi Otu ạHananel, rꞌẹsogolo esi Otu-oghoph Okuron, ọghi osi Ọnhu-aḍibuo Iyool-Ịga phọ. Yoor ukureri erelhe phọ ayoor ọghi otuman ọnhu-aḍibuo Otu Ịiḅereghi phọ.

⁴⁰ Pọ kụ ịdi ịyal phọ ạrooloogh phọ ọseph ghan bọ Ẹnaan phọ ụghi ni osi ẹpe Otu phọ. Ọḅaram buḍiemiom mọ ọrol bọ rꞌạmi,

⁴¹ ọoloogh phọ ọphon ạmi ụḅaram bụen phọ oru bọ riil ạrikia dị ophula ghan ruuḍue: Ẹliakim, Maaseya, Miniamin, Mikaya, Elioenai, Zẹkaraya rꞌaHananaya;

⁴² kụ bụen kụ utum bịdi: Maaseya, Semaya, Ẹliazar, Uzi, Jehohanan, Malkaija, Ilam rꞌEzer. Ạbumoor sụor phọ aJezrahaya kụ aḍiemiom bọ, ụmoor ri rꞌoomo ịnyaam ạbidi; ạroḍogh phọ ẹmaar emite.

⁴³ Ḍio phọ ạḍiphe, ụphinyon ni ịbadi ạrikia, kụ iloghi awe phọ ịḅaal li, ịdi eḍighi bọ Ẹnaan mẹḅaalami iloghi phọ ạbidi. Ạnmariir rꞌạnmuny ạbidi ụrolom aani ni iboh phọ, kụ ọyugh phọ ạbugh ni ịdi awe lọ ọrol ịnon arikpisi ọnaghan ni.

Ọngo ạraraar ọphamam ịiḅereghi sịphe Otu Ịiḅereghi phọ

⁴⁴ Mem mọ ọpo phọ, awe ụrol li dị oseere ophogh ghan iisoph aruphua phọ, riisi phọ oseere ghan bọ rạraar lọ ọngo ịlo Otu Ịiḅereghi phọ, ọḅaram muniin abin esi aḍioph phọ rꞌịḅel ịbiakpa rꞌiimuma lọ mẹḅaal tọrobo ạlha. Awe phọ ạbuen phọ kụ ạanyi ghan iizo oomo ạramha kịrokiro phọ iisogh ịlo ariil ạrikia rꞌạbuo aLivai, ịdipho Ologh phọ ạḅem bọ. Oomo awe aJuda ụmoogh ni ḍịḅeeraan esi ariil ạrikia phọ rꞌạbuo aLivai phọ

⁴⁵ ịdi eḍighi bọ bịdi uḍighi ni ịinua ọkia asiloor rꞌịnon ọdo ịinua ịdipho Ẹnaan ẹḅem bọ mọ oḍighi ghan. Ạbuo ạsuor rꞌephegh phọ rꞌabukoriom Otu phọ uḍighi aani ni iiḍighi ịlo ạbidi ọdaphan ịtooghi phọ ịpe aDevid ọdaam mọ rꞌạSolomon ọony phọ ọdi ạḅem bọ.

⁴⁶ Emiigh kꞌamem mọ aDevid ọdaam mọ rꞌAsaf ọmoor sụor phọ mebia bọ ni, ạbumoor sụor phọ kụ uḍiemiom ghan bọ ni sụor oboomiom rꞌọsephom Ẹnaan.

⁴⁷ Mem mọ ạZerubabel, ḅịle rꞌamem mọ aNehemaya, oomo awe phọ Ịzirel kụ ụngo ghan inmo ḍio ḍio ḍio ịlo ọphamam ạbumoor sụor rꞌabukoriom Otu phọ. Awe phọ ụngo ghan inmo iigbia bụo aLivai, kụ ạbuo aLivai ọḅile ọngo aani ghan bin lọ ạkasian bụpinyon rịkia phọ.