Nehemaya 10 - Ạḍinya Iigbia

¹ Ọḅel oye dị aviilom ḍịghaagh ọdaam mọ, aNehemaya ọony aHakalia; kụ ạZedekaya aviilom aani atum pạ.

^2-8 Bụen kọgo bọ ụviilom aani ni: Seraya, Azaria, Jerimaya, Pashur, Amaraya, Malkaija, Hatus, Sebanaya, Maluk, Harim, Meremot, Obadaya, Dạniel, Gineton, Baruk, Mesulam, Abaija, Mijamin, Maazaya, Bilgai rꞌaSemaya.

^9-13 Ạbuo aLivai: Jesua ọony Azanaya, Binui ọpo ọto aHenadad, Kạdmiel, Sebanaya, Hodaya, Kelita, Pelaya, Hanan, Mika, Rehob, Hasabaya, Zakur, Serebaya, Sebanaya Hodaya, Bani, rꞌaBeninu.

^14-27 Abuḍiemiom awe phọ: Paros, Pahat Mọab, Ilam, Zatu, Bani, Buni, Azgad, Bebai, Adonaija, Bigvai, Adin, Ater, Hẹzekaya, Azur, Hodaya, Hasum, Bezai, Harif, Anatot, Nebai, Magpias, Mesulam, Hezir, Mẹsezabel, Zẹdok, Jadua, Pelataya, Hanan, Anaya, Hosia, Hananaya, Hasiub, Halohes, Pila, Sobek, Rehum, Hasabna, Maaseya, Ahaija, Hanan, Anan, Maluk, Harim rꞌaBaana.

Oghiran ịyo phọ

²⁸ Yoor awe phọ Ịzirel, ariil ạrikia, ạbuo aLivai, abukoriom Otu phọ, ạbuo ạsuor rꞌephegh pạ Otu phọ, ạbuo iiḍighi sịphe Otu phọ, rꞌoomo awe dị loor esi ọnaghanan iilogh phọ Ẹnaan mọgbatan siloor ạbidi esi aruuruen phọ orugh bọ sịphe ade phọ ayoor, yoor ọḅaraghiom sịnmariir rꞌạnmuny ayoor dị mokpakara ni ọnaghanan ạḍughum,

²⁹ ọḅophoghan rꞌabuḍiemiom mọ ayoor esi oghunyian dị ạḅaram ni ịikpia itulughuan eḍighi ịyaar dị ụ́daph, mọ yoor kọtol li esi ịpe Ologh phọ Ẹnaan ạḅem bọ, ọpo Ẹnaan ẹngo bọ esi aMozis otelhedom mọ ọdi; mọ yoor kọnaghanan ni oomo ịpe Ọmoogh-we phọ, Ẹnaan phọ ayoor, ạḅem bọ; kụ ḅịle, mọ yoor kooko ni oomo iilogh rꞌịtooghi phọ ọdi.

³⁰ Yoor kóophini ghan rꞌaruuruen phọ orugh bọ sịen ade phọ ayoor.

³¹ Eḍighi ịyaar dị aruuruen ọsighe ịbiakpa mꞌẹnon ịyaar ogho kụ oghirom ḍio ophooghian phọ ḅịle mꞌẹnon aḍio dị eḍighi ḍio iigbia, yoor kóko rạghaagh ạbidi. Tọrobo ạlha lọ emuneniom oḍual ạsia, yoor kóḅeph ghan sịphe ade phọ, kụ yoor koogbonyon ghan ni oomo ịimugh.

³² Tọrobo ạlha yoor kosogh ghan ni tọrobo oye oogh ịtoom ẹemor asilva ọloghonaan ạḍighaagh ọkpiom amaliom Otu Ịiḅereghi phọ.

³³ Ịphen ọgo bọ kụ ạraraar phọ yoor kọngo ịlo arukumuan sịphe Otu Ịiḅereghi phọ: eḍien iigbia phọ, ịgbieneen ịbiakpa dị eḍighi inmo ịlo aḍio rꞌaḍio, ịnam ọphinyon ạrikia oguom ạnian ịlo aḍio rꞌaḍio, inmo iigbia ariiḍio ophooghian rꞌạrayaal imoom ạrunwanyu, rꞌịpheri phọ inmo iigbia phọ, inmo ọboorom ịkaraph awe Ịzirel, rꞌạtorobo ẹnon ịyaar dị rọwa sịphe Otu Ịiḅereghi phọ.

³⁴ Yoor, awe phọ, ariil ạrikia rꞌạbuo aLivai, kọsa ghan ni ẹlhel tọrobo ạlha ọwa ọmiin aropolo awe lọ komitiom ghan ịpe ịlo kọpighironom ghan bọ rịkia ọngo Ọmoogh-we Ẹnaan phọ ayoor esi ịpe Ologh phọ ạḅem bọ.

³⁵ Yoor kọsighe ghan ni ọki sịphe Otu Ịiḅereghi phọ tọrobo ạlha inmo ịḅel ịbiakpa lọ yoor ọku rꞌạtorobo ịnon ịḅel iimuma lọ ẹḅaal esi ịizupha ayoor.

³⁶ Tọrobo ọony olephiri lọ ụmaranaan iyoor, yoor kọsighe ghan ni ọki sịphe Otu Ịiḅereghi phọ, esi ịdipho Ologh phọ ạwa bọ kụ ọḅogh ọlogh ḍịghaagh Ẹnaan. Yoor kọḅogh kẹn ni ọlogh ḍịghaagh Ẹnaan tọrobo aḍilephiri ạnam, oyool-ọga mụghumo ạtu-ọga lọ ọmar kꞌayoor.

³⁷ Yoor kọsighe ghan ni ọkiom riil ạrikia phọ sịphe Otu Ịiḅereghi phọ ạkikia ịḅel iimuma ịbiakpa phọ ayoor tọrobo ạlha, ḅịle rꞌịnon inmo arimiim, ạmunum-ọliv rꞌoomo ịnon ọdo iimuma. Yoor kọsighe ghan ni ọkiom bụo aLivai, bụphe rạanyi ghan bọ iyoor sịphe ạramha phọ ayoor muniin abin esi iimuma phọ yoor mobugha bọ ẹpe iizo phọ ayoor.

³⁸ Ariil ạrikia bụo ẹemara ẹemara Eeron kọtolan ghan ni bụo aLivai mem ọsighe ghan amuniin abin esi aḍioph phọ. Ạbuo aLivai kọsighe ghan ọki otu-ooko aruphua phọ pạ Otu Ịiḅereghi phọ muniin abin esi aḍioph phọ lọ bịdi mookpomoghi.

³⁹ Awe Ịzirel rꞌạbuo aLivai kụ kọbonyi ghan iisogh ịbiakpa rꞌamiim rꞌạmunum-ọliv ọsighe ọki otu-ooko aruphua phọ, sịphe oseere bọ rạraar arukumuan Otu phọ rꞌịsiphe ariil ạrikia lọ odi oḍighi rꞌạbulo rokori Otu phọ rꞌạbuo ạsuor ọmoogh bọ marugh ạbidi. Yoor kókinom otu Ẹnaan phọ ayoor.