Matiu 8 - Ạḍinya Iigbia

ẠJizos aḍume oye dị ẹzegh ọku ufe eḍighi

¹ ẠJizos mạḍua pạ eegum mọ asoor, kụ aḍita awe ọdaph nyọdi.

² Kụ oniin oye dị ẹzegh ọku ufe eḍighi aru akpuḍian ghisigh ọdi kụ ạḅem mọ, “Oye phọ, lọ nạ kameera ni, pọ uukonom aani ịmi.”

³ Kụ ạJizos asele ḍịghaagh ạḅogh nyọdi kụ ạḅem mọ, “Mị ameera ni. Ḍum.” Kụ egina amem bịn ọdi aḍum.

⁴ Kụ ạJizos ạḅeni nyọdi mọ, “Nạghan. Kạ́kaaph ạḅeni oye. Nyeene ạghi kꞌoyil ạrikia phọ aḍeenaan loor phọ ạna ạphighironaan ẹkia phọ ẹpe aMozis ạtooghi bọ ịlo oḍeenaan awe mọ nạ mamoon.”

ẠJizos aakonom mọony-otu uwo ẹmhu ạbuo ẹgham

⁵ ẠJizos raḍigh Kạpaniom, bịn uwo ẹmhu ạbuo ẹgham ọlo aRom aru ạteeny nyọdi kụ ạaḅereghian mọ,

⁶ “Oye phọ, ọony-otu ạmi ameel ẹzegh dị ạḍighaagh rꞌaḍuwol emugh kụ rẹeḅaghami ni iboom, ạmina ni ẹpe ologhi otu.”

⁷ Kụ ạJizos ạḅeni nyọdi mọ, “Mị kạki ni aakonom nyọdi.”

⁸ Uwo ẹmhu phọ mọ, “Oye phọ, mị ụ́kpe dị nạ kaḍigh kꞌạmi. Ḅẹm ọnhu bịn. Ọony-otu phọ ạmi kaḍum ni.

⁹ Mị ạmoogh ni bụdi upu ịmi, rꞌạbuo ẹgham dị mị apu. Mị arom nyọon mọ kịa, bịn rạki ghan ni. Mị ạḅeni ọnon mọ tue, bịn ratu ghan ni. Ịlo mị ạḅeni ẹbene ạmi mọ aḍighi, bịn raḍighi ghan ni.”

¹⁰ Mem dị ạJizos ạnaghan bọ ịphen ọdi ạghaaph bọ, iḍighi ni iikia esi ọdi, kụ ạḅeni bụphe rọdaph bọ nyọdi mọ, “Mị ạkar rịḅeni ghan inyina mọ mị kọ̋miin ghan oye dị umeeraam ịmi omeeraam dị aleeny ịduon, ghạlamo rꞌọnyo Ịzirel li.

¹¹ Mị rịḅeni inyina mọ ịbadi kọḍua ni inya ạsiagaany aḅirini phọ otu ọtolan Ebraham, rꞌẠizik, rꞌạJekob olian eḍien ẹpe ọmar phọ kꞌẸnaan.

¹² Kụ bụphe muḍigh bọ ọmar phọ kosumeeny esi ufiri, kụ ọtol sịphe omoghi yogh ọkirigha.”

¹³ Kụ ạJizos ạḅeni oḍiemiom uwo ẹmhu phọ mọ, “Keel, ịpe nạ ameeraam bọ moḍighinaan nyịna.” Mem mọ ạmuphe phọ bịn ọony-otu phọ ọdi aḍum.

ẠJizos aakonom ịbadi ạbudi úmoonogh aḍume yogh

¹⁴ ẠJizos ạghi aḍigh kꞌaPita kụ ạmiin dị onhiin ạnir aPita ạmina, dị osipheeny odi uloor.

¹⁵ Kụ ọdi ạḅogh ḍịghaagh ạnir phọ, kụ osipheeny phọ amite, kụ ạnir phọ aḅetenu ạko bịdi igoni.

¹⁶ Dulhe aḍio phọ ạḍiphe kụ ọsighe ịbadi ạbudi aruru eghola yogh oruomonaan nyọdi, kụ ọdi ạghaaph ọnhu bịn aphoroghom ruru phọ, kụ aakonom oomo ạbudi úmoonogh.

¹⁷ Ịphen phọ imite omuneniom ịpe Azaya oyil phọ Ẹnaan ạghaaph bọ mọ, “Ọdi amuḍion oomo ạreezegh phọ rꞌịminimiin phọ ayira atenian loor ọdi.”

Bụphe rọwa bọ ọdaph ạJizos

¹⁸ ẠJizos rọmiin ḍita awe phọ okoom bọ nyọdi, kụ ạto ạḅeni bụmatuan phọ ọdi mọ ọḍua ọḅeeny ophun ẹpe ạḍieri phọ ạḍighaagh ọphiiny phọ.

¹⁹ Kụ oniin ọtughemia iilogh phọ aru kụ ạḅeni nyọdi mọ, “Oye phọ, mị kạdaph aani ghan nyịna tọrobo ekpisi lọ nạ rạki.”

²⁰ Kụ ạJizos mọ, “Ạruukpa-ako bịn ẹmoogh ni ropogh, ịnun phọ ẹmoogh ni ruutu, kụ Ọony phọ Oye ọ́moogh esi oḅetenom ẹmhu ọdi.”

²¹ Ọnon oye dị rạdaph ghan nyọdi ạḅeni nyọdi mọ, “Oye phọ, meera mị ukeel uḍi ọde ạmi kụ mị agbi oru ọdaph ạna.”

²² ẠJizos ạḅeni nyọdi mọ, “Ụdaph ịmi. Bịle bụphe momuughu bọ oḍiighi iḍim ạbidi.”

ẠJizos ạpoomi oghim

²³ Kụ ạJizos rꞌạbumatuan phọ ọdi ọghi oḍiku ologhi oghuugh phọ.

²⁴ Odi rọzoghi, kụ oboom oghim aghim pạ ọphiiny phọ kụ oologh amite aphum mụum ạloghoḍi ologhi oghuugh phọ. Mem mọ ạmuen phọ ạJizos rạnaani.

²⁵ Kụ ạbumatuan phọ ọdi ọghi ọteeny nyọdi ọsumeeny kụ ọḅeni mọ, “Ọmoogh-we, ụphel iyoor, yoor rope.”

²⁶ Kụ ọdi ạḅeni bịdi mọ, “Sey, nyina awe dị omeeraam ụ́manam. Eeghe kụ iḍighi kụ nyina reepuph bọ ịduon phọ?” Kụ ọdi aḅetenu, kụ ạḅeni oghim mọ rꞌọphiiny phọ mọ ẹpho, kụ ẹpho bịn nam.

²⁷ Iḍighi ni iikia esi ạbidi, kụ ọḅem mọ, “Ọphon phọ ọghen ọdo oye dị oghim mọ rꞌọphiiny phọ ẹnaghanan ni nyọdi!”

ẠJizos aakonom ịyal awe dị aruru eghola yogh

²⁸ ẠJizos ạḅeeny ọphiiny phọ aphun reelhe ạGadara, kụ ịyal awe dị aruru eghola yogh ọḍua ẹpe ẹkaraph eḍum mọ omite ozuan nyọdi. Ụgam ni ịdi oye eten phọ ẹpe óten ghan.

²⁹ Kụ bịdi ọlooghi mọ, “Nạ Ọony phọ Ẹnaan. Nạ rụwa ghan iyoor eeghe ịyaar? Nạ uru ọmiine ayoor kụ egbi ọteeny amem mọ ḍụghum?”

³⁰ Aḍita arophoropo ịrol li egher rẹḅal ghan ịḅal.

³¹ Kụ aruru phọ ẹeḅereghian Jịzos mọ, “Nạ ruphorogh iyoor, pọ uphorogh iyoor ạlogh loor arophoropo phọ.”

³² Kụ ọdi ạḅeni bịdi mọ, “Ịki”. Kụ bịdi romite, kụ ọghi oḍigh loor arophoropo phọ, kụ oomo aḍita arophoropo phọ, eghiil esumughu ọphiiny phọ bịn emuughu ephe.

³³ Kụ bụphe ropogh ghan bọ bịdi oghiil ogheel ẹpe ẹmha phọ, kụ ọghaaph oomo ịphen phọ rꞌịpe emitenaan bọ bụphe aruru phọ eghola yogh bọ ọḅeni we.

³⁴ Kụ oomo phọ ẹmha phọ ọghi ọteeny Jịzos, kụ rọmiin nyọdi, kụ ọoḅereghian nyọdi mọ ạḍua eelhe phọ ạbuno.